1 Baho Musa na Waisiraeli wamwimbila IMNDEWA wila uno,

"Nitsomwimbila IMNDEWA kwaapfila kahuma kwa kutunyighwa ghendo,

kawasa mwibahari iwafarasi ne imdina farasi wake.

2 Imulungu yuyo yangaile nene ingupfu na nene nomwimbila yeye,

yeye imwenyegho yuyo yang'ombole.

Yeye ka Imulungu wangu nitsomtunya,

Imulungu wa aba wangu, na nene nitsomtunya,

3 Imulungu ka imunu wa ng'onde, taghwa lyake IMNDEWA."

4 "Mituka ya Farao na maasikali wake kawasa mwibahari, iwatawala wayaghe yawakundile watsama mna ibahali ya Shamu.

5 Ghamatsi mengi ghawaghubika,

tsawatsama mna pfina pfighendese ka libwe."

6 "Ghwee Imulungu, ghumoko ghwako ghwa kujilo ghuna ngupfu ya ukukangawatsa,

kwa ghumoko ghwako ghugho kuwahondahonda Wamisiri.

7 Kwa uwetso wako mkulu ghweghwe kowalaghatsa awala iwokuhila,

koilekelela imaya yako, nayo yowalakatsa ka mabiwi.

8 Kwa muhe wako,

ghamatsi tsaghelundika hamwe,

ghamatsi tsa ghema wima ka lubanda,

ghamatsi ighali mna pfina pfighendese hasi mwe ibahari tsaghaghanda."

9 Ayula iyotuhila tsakalonga, "Nowakoleletsa niwaghoghe,

nitsoghola pfinu pfawo,

nisole pfanibama,

nitsosomola limaghe lyangu,

ghumoko ghwangu ghutsowakoma."

10 Kwa kuhumula kwako mala lumwe, ghwee Imulungu, kulitenda libeho lidume, nayo ibahari iwaghubika,

watsama ka ichuma mna ghamatsi mengi.

11 "Ghwee Imulungu, angu mna milungu, yuhi iyeghala naghwe?

Yuhi iyali ka ghweghwe, yuli mwenzeluka mkulu?

Yuhi iyodaha kutenda pfihulo pfikulu

na ghamatendo makulu ka ghweghwe?

12 Tsakugholosa ghumoko ghwako ghwa kujilo ghune ingupfu,

nayo isi iwametsa iwotuhila.

13 Kwa uluso wako mkulu tsakuwalongotsa iwanu wako yauwakombole,

kwa ngupfu tsako kuwalongotsa kune isi yako ihenzeluke.

14 Iwanu wa isi tsingi wahulika, nawo wodedema kwa kupfuka,

Wafilisti wengilighwa na wogha.

15 Iwakulu wa Edomu wengilighwa na wogha mkulu.

Pfilongotsi wa Moabu waghudema,

iwanu wose wa Kanaani watenyuka.

16 Wengilighwa na wogha na wapfuka.

Kwa ukulu wa ngupfu tsako,

wawo wenyamala tulu ka libwe,

mbaka iwanu wako ghwee IMNDEWA wabite,

mbaka iwanu awo yuwakombole wapfose.

17 Ghweghwe kutsowaghala iwanu wako na kuweka wakale mchidunda,

hanu yuhasaghule hawe hakaye hako ghwee IMNDEWA,

hanu haenzeluke uhatsengile kwa ghamoko ghako ghwe IMNDEWA.

18 Ghwee IMNDEWA kutsakuwa mfalume ghamatsuwa ghose."

19 Waisiraeli wapfosa hanu hasakale mna ibahari, lekeni Wamisiri hawalutile hanu hasakale mna ibahari ne mituka yawo na iwafalasi wawo na iwadina iwafarasi wawo, IMNDEWA tsakaghoitsa keli ghamatsi gha ibahari, nagho ghawaghubika.

20 Nabii Mariamu, lumbu wake Aruni, tsakasola chigoma chake mmoko, na iwapinga wose wamuwinza aku wotowa pfigoma pfawo na kupfina. 21 Mariamu kawalongotsa wayaghe ukwimba, kemba,

"Nitsomwimbila IMNDEWA kwaapfila kahuma kwa kutunyighwa ghendo,

ifarasi ne imdina farasi wake kawasa mwibahari."

22 Kuya Musa kawalongotsa Waisiraeli kulawa mna ibahari ya Shamu, nawo waghende mbaka mna inyika ya Shuri. Tsawaghenda mna inyika ayo kwa ghamatsuwa madatu bila kona ghamatsi. 23 Hawapfikile hanu hakemighwe Mala, ng'awadahile baye kunwa ghamatsi gha hanu aho kwaapfila ghang'ali ghosungu. Hanu aho tsahakemighwa Mala kwaapfila ghamatsi ghake ghosungu 24 Apfo iwanu wose wamnung'unikila Musa, walonga, "Tutsakunwa choni lelo?" 25 Musa kamlilila IMNDEWA, naye Imulungu kamlangusa chibiki, Musa kachasa chibiki acho mmatsi, baho ghamatsi ghanogha.

Kuko Imulungu kaweng'a Waisiraeli malaghitso ghawalongotse pfawatsokala. Kuya tsakawaghetsa, ili yamanye ka wodaha kumtegheletsa, 26 kawalongela, "Mng'anihulikitsa pfinoghile nene IMNDEWA, Imulungu wenu hanilonga, na kutenda aghala ghanighona nene ghanogha, na kutegheletsa pfinoghile aghala ghose ghaniwalaghitsa, nene sitsomghalilani matamu ghala ghaniwaghalile Wamisiri. Kwaapfila nene yuyo IMNDEWA yanimhonetsani mwemwe."

27 Kuya Waisiraeli wapfika Elimu, hakukalile na tsimbwibwi kumi na mbili ne imitende sabini. Nawo tsawakala baho habehi ne ghamatsi.