1 Kuya IMNDEWA kamlongela Musa, "Ulole, nene nokutenda ghweghwe uwe ka mulungu kwa Farao, na ndughu yako Aruni katsolonga ghaubamighwe ghweghwe kulonga. 2 Umlongele Aruni ghose ghanikulaghitsa, naye Aruni katsomlongela Farao yawalekelele Waisiraeli walawe mna isi yake. 3 Lekeni nitsomtenda Farao yawe msughu. Hata ning'atenda pfihulo na pfinu pfingi pfa kukangawatsa mna isi ya Misiri, 4 Farao ng'atsokuhulikitsa baye, baho nitsogholosa ghumoko ghwangu ghune ingupfu na kuitowa isi ya Misiri na nitsowalapfa iwanu wangu, kolo tsa Isiraeli. 5 Baho Wamisiri watsomanya ka nene na IMNDEWA hanitsogholosa ghumoko ghwangu niwatowe Wamisiri na kuwalapfa Waisiraeli walawe mna wawo." 6 Musa na Aruni tsawatenda ka IMNDEWA pfayawalaghitse. 7 Hawalongile na Farao Musa tsakana miyaka semanini, naye Aruni tsakana miyaka semanini na mitadatu.

8 IMNDEWA tsakawalongela Musa na Aruni, 9 "Farao hang'awalongela, ‘Mtende chinu cha kukangawatsa,’ Mlongele Aruni asole ng'weku yake ayase hasi hambele ha Farao, nayo itsakuwa nzoka." 10 Apfo Musa na Aruni wamghendela Farao watenda ka Imulungu pfayawalaghitse. Aruni tsakayasa ng'weku yake hambele ha Farao na iwatawala weyaghe, nayo iwa nzoka. 11 Lekeni Farao kawakema iwanu wake iwakengele na iwahawi wake, nawo iwahawi wa Misiri tsawatenda pfipfo kwa uhawi wawo. 12 Wasa ng'weku tsawo hasi, natso tsiwa nzoka, kuya ng'weku ya Aruni itsimetsa ng'weku tsawo. 13 Hata apfo Farao kaghendelela kuwa msughu, ng'awahulikitse baye, ka IMNDEWA pfayalongile.

14 Kuya IMNDEWA kamlongela Musa, "Farao ka msughu, kolema kuwalekelela iwanu woke. 15 Lelo ilupfi nemitondo mghendele Farao hayoghenda kumto. Umbete mmbalimbali mwe ghumto. Usole ing'weku ila iighaluke nzoka. 16 Kuya umlongele, ‘IMNDEWA wa Waeburaniya, kanituma kuna ghweghwe nikulongele uwalekelele iwanu wake woke kunyika wakamtamanile. Lekeni mbaka sambi ng'uhulikitse baye. 17 Lelo IMNDEWA kolonga pfino, kutsommanya ka yeye ka Imfalume. Nitsoghatowa ghamatsi gha ghumto Naili kwa ing'weku ino, nagho ghatsakuwa idamu. 18 Iwasomba iwali mna ghumto Naili watsakufa, ghumto ghose ghutsonung'a ghendo, na Wamisiri ng'awatsodaha ghendo ukunwa ghamatsi ghake.’ " 19 IMNDEWA kamlongela Musa, "Mlongele Aruni yasole ing'weku yake yaigholose mchanya mwe ghamatsi gha Misiri, mchanya mwe imito yose, tsimbwibwi na matsiwa ghose ili ghawe idamu. Kutsakuwa na idamu muisi mwose, hata mna pfinu pfawo pfa mibiki pfakwikila ghamatsi na mna mabigha ghawo." 20 Musa na Aruni tsawatenda ka IMNDEWA pfayawalaghitse. Aruni tsakenula ng'weku yake hambele ha Farao na iwatawala weyaghe, kaghatowa ghamatsi gha ghumto Naili, ghamatsi ghose ghawa idamu. 21 Iwasomba wafa, ghumto ghunung'a pfihile ghendo mbaka Wamisiri ng'awadahile baye ukunwa ghamatsi ghake. Isi yose tsaikala na idamu. 22 Lekeni wahawi wa Misiri nawo watenda pfipfo kwa uhawi wawo. Apfo Farao kaghendelela kuwa msughu, tsaiwa ka IMNDEWA pfayalongile, Farao ng'awahulikitse baye Musa na Aruni. 23 Kuya Farao koya ukaye yake, ng'aghalangule baye aghala ighalawile. 24 Wamisiri wose wahimbahimba mmbalimbali mwa ghumto Naili ili wapate ghamatsi gha ukunwa, kwaapfila ng'awadahile baye ukunwa ghamatsi gha ghumto.

25 Ghamatsuwa saba tsaghabita kulawa Imulungu hayaghutowile ghumto aghula.