1 "Naghwe Musa umsole ndughu yako Aruni ne iwanaghe, Nadabu, Abihu, Elietsari na Isamari, kulawa mna Waisiraeli watse habehi naghwe, ili wanitumikile ka watambika. 2 Umdadatsile ndughu yako Aruni maghwanda ghaenzeluke gha ukumtenda yawe na ukulu na yanoghe. 3 Naghwe uwalongele iwanu wose iwakubuhu mna ukudadatsa, awala yaniweng'ile tsimbutsi tso kumanya, wamdadatsile Aruni maghwanda gho kumuhimika ili yanisang'anile ka mtambika. 4 Walongele wamdadatsile ipfinu pfino, chikoba che mmambagha, chisibau, kanzu, joho ilihambighwe, chilemba na msipi. Watsowatengenetsela maghwanda maenzeluke ndughu yako Aruni ne iwanaghe ili wanitumikile ka watambika. 5 Nawo watsosola ipfitambala pfa langi ya nzahabu, buluu, nzambalau, ndung'u, na maghwanda matselu ighanoghile.

6 "Wafume chitsibau kwa chitambala chitselu chinoghile, na weke unzolingo kwa nyutsi tsa langi ya nzahabu, ya buluu, nzambalau, ndung'u. Ifumighwe kwa sang'ano ye fundi iyakubuhu. 7 Chiwe na pfihande pfibili pfa mmayegha, pfitsolumbitsighwa kwa tsili tsimembe tse pfihande'pfo. 8 Na ghumsipi gho kohela ghufumighwe ghoya kwa ichitambala chicho, kwa tsinyutsi tsitso tsa langi ya nzahabu, ya buluu, nzambalau, na ndung'u, ghumsipi'gho ghufumighwe ghuwe chinu chimwe ne chitsibau. 9 Kuya usole mabwe meli gha sadoniki, agho ughandike kwa kukwangula ghamataghwa kumi na meli gha iwana wa Isiraeli, 10 mataghwa sita mna libwe limwe, na mataghwa sita ghangi mna libwe lingi, ka pfawelekighwe. 11 Ka sonara iyakubuhu pfayakwandika ghumuhuri kwa kukwangula, ughandike pfipfo ghamataghwa gha wana wa Isiraeli mna ghamabwe agho meli. Kuya ugheke ghamabwe agho mna pfinanikilo pfa nyutsi tse nzahabu. 12 Naghwe ugheke ghamabwe'gho meli mchanya mwe pfihande pfibili pfa mmayegha pfa chitsibau'cho, agho ghawe ukumbuso kwa wana wa Isiraeli. Aruni yagheleke ghamataghwa agho mmayegha mwake ka ukumbuso hambele he IMNDEWA. 13 Naghwe wike pfinanikilo pfibili pfa nzahabu, 14 na mikufu mibili ya nzahabu iliyeka iifoghosighwe ka lutsabi. Uyohe mikufu'yo kune ipfinanikilo'pfo.

15 "Utengenetse chikoba cha mmambagha cho kulamlila, ichifumighwe ghoya ka pfipfila pfachifumighwe ichitsibau, kwa chitambala chitselu chinoghile, ichikighwe unzolingo kwa nyutsi tse nzahabu, tse buluu, tse nzambalau na tsindung'u. 16 Chiwe cha membe nne, nacho chikunjighwe, utali wake na ughatsi wake pfilingane, chila ubali uwe na utali wa nchi tisa. 17 Chihambighwe kwa milia minne ya ghamabwe gha bei ng'ulu, mna mlia ghwa mwanduso wike ghamabwe gha akiki, topasi na alimasi ndung'u, 18 mna mlia ghwa kabili wike ghamabwe gha tumaridi, yakuti samawi na alimasi, 19 mna mlia ghwa kadatu wike ghamabwe gha yasinto, akiki ndung'u na ametisto, 20 na mna mlia ghwa kane wike ghamabwe gha tsabarajadi, shohamu, na yasipi. Ghamabwe agho ghekighwe mna pfindikilo pfa nzahabu. 21 Kutsakuwa na mabwe kumi na meli, chila libwe lyandikighwe taghwa limwe lya mwana yumwe wa Isiraeli, chila taghwa lyandikighwe kwa kukwangulighwa ka muhuli, ka pfaghali ghamakabila kumi na meli. 22 Utengenetse mikufu ya nzahabu iliyeka iifoghosighwe ka mitsabi, ayo iwe ya kohela chikoba cha mmambagha. 23 Kuya uchitengenetsele ichikoba acho bangili mbili tsa nzahabu na utsike kune tsimembe mbili tse ichikoba acho. 24 Kuya uike mikufu'yo ye nzahabu mna tsibangili'tso mbili hane tsimembe tse ichikoba cha mmambagha. 25 Na tsimembe tsingi itsikalile tsa mikufu'yo mili utsike mna pfindikilo pfila pfibili, kuya upfike mna pfihande pfila pfibili pfa mmayegha pfe chisibau ubali wa hambele. 26 Kuya utengenetse bangili mbili tsa nzahabu, utsike mna tsimembe mbili tsa ubali wa mghati we chikoba cha mmambagha, habehi ne ichisibau. 27 Kuya utengenetse bangili tsingi mbili tse nzahabu utsike hambele mna tsimembe tsa hasi tsa pfihande pfa chisibau, hanu hapfilunga chisibau na msipi ighufoghosighwe ghoya. 28 Ichikoba cha mmambagha chohighwe kune chitsibau kwa kukindilisa tsibangili tsake na chisibau kwa lutsabi lwa buluu, ili ichikoba'cho cha mmambagha chiwasile ghumsipi ghula ighufoghosighwe ghoya na chileke kuleghela mna ichisibau.

