1 IMNDEWA kamlongela Musa, "Usongole mabamba meli gha mabwe ka aghala gha mwanduso, na nene nitsoghandika aghala ghayakalile mna mabamba gha mwanduso ghautulile. 2 Wisafulule ilupfi nemitondo utse witingane na nene hane chidando che chidunda Sinai. 3 Imunu wowose yaleke kutsa naghwe, kuya yaleke kwoneka munu hohose mna chidunda, wala ng'olo au mene waleke ukuja habehi ne chidunda." 4 Kuya Musa kasongola mabamba meli gha ghamabwe ka aghala gha mwanduso. Koka mitondotondo, kagheluka kuchidunda Sinai, ka IMNDEWA pfayamlaghitse, aku kana mabamba agho meli gha ghamabwe mmoko mwake.

5 IMNDEWA kahulumka mna libingu kema na Musa, kalikema taghwa lyake, "IMNDEWA." 6 Kuya IMNDEWA kabita hambele ha Musa kalonga keli, "IMNDEWA, nene IMNDEWA, na Imulungu yane libatsi na uluso, sisumkagha baye kona maya, nina wende wingi na notogholighwa, 7 nene nowatendela wende iwanu wa pfeleko ketseketse, nowaleghusila iwanu nzambi tsawo na ghehile ghawo, lekeni sileka baye kumuhigha imunu wowose yototsa, nowahigha iwanu ne iwana wawo kwa nzambi tsa aba tsawo, na iwana wa iwana wawo, mbaka mweleko ghwa kadatu na ghwa kane."

8 Bahala Musa kenama hasi, kamtamanila Imulungu. 9 Kuya kalonga, "Ghwe IMNDEWA kwaapfila nikunoghela, nokulomba ughende na twetwe. Iwanu wano wasughu, lekeni utuleghusile nzambi tsetu, utubokele ka iwanagho mwenyegho."

10 Kuya IMNDEWA kamlongela Musa, "Sambi nakwika laghano ne iwanu wako wose. Nitsotenda pfinu pfikulu hambele hawo ng'ana pfitendighwe mna taifa lyolyose na mna isi yose. Iwanu wose imkala mghati mwawo watsakona sanga'ano tsangu ng'ulu. Kwaapfila nitsotenda chinu chikulu kuna mwemwe."

11 "Mkinde malaghitso ghangu ghanimwing'ani leloli. Nitsowawinga hambele henu Waamori, Wakanani, Wahiti, Waperesi, Wahivi na Wayebusi. 12 Mwalangitse mleke kutenda laghano ne iwanu wa isi yamuighendela, hela litsakuwa mtegho kuna mwemwe. 13 Ila mpfimwaghe pfibumbulika pfao pfa kutambikila, mtsibene ngutso tsawo tsa kutamanila, na pfinyagho pfao pfa Ashera."

14 "Mleke kutamanila mulungu yungi wowose, kwaapfila nene yanikemighwa Yane Chepfu nomwonela chepfu imunu iyotamanila mulungu yungi, 15 na mleke kwilaghana ne iwanu we isi'yo, mana hawatsoitamanila milungu yawo ya ughutsu na kuitambikila, watsomkemani namwe mtsakuja nambiko tsawo. 16 Iwanenu wang'awakwela iwali wawo, iwali'wo iwotamanila milungu wodaha kuwalongotsa iwanenu kuiwinza milungu yawo."

17 "Mleke kutenda milungu ya ughutsu ya chuma.

18 "Mtsotenda chihungo cha pfighate ipfilihela hamila. Kwa matsuwa saba mtsakuja pfighate ipfilihela hamila mna ghumwetsi ghwa Abihu ka pfanikulaghitse, mana ghumwetsi'ghwo ghwa Abihu baho hamlawile Misiri.

19 "Chila mwana mmale chaudele, ayo kakuya wangu, na iwana iwamale iwalongole kwelekighwa we iwanyama wenu, wose wa kwangu, wa ng'ombe na we wang'olo. 20 Imwana we punda iyalongole kwelekighwa kutsomkombola kwa kundapfila ng'olo. Ka ng'umkombola baye, umbene isingo. Iwana wenu wose wamale iwalongole kwelekighwa mtsowakombola.

"Na munu wowose yaleke kutsa kuna nene na ghamoko ghaliyeka.

21 "Matsuwa sita mtsosang'ana, lekeni litsuwa lya saba mtsobwihila, hata ka matsuwa gha kulima au gha kupfuna, mtsobwihila.

22 "Mtsotenda chihungo cha majuma, mwanduso wa ghamatsuwa gha kupfuna ngano, na mtsotenda chihungo cha kukunga pfinu ghumwaka haghutsigha.

23 "Mala ndatu chila mwaka iwamale wose watsetingana hambele hangu nene IMNDEWA, Imulungu wa Isiraeli. 24 Nitsotsiwinga isi tsingi hambele henu na kuyongetsa mibaka yenu. Kuduhu imunu wowose iyatsoibama isi yenu hamtingana kunitamanila nene IMNDEWA, Imulungu wenu mala ndatu chila ghumwaka.

25 "Mleke kundapfila nambiko na chighate ichighumighwe hamila, na inambiko ya Ipasaka ileke kusighala mbaka hamitondo.

26 "Pfinu pfa mwanduso pfa mighunda yenu mtsopfighala mng'anda mwangu nene IMNDEWA, Imulungu wenu.

"Uleke kumwambika mwana wa ng'olo au mwana we mene mna litombo lya wenye wake."

27 IMNDEWA kamlongela Musa, "Wandike mbuli aino, kwaapfila mna imbuli ino notenda laghano naghwe ne iwanu wa Isiraeli." 28 Musa tsakakala ne IMNDEWA ako kuchidunda matsuwa alubaini, chilo na misi, ng'ajile chijo wala kunwa matsi. Tsakandika mbuli tsose tsa laghano, ghamalaghitso ghala kumi.

29 Musa hayahulumke kuchidunda Sinai aku kana mabamba meli ghane mbuli tsa laghano mmwoko mwake, ng'amanyile baye ka uhanga wake tsaung'ali wong'ala kwaapfila tsayang'ali yolonga ne IMNDEWA. 30 Aruni ne iwanu wose wa Isiraeli hawamwonile Musa wapfuka kumseghelela, kwaapfila uhanga wake tsaung'ali umweluka mweluka ng'ani. 31 Lekeni Musa tsakamkema Aruni ne iwakulu wa kaye ya Isiraeli wamghendele, kuya kalonga nawo. 32 Hambele Waisiraeli wose watsa habehi yake, naye kaweng'a ghamalaghitso ghose ghayeng'ighwe ne Imulungu akula kuchidunda Sinai. 33 Musa hayamalitse kulonga nawo, kaghubika uhanga wake na chitambala ichilangala. 34 Lekeni Musa chila hayaghendile kulonga ne IMNDEWA mna Lihema lyo Kwitinganila, yang'ali yochilapfa ichitambala achila mbaka hayolawa kunze. Hayalawile kunze tsakawalongela Waisiraeli aghala ghose ghayalaghitswe, 35 nawo Waisiraeli wawona uhanga wake womweluka mweluka. Kuya Musa kaghubika keli uhanga wake ne chitambala mbaka hayaghendile kulonga ne Imulungu.