1 Kuya IMNDEWA kamlongela Musa, "Ughende kwa Farao, kwaapfila niwatenda wawe wasughu yeye na watawala wayaghe, ili nitende pfihulo mna wawo, 2 mwemwe mdahe kuwapetela iwana ne iwatsukulu wenu pfaniwatendile wabotsi Wamisiri kwa ukutenda pfihulo apfo mna wawo. Apfo mtsotanga ka nene na IMNDEWA." 3 Apfo Musa na Aruni wamghendela Farao wamlongela, "IMNDEWA, Imulungu wa Waeburaniya kolonga apfino ‘Kutsolema kutenda ka pfanikulongela mbaka tsuwachi? 4 Ung'alema kuwalekelela iwanu wangu woke, ilupfi nitsokughalila wanzighe muisi mwako. 5 Nawo watsoighubika isi yose ya Misiri. Watsakuja chila chinu ichisighale mna imvula ya ghamabwe, pfipfila ng'awatsoghuleka mbiki ghwoghwose ghwaukota mmighunda. 6 Wanzighe awo watsomema mng'anda mwako, mna tsing'anda tse iwatawala wayagho, na tse Wamisiri wose, watsakuwa wengi hata iwabala tsenu ng'ana wone baye kulawa hawoneke mbaka leloli.’ " Kuya Musa kalawa kwa Farao. 7 Iwatawala wayaghe Farao wamghutsa, "Angu munu yuno katsotutsupfa mbaka tsuwachi? Walekelele wanu wano woke wakamtambikile IMNDEWA, Imulungu wawo. Pfii ng'una umanye baye ka isi ya Misiri yohinyika?" 8 Kuya Musa na Aruni wakemighwa woye kwa Farao, naye kawalongela, "Mghende mkamtamanile IMNDEWA, Imulungu wenu. Lekeni nongeleni, tsina nani iwoghenda namwe?" 9 Musa kamwidika, "Chila munu, wasongolo ne wanzehe, twakuka ne iwana wetu wamale ne wapinga, wang'olo ne wamene ne wang'ombe tsetu, kwaapfila twobamighwa tumtendele chihungo IMNDEWA." 10 Mfalume kawalongela, "Nelaha kwe IMNDEWA sitsowalekela baye mghende ne iwapinga wenu ne iwanenu. Yakoneka ghendo mwepfikitsa pfihile mna mimoyo yenu, mwobama mleke kuya keli. 11 Baye! Iwamale waliyeka wawo iwatsoghenda kumtambikila IMNDEWA, kwaapfila acho chicho chambama." Baho Musa na Aruni wawingighwa hambele ha Farao. 12 Kuya IMNDEWA kamlongela Musa, "Gholosa ghumoko ghwako mchanya mwe isi ya Misiri, wanzighe walawile wengile Misiri, waje imimeya yose na pfose ipfisighale mna imvula ya ghamabwe." 13 Apfo Musa kaigholosa ng'weku yake mchanya mwe isi ya Misiri, IMNDEWA kaghala libeho kulawa ubali wa mashaliki, libeho tsaliduma misi yose ne chilo chose. Hakuchile libeho lila lighala wanzighe. 14 Wanzighe awo tsawenela chila hanu mna isi yose ya Misiri. Tsa wawengi ng'ani, ng'ana ilawile baye na ng'aitsolawila keli ka apfo. 15 Tsaighubika isi yose ya Misiri, mbaka isi ingila chisi, tsawaja imimeya yose ye isi, na matunda ghose ighasighale mna imvula ila ya ghamabwe. Kuduhu hata tsani limwe ilisighale muisi. Kuduhu tsani lyolyose ilisighale mna imibiki wala mna imimeya mna isi yose ya Misiri.

16 Baho Farao kawakema himahima Musa na Aruni kawalongela, "Nimtendela nzambi Imulungu na mwemwe pfipfila. 17 Lelo mnileghusile nzambi tsangu mala ino keli na mnombele kwa IMNDEWA wenu yatuleke tuleke ukufa kwa chinu chino."

18 Musa kalawa kwa Farao, kamlomba IIMNDEWA. 19 IMNDEWA kaghala libeho kulu lya ubali wa maghalibi, liwasola wanzighe wala na kuwaghala kuna ibahari ya Shamu. Tsakuduhu hata nzighe yumwe iyasighale mna isi yose ya Misiri. 20 Lekeni IMNDEWA kamtenda Farao yawe msughu, naye ng'awalekelele Waisiraeli woke.

21 Kuya IMNDEWA kamlongela Musa, "Winule ghumoko ghwako kulanga, na chisi chikulu chilawile mna isi ya Misiri, mbaka iwanu wabamase bamase mna ichisi acho." 22 Apfo Musa kagholosa ghumoko ghwake kulanga, baho chisi chikulu chilawila mna isi yose ya Misiri kwa ghamatsuwa madatu. 23 Tsakuduhu imunu yadahile kumwona miyaghe au kuka kulawa hanu hayali kwa ghamatsuwa madatu. Lekeni Waisiraeli wose tsawakala na ghumwanga hanu kwawakalile.

24 Kuya mfalume kamkema Musa kamlongela, "Mghende mkamtamanile IMNDEWA, hata iwapinga ne iwanenu wodaha kuka namwe. Lekeni iwang'olo ne iwamene wenu ne wang'ombe wenu mleke kuka nawo."

25 Musa kalonga, "Kobamighwa utulekele tusole iwanyama we inambiko na sadaka tsa ukulakatsighwa tukamtambikile IMNDEWA, Imulungu wetu. 26 Iwanyama wetu pfipfila tutsoghenda nawo, ng'atumleka baye hata yumwe. Kwaapfila kulawa mna wanyama wetu wenyegho, tutsomtambikila IMNDEWA, Imulungu wetu, kuya twetwe ng'atumanyile imnyama yuhi yatutsomlapfila IMNDEWA mbaka hatutsopfika ako."

27 Lekeni IMNDEWA kamtenda Farao yawe msughu, na ng'abamile baye kuwalekelela woke. 28 Farao kamlongela Musa, "Ulawe hambele hangu! Walangitse uleke ukutsa keli kuna nene. Kwaapfila ung'atsa keli kuna nene, litsuwa alyo nitsokukoma!" 29 Musa kamwidika, "Ona. Ghweghwe kulonga ghoya, ng'utsombona keli baye."