1 Litsuwa lya mwanduso lya ghumwetsi ghwa kadatu kulawa hawalawile Misiri, Waisiraeli wapfika hane inyika ya Sinai. 2 Hawokile Refidimu na kupfika inyika ya Sinai, wakala habehi na chidunda Sinai. 3 Kuya Musa kagheluka mna chidunda kulonga ne Imulungu.

Imulungu kamkema Musa kulawa mchidunda, kamlongela, "Uwalongele pfino iwana wa Yakobu, awo Waisiraeli. 4 ‘Mwemwe muwenyegho tsamwona pfaniwatendele Wamisiri na pfanimsoleni ka chimanga pfayowasolagha iwanaghe kwa mapamanilo, tsaniwaghala hano kuna nene. 5 Lelo mng'anitegheletsa ghendo na kukindisa laghano lyangu, mwemwe mtsakuwa iwanu wangu. Iwanu wose iwali muisi wakwangu. Lekeni mwemwe nimsaghulani mghati mwa tsiisi tsose, 6 mwemwe kuna nene mtsakuwa undewa wa iwalapfa nambiko, na kabila ilihenzeluke.’ Uwalongele pfino Waisiraeli." 7 Apfo Musa koya, kawakema hamwe iwabala wa Waisiraeli, kawalongela chayalaghitsighwe ne IMNDEWA. 8 Kuya Waisiraeli wose wedikila lumwe walonga, "Pfinu pfose pfayalongile IMNDEWA tutsopfitenda." Naye Musa kamlongela IMNDEWA chinu acho.

9 IMNDEWA kamlongela Musa, "Nitsokutsila mna liwingu tito ili hanilonga naghwe Waisiraeli wanihulike, na kukutoghola ghamatsuwa ghose."

Musa kamlongela Imulungu Waisiraeli pfawedike. 10 IMNDEWA kamlongela Musa, "Ghenda kuna iwanu wano uwadeghetse leloli na ilupfi, Walongele waghatsupfe maghwanda ghawo 11 kuya ikacha wawe tiyali, kwaapfila nene IMNDEWA nitsohulumka mna chidunda cha Sinai, na iwanu wose watsombona. 12 Kuya ghweghwe uwekile iwanu ghumbaka kutsunguluka chidunda. Uwalongele iwanu walangitse waleke kudina mchidunda wala kughughusa ghumbaka ghwake. Imunu wowose iyatsochighusa chidunda acho katsokomighwa. 13 Imunu wowose yaleke kumdonza imunu yula yalokile ghumbaka, ayo katsokomighwa kwa kutowighwa ghamabwe au kwa mghowa, yawe imunu au mnyama, ng'atsolekelighwa yawe mghima. Lekeni imalati haitsoghendelela kulila, iwanu wose watsakutsa habehi ne chidunda."

14 Musa kahulumka mchidunda kawalongela iwanu, kawadeghesa iwanu, nawo watsapfa ghamaghwanda ghawo. 15 Kuya kawalongela iwanu wose, "Mwiyandae kwa litsuwa lya ikacha, mmale wowose aleke kuwasa ne pinga." 16 Litsuwa lya kadatu halipfikile, nemitondo tsakulawila mdumo mchidunda, na ghumwanga na liwingu tito, na litsi kulu lya malati iliwatendile iwanu wose iwali mkambi wadedeme kwa ukupfuka. 17 Kuya Musa kawalongotsa iwanu wose kulawa kune pfibumbulika pfawo waketingane ne Imulungu. Wose waghenda, no ukwima hasi mwe chidunda. 18 Chidunda cha Sinai tsachighubikighwa na lihosi kwaapfila IMNDEWA tsakahulumka mchanya mwake kwa ghumoto. Lihosi lya ghumoto aghwo tsalighenda kuchanya ka hosi lya tanuri kulu, chidunda chose tsachidedema kwa ngupfu. 19 Litsi lya malati lyongetseka, Musa kalonga ne Imulungu. Naye Imulungu kamwidika kwa ukuduma. 20 IMNDEWA tsakahulumka mchidando mwe chidunda cha Sinai, kamkema Musa aghende mchidando, naye Musa kagheluka mchidando. 21 Kuya Imulungu kamlongela Musa, "Hulumka ukawalongele iwanu waleke kutsa kundola, hela wanu wengi mna wawo watsakufa. 22 Hata iwalapfa nambiko iwakutsa habehi na nene, wobamighwa wedeghese, hela nitsowatowa." 23 Musa kamlongela IMNDEWA, "Iwanu wano ng'awodaha baye kugheluka kuchidunda Sinai kwaapfila ghweghwe ghumwenyegho tsakutulaghitsa tughupfuke, twike ghumbaka kutsunguluka chidunda."

24 IMNDEWA Imulungu kamlongela, "Hulumka hasi, kuya uye na Aruni. Lekeni uwaghome walapfa nambiko ne iwanu wangi waleke kuloka ghumbaka kutsa kuna nene, hela nitsowatowa." 25 Apfo Musa kawahulumkila iwanu awo, kawalongela ghose ghayalaghitsighwe.