1 Kuya IMNDEWA kamlongela Musa, 2 "Uwalongele iwanu woye kuchughu, watsenge pfimbulika wabwihile hambele he Pihahilosi, haghatighati ha Migidoli na ibahari ya Shamu, hambele ha Baalisefoni. Mtsokala baho habehi na ibahari. 3 Kwaapfila Farao katsepfikitsa, ‘Waisiraeli wakwangakwanga kuno na kuno, inyika iwadiwa waleke kulawa.’ 4 Kuya nene nitsomtenda Farao yawe msughu, naye katsomuwinzani. Na nene nitsotunyighwa kwa kumkoma Farao na maasikali wake. Baho Wamisiri watsomanya ka nene yuyo IMNDEWA." Apfo Waisiraeli watenda pfipfo.

5 Imfalume wa Misiri hayahulike ka Waisiraeli watsuma, Farao ne iwatawala wayaghe waghalusa ghamawatso ghawo, walonga, "Angu choni chino chatutendile? Tuwaleka Waisiraeli woke waleke kutusang'anila keli!" 6 Imfalume kasola mtuka ghwake ghwe ing'ondo ighukweghighwa ne iwafalasi, ne iwamasikali wake. 7 Tsakasola mituka yake ye ng'ondo inoghile ghendo miya sita na kasola mituka ingi ya Misiri ye ing'ondo, tsailongotsighwa ne iwakulu wa maasikali. 8 IMNDEWA kamtenda Farao yawe msughu, naye kawakoleletsa Waisiraeli iwokile aku wodeng'elela. 9 Wamisiri na farasi wawo wose, mituka ya farasi ye ng'ondo na iwadina farasi wawo wawawinza Waisiraeli, wawapfika baho hawatsengile pfibumbulika mmbalimbali mwe ibahari, habehi na Pihahirosi, hambele ha Baalisefoni. 10 Farao hayapfikile habehi, Waisiraeli wawona Wamisiri wakutsa kuchughu kwawo, tsawapfuka ghendo, wamlilila Imulungu. 11 Wamlongela Musa, "Pfii Misiri tsahaduhu hanu ha ukutsikila mbaka utughale tufile kuno kunyika? Angu ebali ututendile tulawe Misiri? 12 Pfii ng'atukulongele baye hatung'ali mna isi ya Misiri? Tsatukulongela utuleke tughendelele kuwasang'anila Wamisiri. Tsapfinogha kuwasang'anila Wamisiri kubita kufila akuno kunyika."

13 Musa kawedika, "Mleke kupfuka! Mwime ghoya! Lelo mtsakona IMNDEWA pfayatsomkombolani. Wamisiri wano wamuwona leloli, ng'amtsowona keli baye. 14 IMNDEWA katsetowa nawo, mwemwe mwinyamale." 15 Kuya IMNDEWA kamlongela Musa, "Ebali mwonililila? Uwalongele Waisiraeli waghendelele na ghumwanza. 16 Winule ng'weku yako uigholose mchanya mwe ibahari. Ghamatsi ghatseghola, Waisiraeli watsodaha kuloka mna ibahari hanu hasakale. 17 Nene nitsowatenda Wamisiri wawe wasughu, nawo watsomuwinzani mghati mwe ibahari, na nene nitsotunyighwa kwa kumkoma Farao na maasikali wake, mituka yake ye ing'ondo na iwadina farasi wake. 18 Na nitsotunyighwa kwa kumkoma Farao na maasikali wake, ne mituka yake ye ing'ondo na iwadina farasi wake, nawo watsomanya ka nene yuyo IMNDEWA."

19 Kuya malaika we Imulungu iyakalile hambele ha Waisiraeli, kalawa katsa kukala kuchughu kwawo. Na ngutso ila ye liwingu pfipfila ilawa hambele yawo ima kuchughu kwawo, 20 tsaikala haghatighati ha Waisiraeli na Wamisiri. Wingu liwaghela chisi Wamisiri, lekeni liwalangatsila Waisiraeli nechilo, apfo maasikali wa Farao ng'awadahile baye kupfika habehi na Waisiraeli chilo chose.

21 Musa kagholosa ghumoko ghwake mchanya mwe ibahari, naye IMNDEWA kaitenda ibahari yuye kuchughu kwa libeho kulu lilawile ubali wa mashaliki, libeho alyo liduma chilo chose, liighola ibahari, nayo ibahari iwa isi isakale. 22 Waisiraeli wabita haghatighati hanu he ibahari hanu hasakale ghendo, ghamatsi tsaghema ka imibanda ikalile ubali wao wa kujilo na wa kumoso. 23 Wamisiri wawawinza kwa kubita haghatighati he ibahari hanu hasakale, wengila na wafarasi wawo, mituka yawo, na wadina farasi wawo wose. 24 Lupfilipfili IMNDEWA tsakawalola Wamisiri kubitila ingutso ila ya liwenge na ngutso ila ya liwingu, kuya kawatenda wapfuke ng'ani. 25 Tsakaghatenda magadi ghe imituka yawo ghakwame, imituka yawo ighende lughalugha. Wamisiri walonga, "Tutsume tukale kutali na Waisiraeli. IMNDEWA kowapfila kututowa twetwe."

26 Kuya IMNDEWA kamlongela Musa, "Gholosa ghumoko ghwako mchanya mwe ibahari, ghamatsi ghoye keli, ghawaghubike Wamisiri, na mituka yawo na iwadina farasi wawo." 27 Apfo Musa kagholosa ghumoko ghwake mchanya mwe ibahari. Hakuchile ibahari yuya ka pfaikalagha, Wamisiri tsawabama watsume kulawa mmatsi, lekeni IMNDEWA kawakunughitsa mwibahari. 28 Ghamatsi tsaghaghubika mituka ne iwadina farasi, iwamasikali wose wa Farao iwawawinzile Waisiraeli tsawafa mna ghamatsi. Ng'ahonile baye hata Mmisiri yumwe. 29 Lekeni Waisiraeli tsawabita haghatighati he ibahari hanu hasakale ghendo na ghamatsi tsaghema ka mibanda ubali wawo wa kujilo na wa kumoso.

30 Apfo pfipfo IMNDEWA pfayawakombole Waisiraeli mna ghamoko gha Wamisiri, nawo Waisiraeli wawona Wamisiri iwafile mmbalimbali mwe ibahari. 31 Waisiraeli hawonile chinu acho chikulu chayatendile IMNDEWA kwa Wamisiri, wampfuka Imulungu na wamtoghola Imulungu ne imtumwa wake Musa.