1 IMNDEWA kamlongela Musa, 2 "Lola, nimsaghula Bezaleli, imwana wa Uri, ayo Uri aba wake tsa Huri, wa likabila lya Yuda, 3 nimmemesa Ghumuhe ghwe Imulungu, nimtenda yawe na tsimbutsi, yamanye na yadahe kutenda tsisang'ano tsose, 4 ili yatende tsisang'ano tsa ufundi, yawe muhunzi wa ipfinu pfa nzahabu, fetsa na shaba, 5 nimtenda yamanye kusongola ghamabwe gha kuhambila, kusongola mibani, na yamanye tsisang'ano tsose tso kuhamba. 6 Kuya nimsaghula Oholiabu mwana wa Ahisamaki, wa likabila lya Dani yasang'ane naye. Pfipfila niweng'a uwetso mkulu mafundi wa kutenda sang'ano tsingi, ili watengenetse pfinu pfose pfanikulaghitse. 7 Lihema lya Kwitinganila, lisanduku lya laghano, ichighubiko chake ichili hanu he libatsi ihali mchanya mwake, na pfinu pfose pfa lihema, 8 imetsa na pfinu pfake, chighutso che pfitasa che nzahabu iliyeka na pfinu pfake pfose, lisanduku lyo kupfukitsa upfumba. 9 Pfipfila lisanduku lyo kulapfila nambiko tso kulakatsighwa na pfinu pfake pfose, bigha lya shaba lya ghamatsi na chikalilo chake, 10 maghwanda ghadadatsighwe ghoya, maghwanda ghaenzeluke gha Aruni, na maghwanda ghe iwanaghe ili waghapfale ahala hawosang'ana ng'onde ya kulapfa nambiko, 11 ghamafuta gha kubaka na upfumba unung'ila ghoya gho ukutumika ihanu ihaenzeluke. Pfinu'pfo pfose pfitengenetsighwe ka pfanikulaghitse."

12 Kuya IMNDEWA kamlongela Musa, 13 "Walongele Waisiraeli pfino, Mwemwe mtsokindilisa ghamatsuwa ghangu gha kubwihila, kwaapfila acho chitango haghati henu na nene kwa pfeleko pfenu pfose ipfikutsa, ili mmanye ka nene na IMNDEWA yaniwatenda mwenzeluke. 14 Mkindilise litsuwa lya kubwihila, kwaapfila litsuwa alyo lihenzeluka kuna mwemwe. Imunu wowose iyatsolibetsa litsuwa alyo yakomighwe, kwaapfila imunu wowose iyosang'ana mna litsuwa alyo nitsomlema yaleke kuwa munu wangu. 15 Mtsosang'ana matsuwa sita, lekeni litsuwa lya saba alyo litsuwa lya kubwihila, lienzeluka kuna nene IMNDEWA, imunu wowose iyosang'ana ng'onde yoyose mna litsuwa alyo katsokomighwa ghendo. 16 Apfo waisiraeli watsokindilisa Litsuwa lya kubwihila mna pfeleko pfawo pfose ka laghano lya ghamatsuwa ghose. 17 Chinu chino chitsakuwa chitango cha ghamatsuwa ghose haghati he wana wa Waisiraeli na nene, kwaapfila nene IMNDEWA tsanitsiumba tsilanga ne isi kwa ghamatsuwa sita, lekeni mna litsuwa lya saba ndeka kusang'ana, nibwihila."

18 IMNDEWA hayamalitse kulonga na Musa kuchidunda Sinai, kamwing'a Musa mabamba meli gha ghamabwe ighandikighwe ghamalaghitso, ighandikighwe kwa ukukwangula ne chidole che Imulungu.