1 "Utengenetse sanduku kwa mbau ya mjoholo ili liwe hanu ha ukulakatsilila upfumba udusuke. 2 Ilisandu alyo liwe na membe nne, utali wake ulingane na ughatsi wake, chila ubali uwe na futi imwe na nusu, ne chimo chake chiwe futi ndatu. Tsimembe tse lisanduku tsilawilile kuchanya ka membe tse mnyama na tsiwe chinu chimwe na lisanduku alyo. 3 Lisanduku lyose kutsolikandika nzahabu iliyeka mchanya mwake na mlubapfu mwake na tsimembe tsake itsisomoke ka tse mnyama, kuya ulitsungulusile ukingo wa nzahabu. 4 Kuya ulitengenetsele bangili mbili tsa nzahabu na utsinanike ubali wa lweisi wa ukingo wake mna tsibanzi mbili itsilolesa, tsibangili atso tsitsakuwa tso kwingitsila imifumbati yo kulighalila. 5 Ne Imifumbati'yo iwe ya mbiki ghwa mjoholo na uikandike nzahabu. 6 Naghwe kutsolika lisanduku'lyo hanze he lipanzia lili habehi na lisanduku lya laghano, hambele ha ihanu he libatsi, hanu hala hanitsetingana naghwe. 7 Chila tsuwa nemitondo Aruni hayakwingila kupfika ghoya ipfitasa apfila, yalakatse upfumba iunung'ila ghoya mchanya mwe lisanduku. 8 Kuya katsodusula upfumba nemihe hayotuwa ipfitasa. Nambiko ino ya upfumba itsolapfighwa ghamatsuwa ghose ne pfeleko pfenu pfose hambele hangu nene IMNDEWA. 9 Mleke kupfukitsa upfumba ing'auhenzeluke mchanya mwake, wala kulapfa nambiko ya kulakatsighwa, wala nambiko ye chijo, wala kughuma nambiko ya chokunwa mchanya mwake. 10 Aruni katsolitendela lisanduku chihendo cho kulitenda litogholighwe mala lumwe chila mwaka kwa kubaka idamu ila ye mnyama iyalapfighwe yawe nambiko ya kuleghusila nzambi mchanya mwe tsimembe tse lisanduku, itsisomoke ka tse mnyama. Chihendo chino chitendighwe mala lumwe chila mwaka mna pfeleko pfenu pfose kwaapfila lisanduku'lyo lienzeluka ghendo kuna nene IMNDEWA."

11 IMNDEWA kamlongela Musa, 12 "Hautsowapeta Waisiraeli, chila munu yalihe sendi, ayo iwe ya kuukombola ughima wake, ili kuleke kuwa na utamu wihile mghati mwawo ahala hawotsopetighwa. 13 Achino chicho chawatsolapfa, chila munu yobita yapetighwe yalapfe nusu shekeli ka pfaili ishekeli itogholighwe hanu ihaenzeluke (Shekeli imwe gera ishilini), nusu shekeli iyo isadaka ye IMNDEWA. 14 Chila munu iyatsopetighwa, kulawa wane miyaka ishilini na kughendelela katsoniliha isendi'yo. 15 Matajili waleke kulapfa chikulu kubita nusu shekeli, wala iwahingwa waleke kulapfa chidogho kubita nusu shekeli, ahala hawotsoliha isendi kuukombola ughima wawo. 16 Naghwe utsibokele tsisendi'tso tso ukwilamulitsa ne Imulungu kulawa kwa Waisiraeli, utsike tsikasang'ane mna tsing'onde tsa lihema lyo kwitinganila, natso tsiwatende Waisiraeli wamkumbukeghe Imulungu, ka senditso tsilapfighwa ili yeye yaukombole ughima wawo."

