1 IMNDEWA tsakamlongela Musa, 2 "Walongele Waisiraeli wangalile ipfinu. Unibokelele ipfinu pfawatsolapfa iwanu. Chila munu yalapfe ka ghumoyo ghwake pfaghubama. 3 Apfino pfipfo ipfinu pfautsobokela, nzahabu, fetsa, shaba, 4 nyutsi tsa langi ya buluu, nzambalau na ndung'u, maghwanda matselu, na maghwanda ighatendighwe ne imighala ye wamene, 5 na ngotsi tse iwang'olo mvulati itsitengenetsighwe tsiwe ndung'u, ngotsi tse wamene, mibani ye mjoholo, 6 ghamafuta ghe chitasa, pfilungo ipfikwikighwa mna ghamafuta gho kughidila wawe watambika na pfilungo pfa upfumba iunung'ila ghoya, 7 ghamabwe gha bei ng'ulu ighokemighwa sadoniki, na mabwe ghangi gha bei ng'ulu, agho ghatsakuwa ka unzolingo mna chisibau che mtambika mkulu, ne ichifuko cha mmambagha ichipfalighwa na imtambika mkulu. 8 Kuya Waisiraeli wanitsengele Hema Lienzeluke, ili nene nikale haghati hawo. 9 Kutsotsenga lihema alyo na ipfinu pfake pfose ipfitsotumika mghati mwake ka pfanitsokulangusa.

10 "Waisiraeli watengenetse lisanduku lya mibani ya mjoholo, line utali wa futi nne, ughatsi wake uwe wa futi mbili, na chimo chake futi mbili. 11 Ulikandike lisanduku alyo nzahabu iliyeka mghati na kunze, kuya wike kingamitsi ya nzahabu iitsunguluke. 12 Kuya utengenetse mabangili mane gha nzahabu na ughananike hane ghamatendeghu mane gha lisanduku, mabangili meli ubali umwe na mabangili meli ubali ungi. 13 Naghwe usongole mifumbati mili ya mjoholo kuya uikandike nzahabu. 14 Ne mifumbati'yo kutsoingitsa mna ghamabangili ighali mna chila ubali wa lisanduku, iwe yo ukulighalila lisanduku. 15 Imifumbati ikaleghe mumo mna ghamabangili'gho, ileke kulapfighwa. 16 Wike mghati mwe lisanduku'lyo ghamabamba meli gha libwe ghanyandike malaghitso ghangu.

17 "Kuya utengenetse chighubiko che lisanduku kwe nzahabu iliyeka, chighubiko'cho chitsakuwa hanu ha libatsi, utali wake uwe futi ndatu na lobo ndatu na ughatsi wake uwe futi mbili na lobo. 18 Uhonde nzahabu na ufine pfiumbe pfili pfine mapamanilo ipfikemighwa makelubi upfike kune pfitsighilo pfe chighoda. 19 Kerubi yumwe umwike hachandusile ichighoda na kerubi wakeli umwike hachitsighile ichighoda. Lekeni makelubi'wo uwalumbitse ne ichighoda acho wawe chinu chimwe. 20 Pfiumbe'wo wakale aku welola, mapamanilo ghawo ghapamanyale kughubika ichighoda cha libatsi. 21 Mghati mwe lisanduku kutsakwika ghamabamba meli gha ghamalaghitso ghanitsokwing'a na kuchika chighoda cha libatsi mchanya mwake. 22 Na nene nitsetinganagha naghwe bahala hane chighoda che libatsi, kulawa haghati ha makelubi awala weli iwali mchanya mwa lisanduku lya laghano, nitsolonga naghwe no kukwing'a ghamalaghitso ghose ghaubamighwa kuwalongela Waisiraeli.

23 "Utengenetse metsa ya mibani ya mjoholo ine utali wa futi ndatu, ughatsi wake uwe futi imwe na nusu, na chimo chake chiwe futi mbili na lobo. 24 Uikandike nzahabu iliyeka na kuitsungulusila kingamitsi ya nzahabu. 25 Kuya kutsosungulusila ubapi une ughatsi wa lobo futi na ubapi'wo uukandike nzahabu. 26 Utengenetse bangili nne tse nzahabu utsinanike mna tsimembe tsake mna ghamatendeghu ghake. 27 Tsibangili'tso tsitsakuwa habehi ne ubapi ula utsunguluka imetsa na tsitsakuwa tso kwingitsila mifumbati ya kughalila imetsa ayo. 28 Usongole mifumbati ya mjoholo na uikandike nzahabu, imifumbati'yo itsakuwa ya kuighalila imetsa. 29 Naghwe utengenetsele sahani tsake ne pfikombe pfake ne mitela yake, kuya uitengenetsele bilika ne pfipeo pfo kughumila nambiko tse pfakunwa. Upfitengenetse kwa nzahabu iliyeka. 30 Na mchanya mwe imetsa'yo upfike pfighate ipfilangusa ka nene nabaho. Matsuwa ghose mnyikile pfighate'pfo mna metsa ayo.

31 "Utengenetse chitasa kwa nzahabu iliyeka yo kuhonda, ichitasa acho chiwe pfino, ichikalilo chake, lufito lwake, ipfikonyo pfake, pfifundo pfake na ghamaluwa ghake, pfose pfilumbitsighwe pfiwe chinu chimwe. 32 Maputila ghalawe chila lubali lwe lufito lwake, maputila madatu lubali lumwe na madatu lubali lungi. 33 Mne chila putila kuwe na pfikonyo pfidatu ipfighalile na maluwa gha mlotsi, chila chimwe na chifundo chake na luwa lyake. 34 Mne lufito kuwe ne pfikonyo pfine ipfighalile ne maluwa gha mlotsi, hamwe ne pfifundo pfake na maluwa ghake. 35 Hasi ha chila hanu hagholawila maputila mabili, mna ghamaputila aghala sita, hatsakuwa na chifundo chimwe ichili chinu chimwe ne lufito lwe chitasa acho. 36 Ipfifundo'pfo na ghamaputila ghake ghatsakuwa chinu chimwe ne chitasa, pfose pfitengenetsighwe kwa nzahabu iliyeka yo kuhonda. 37 Kuya uchitengenetsele ichitasa acho tsitambi saba, utsike mchanya mwake, pfilangatse hambele hake. 38 Ipfinu pfake pfo kulapfila tsitambi na tsisahani tsake pfiwe pfa nzahabu iliyeka ihondighwe. 39 Ichitasa acho hamwe ne pfinu pfake pfose, pfitsotengenetsighwa kwa kutumila kilo salasini na tano tse nzahabu iliyeka. 40 Walangitse, upfitengenetse ka apfila pfanikulanguse kuchidunda.