29 "Apfo Aruni hayakwingila Ihanu Haenzeluke, katsopfala ichikoba chila cho kulamlila mmambagha ichandikighwe ghamataghwa gha makabila gha iwana wa Isiraeli, kwa kutenda apfo, nene IMNDEWA nitsowakumbuka iwanu wangu ghamatsuwa ghose. 30 Mne chikoba cha mmambagha cho kulamlila wike ghamabwe ighokemighwa Urimu na Thumimu, agho ghatsokala mchanya mwe ghumoyo ghwa Aruni ahala hayakwingila hambele hangu nene IMNDEWA, na Aruni katsobapa ghamalamlitsi ghe iwana wa Isiraeli mna ghumoyo ghwake hambele hangu.

31 "Naghwe ufume joho ilighubikighwa ne ichisibau halipfalighwa kwa nyutsi tsa buluu tsiliyeka. 32 Nalyo litsakuwa na tobo haghatighati hake ho kwingitsila litwi, litobo lyake litsotsungulusighwa mindo iifumighwe ghoya, ili ileke kudegheka. 33 Kune mindo yake ya hasi, ulihambe kwa makomamanga gha nyutsi tsa langi ya buluu, nzambalau, na ndung'u, na mbughi tsa nzahabu haghatighati ha makomamanga'gho, 34 mbughi ya nzahabu na komamanga, mbughi ya nzahabu na komamanga, mna mindo yose. 35 Aruni katsopfala lijoho'lyo ahala hayosang'ana ing'onde yake yo kulapfa nambiko, na litsi lye tsimbughi'tso litsohulikighwa ahala hayatsakwingila Hanu Haenzeluke hambele hangu, na ahala hayatsolawa, ili yaleke ukukomighwa.

36 "Utengenetse chibamba cha nzahabu iliyeka na uchandike kwa kukwangula mchanya mwake ka imunu pfayakwandika ghumuhuli, wandike pfino: ‘ILAPFIGHWA KWE IMTWATSA IMULUNGU.’ 37 Naghwe uchohe ichibamba'cho mchanya mwe chilemba kwa msipi ghwa langi ya buluu, nacho chitsokala hambele mna chilemba. 38 Ichibamba'cho chitsakuwa mchanya mwe chihanga cha Aruni, naye Aruni katsobapa ghamatotso gha ipfinu pfienzeluke pfawonilapfila iwanu Waisiraeli ka nzawadi tsao tsienzeluke. Ichibamba'cho chitsokalagha mchihanga mwake, ili watogholighwe hambele he Imfalume. 39 Na ikanzu uifume kwa maghwanda matselu ghanoghile, na ufume chilemba che nguo ye maghwanda matselu ghanoghile, naghwe ufume msipi kwa sang'ano ye fundi wa kudalitsi.

40 "Iwana wa Aruni uwafumile makanzu, misipi, na kofiya, utsitengenetse ili hawotsipfala woneke wanogha na wana utunitso. 41 Uwapfatse ndughu yako Aruni ne iwanaghe ghamaghwanda agho, kuya uwaghele mafuta na uwahimike kwe sang'ano yenzeluke ili wanitumikile ka watambika. 42 Watendele kaputula tsa maghwanda matselu ghanoghile itsitsowaghubika kulawila mchuno mbaka mna ghamafindi, waghubike ng'uli tsawo. 43 Aruni ne iwanaghe watsopfala tsikaputula atso chila hawakwingila mna lihema lya kwitinganila, au hawakutsa habehi na lisanduku lyo kulakatsila tsinambiko, wasang'ane ng'onde mghati mwe Kaye Ihenzeluke. Kwa kutenda apfo ng'awatsokala chidako, ili waleke kukomighwa. Alino litsakuwa laghitso lya ghamatsuwa ghose kwa Aruni ne mweleko ghwake.