1 Tsakatengenetsa sanduku lya kulapfila nambiko ya kulakatsighwa. Lisanduku'lyo tsalikala lya mlaba, futi saba na nusu kwa futi saba na nusu, chimo chake futi nne nusu. 2 Tsakatengenetsa membe itsisomoke ka tse mnyama, ili membe na lisanduku'lyo pfiwe chinu chimwe, kuya lisanduku'lyo tsawalikandika shaba. 3 Tsakatengenetsa na pfinu pfose pfa lisanduku, pfiha, mibato, mabeseni, makoleo na pfihali pfa kuhalila ghumoto. Pfinu apfo pfose tsawapfitengenetsa kwa shaba. 4 Tsakatengenetsa wapfu wa shaba, kaughela hasi mwe kingamitsi ya lisanduku mbaka haghati ha lisanduku. 5 Mne membe nne tsakatengenetsa bangili nne tso kwingitsila mifumbati. 6 Tsakatengenetsa mifumbati ya mjoholo na kuikandika shaba. 7 Tsakaika mifumbati ila mna bangili tsila itsikalile mlubapfu mwe lisanduku, yo kulighalila. Lisanduku'lyo ilitengenetsighwe kwa mibani tsalikala na mpfungu mghati.

8 Kuya tsakatengenetsa bigha lya shaba na kalilo lyake lya shaba. Libigha alyo tsalitengenetsighwa kwe pfiyoo pfa shaba pfe ukwilolela ipfilapfighwe ne iwapinga iwang'ali wosang'ana hane ghumlango ghwa Lihema lyo Kwitinganila.

9 Kuya tsakatsenga luwa ilitsunguluka Lihema lya Kwitinganila. Ubali wa kusini we luwa tsauna mapanzia matselu ighanoghile ghane utali wa futi miya na hamsini, 10 nagho tsaghakindighwa na ngutso ishilini tsa shaba, tsine pfikalilo ishilini pfa shaba. Lekeni pfinanikilo pfa ngutso'tso na tsifito tsake tsapfikala pfa fetsa. 11 Ubali wa kasikazini nawo pfipfila tsauna mapanzia ghane utali wa futi miya na hamsini, na ngutso tsake ishilini tsa shaba, lekeni pfinanikilo pfa tsingutso'tso na tsifito tsake tsa pfa fetsa. 12 Ubali wa maghalibi tsauna mapanzia ghane utali wa futi sabini na tano, tsingutso tsake kumi na pfikalilo pfake kumi. Pfinanikilo pfa tsingutso na tsifito tsake tsa pfa fetsa. 13 Ubali wa mashaliki kune ghumlango, tsauna ughatsi wa futi sabini na tano. 14 Mapanzia gha chila ubali we ghumlango tsaghana utali wa futi ishilini na mbili na nusu, hamwe na tsingutso tsake ndatu na pfikalilo pfake pfidatu. 15 Pfipfila na ubali uyaghe, chila ubali wa ghumlango tsauna mapanzia ghane ughatsi wa futi ishilini na mbli na nusu, hamwe ne tsingutso tsake ndatu na pfikalilo pfake pfidatu. 16 Mapanzia ghose kutsunguluka iluwa tsaghatengenetsighwa kwa chitambala chitselu ichinoghile. 17 Pfikalilo pfose pfa tsingutso tsa pfa shaba, lekeni ipfinanikilo pfa tsingutso'tso na tsifito tsake tsa pfa fetsa. Kusa kwa tsingutso'tso tsa kukandikighwa fetsa na tsikindilisighwa kwa fito tsa fetsa.

18 Panzia lya ghumlango ghwa iluwa tsalitengenetsighwa chitambala chitselu chinoghile, na kughelighwa unzolingo kwa nyutsi tsa langi ya buluu, nzambalau, na ndung'u, nalyo tsalina utali wa futi salasini na chimo chake futi saba na nusu ka pfaghali mapanzia gha luwa. 19 Pfipfila tsingutso tsake tsatsikala nne na pfikalilo pfake pfinne pfose pfa shaba. Pfinanikilo pfake pfose pfa fetsa, na kusa kwa tsingutso kukandikighwa fetsa, na tsifito tsake tsatsikala tsa fetsa. 20 Na ipfighingi pfose pfa Lihema na pfe luwa kutsunguluka Lihema lyose tsa pfa shaba.

21 Apfino pfipfo ipfinu ipfitumike kutsengela Lihema Lienzeluke, amwo hawaghekile ghamabamba ghe ghamabwe ighandikighwe Ghamalaghitso, ka pfapfipetighwe ne Walawi kwa laghitso lya Musa, kwa ulongotsi wa Isamari mwana wa mtambika Aruni. 22 Besaleli mwana wa Uri, ayo Uri aba wake tsa Huri, wa lukolo lwa Yuda, tsakatenda chila chinu IMNDEWA chayamlaghitse Musa. 23 Hamwe naye tsakakala Oholiabu mwa Ahisamaki, wa lukolo lwa Dani, imunu iyakubuhu mna ukwandika kwa ukukwangula, na iyakubuhu mna na ukwika uonzolingo kwa nyutsi tsa langi ya buluu, nzambalau na ndung'u mna chitambala chitselu chinoghile. 24 Nzahabu yose iwamlapfile Imulungu kwa kutsengela ikaye ihenzeluke tsa kilo miya nane sabini na saba na glamu miya ndatu kwa kulola pfipimo ipfili mna ikaye iyenzeluke.

25 Ifetsa iwalapfile iwanu iwapetighwe, tsaikala kilo elufu ndatu miya nne na ishilini, kwa kulola pfipimo ipfili mna ikaye ienzeluke. 26 Chila munu iyapetighwe kulawa iyane miyaka ishilini na kughendelela tsakalapfa fetsa glamu tano ka pfaipangighwe, na iwamale wose iwapetighwe tsawakala, laki sita elufu ndatu miya tano na hamsini. 27 Kilo elufu ndatu tsa fetsa tsatsitumika kutengenetsela pfikalilo pfila miya imwe pfa ikaye ienzeluke na patsiya lila, kilo salasini kwa chila chikalilo. 28 Chila kilo kumi na saba na glamu sabini na tano itsisighale, tsatsitumika kutengenetsela ipfinanikilo pfa tsingutso na kutsikandika fetsa kusa kwa tsingutso na kutengenetsela tsifito.

29 Shaba iighalighwe kwe IMNDEWA na Waisiraeli tsaikala kilo elufu mbili miya nne na sita. 30 Besaleli tsakatumila shaba ayo kutengenetsela pfikalilo pfa ghumlango ghwa Lihema lya Kwitinganila, sanduku lyo kakatsila tsinambiko, hamwe ne wapfu wake wa shaba na pfinu pfose pfa lisanduku. 31 Pfikalilo pfa luwa ilutsunguluke lihema lya kwitinganila na pfa ghumlango ghwa luwa, na pfighingi pfose pfa Lihema Lienzeluke na pfe luwa.