1 IMNDEWA kamlongela Musa, 2 "Nilapfile iwana wamale iwalongole ukwelekighwa. Kwaapfila chila mwana mmale chaudele wa Waisiraeli ayo wangu nene, na iwana we iwanyama iwalongole ukwelekighwa nawo wangu nene."

3 Musa kawalongela iwanu, "Mleke kulisemwa litsuwa lino lyamlawile mna isi ya Misiri ako kwamkalile watumwa. Litsuwa lino IMNDEWA tsakawalapfa amwo kwa ghumoko ghwake ghune ngupfu. Mne litsuwa lino, mleke ukuja ichighate chine ihamila. 4 Litsuwa lino lya mwetsi ghwa mwanduso, ighukemighwa Abibu, mtsolawa Misiri. 5 Imulungu hayatsomghaleni mna isi yawokala Wakanani, Wahiti, Waamori, Wahipfi, na Wayebusi, isi yawalongele iwabala wenu ka katsomwing'ani mwemwe, isi inoghile kwa ukufugha na ukulima, mdeng'elele chihungo chino chila ghumwaka mna ghumwetsi ghuno ghwa mwanduso. 6 Kwa matsuwa saba mtsakuja ipfighate ipfilihela ihamila. Mne litsuwa lya saba mtsotenda chihungo kwa kumtunya IMNDEWA. 7 Kwa ghamatsuwa agho saba mtsakuja ipfighate ipfilihela ihamila, wala ihamila ileke ukwoneka mna mwemwe na mna isi yose. 8 Litsuwa alyo muwalongele iwanenu ka mwotenda apfo kukumbuka chayawatendele IMNDEWA hamlawile mna isi ya Misiri. 9 Chihungo chino chitsowakumbusa na chakuwa ka chitango ichili mna ghamoko ghenu na mna pfihanga pfenu ili mkumbukeghe ghamalaghitso ghe Imulungu. Kwaapfila Imulungu tsakawalapfa mna isi ya Misiri kwa ghumoko ghwake ghune ngupfu. 10 Apfo mtsodeng'elela chihungo chino mna chipindi chake, chila ghumwaka.

11 "IMNDEWA katsowaghalani mna isi ya Kanaani, na katsomwing'eni isi ayo, ka pfayalaghane na mwemwe na iwabala wenu. 12 Mwobamighwa mumlapfile IMNDEWA chila imwana mmale iyolongola ukwoneka. Chila mwana mmale we iwanyama iyolongola koneka, awo wose we Imulungu. 13 Lekeni chila imwana we chihongwe iyalongole ukwelekighwa kutsomkombola kwa kumlapfila Imulungu imwana we ng'olo, ka ng'ubama baye kumkombola, mbobotole isingo yake yafe. Chila mwana mmale we iwanu iyolongola ukwoneka mghati mwenu mtsomkombola. 14 Ghamatsuwa ighakutsa, iwanenu wang'awaghutsa, Angu achino choni? Muwalongele, ‘Kwa ghumoko ghune ngupfu IMNDEWA katulapfa Misiri, isi yatukalile watumwa. 15 Farao kwa usughu wake tsakalema kutulekelela tuke, apfo IMNDEWA tsakamkoma chila imwana mmale iyalongole ukwoneka mna isi ya Misiri, chila imwana mmale we iwanu na chila imwana mmale we iwanyama. Apfo twetwe tutsomlapfila nambiko IMNDEWA chila imwana mmale we iwanyama wetu, lekeni iwanetu iwamale iwalongole ukwoneka tutsowakombola. 16 Chihendo chino chitsakuwa chitango mna ghamoko au mna pfihanga pfenu cha kuwakumbusa ka IMNDEWA tsakatulapfa mna isi ya Misiri kwa ghumoko ghune ngupfu.’"

17 Farao hayawalekile iwanu woke, Imulungu ng'awalongotse baye wabitile mna isi ya Wafilisti, hata ka tsaikala nzila ya habehi ya kupfika Kanaani. Kwaapfila Imulungu kalonga, "Wang'etingana ne iwanu na ukwitowa nawo, wodaha kughutuka woye Misiri." 18 Apfo Imulungu kawalongotsa nzila ya kutsunguluka kubitila kunyika, mmbalimbali mwe ibahari ya Shamu. Waisiraeli tsawagheluka kulawa Misiri aku wesafulula kwa ing'ondo.

19 Musa tsakasola mipate ila ya Yosefu, ka Yosefu pfayawalaghitse ahala ng'ana yafe. Tsakawalongela Waisiraeli, "Mwilahe ka Imulungu hayatsowatsilani kuwalapfa muisi mno, mtsoisola imipate yangu kulawa muisi mno."

20 Apfo Waisiraeli walawa Sukosi waghenda Etamu, kwaitsighile inyika, kuko watsenga ipfibumbulika wabwihila. 21 Nemisi IMNDEWA tsakawalongola kwa kuwekila ingutso ya liwingu kuwalangusa inzila. Nechilo kawalongola kwa kuwekila ingutso ya liwenge kuwamwemwesela inzila, ili wadahe kughenda chilo ne imisi. 22 Ngutso ila ya liwingu ng'ayukile baye nemisi hambele ha Waisiraeli, wala ila ya ghumoto ng'ayukile baye nechilo hambele ha Waisiraeli.