17 Kuya IMNDEWA kamlongela Musa, 18 "Utengenetse bigha lya shaba lya kuhopfughila na chikalilo chake chiwe cha shaba, ulike haghati ha lihema lya kwitinganila ne lisanduku, kuya wike matsi mghati mwake. 19 Aruni ne iwanaghe watsotumila ghamatsi'gho kuhopfugha ghamoko na ghamaghulu ghawo. 20 Watende'pfo ili waleke kukomighwa ahala hawatsakwingila mna lihema lya kwitinganila, na ahala hawatsosoghela habehi ne lisanduku ili kundapfila nambiko nene IMNDEWA, nambiko itsilapfighwa kwa ghumoto. 21 Watsohopfugha ghamoko na ghamaghulu ghawo ili waleke kufa. Alino litsakuwa laghitso kuna wawo ghamatsuwa ghose, kulawa Aruni na iwanaghe, mweleko mbaka mweleko."

22 Kuya IMNDEWA kamlongela Musa, 23 "Kutsosola pfilungo pfinoghile ghendo, mafuta gha manemane mbisi kilo sita, mdalasini kilo ndatu, usaghe wa midete iunung'ila ghoya kilo ndatu, 24 na mdalasini ungi ighukemighwa kida kilo sita, pfipimo apfo pfose pfighende na pfipimo pfa ihanu haenzeluke, na makimbo mane gha mafuta gha nzeituni. 25 Kwa pfilungo'pfo kutsotengenetsa ghamafuta ighahenzeluke, ughahanganye ka pfayotenda mtengenetsa ipfinu ipfinung'ila, agho ghatsakuwa ghamafuta ghaenzeluke gho kubaka. 26 Kwa ghamafuta agho ulibake lihema lyo kwitinganila, na lisanduku lya laghano, 27 imetsa na ipfinu pfake, chighutso che pfitasa na pfinu pfake, lisanduku lyo kudusulila upfumba, 28 pfipfila ulibake lisanduku lyo kulapfila nambiko tso kulakatsighwa ne pfinu pfake pfose, libigha ne chikalilo chake. 29 Apfo komwikila Imulungu ipfinu'pfo na kupfitenda pfienzeluke ghendo. Na chinu chochose ichitsodonza ipfinu'pfo chitsakuwa chienzeluka. 30 Kuya mbake ghamafuta Aruni ne iwanaghe, na kuwahimika ili wanisang'anile ka watambika. 31 Walongele Waisiraeli, ‘Aghano ghatsakuwa ghamafuta ghangu ghaenzeluke gha kubaka mna pfeleko pfenu pfose. 32 Ghamafuta aghano mleke kumghela munu yungi iyali si mtambika baye, kuya mleke kutengenetsa mafuta ghangi ghane pfilungo ka aghano, ghamafuta aghano ghaenzeluka na ghobamighwa ghawe maenzeluka kuna mwemwe matsuwa ghose. 33 Munu wowose iyatsotengenetsa mafuta ghane pfilungo ka aghano, au imunu wowose yatsomghela imunu mhenza ghamafuta aghano, imunu'yo nitsomlema yaleke kuwa munu wangu.’"

34 Kuya IMNDEWA kamlongela Musa, "Usole ghamanukato ghanoghile, utomvu wa natafi, utomvu wa shekeleti, utomvu wa kelibena, na ubani unoghile, ipfinu'pfo pfose pfiwe pfa chipimo chimwe, 35 naghwe utengenetse upfumba we pfinu'pfo, ka pfautengenetsighwa ne imunu yotengenetsa ipfinu ipfinung'ila ghoya, ughelighwe munyu ili unoghe na uwe mwenzeluka. 36 Kuya usole ipfinu'pfo chidogho upfisaghe pfitighinike, na udeghe chidogho usaghe'wo uwike hambele he sanduku lya laghano mghati mwa lihema lya kwitinganila, ahala hanitsetingana naghwe. Awo utsakuwa upfumba wenzeluke ghendo kuna mwemwe. 37 Namwe mleke kwitengenetsela upfumba une pfilungo ka auno, kwaapfila upfumba uno utsakuwa wenzeluka kuna mwemwe hambele hangu nene IMNDEWA. 38 Imunu wowose iyatsotengenetsa upfumba ka auno, ili unung'ile ghoya, imunu'yo nitsomlema yaleke kuwa munu wangu."