1 Lekeni IMNDEWA Imulungu kamlongela Musa, "Sambi kutsakona chanitsomtendela Farao, kwaapfila kwa ghumoko ghwangu ghune ngupfu katsowawinga iwanu wangu woke muisi mwake."

2 Imulungu kamlongela Mose, "Nene na IMNDEWA. 3 Tsanimlawila Abrahamu, Isaka, na Yakobu, nimanyika ka Imulungu Yane ngupfu tsose, lekeni simanyike kuna wawo ka taghwa lyangu, Imfalume. 4 Kuya tsanilaghana nawo, kuweng'a isi ya Kanaani, isi yawakalile ka wagheni. 5 Pfipfila nihulika chililo cha Waisiraeli iwodununzighwa na Wamisiri, kuya nikumbuka laghano lyangu. 6 Apfo walongele Waisiraeli ka nene nowalongela pfino, ‘Nene na Imfalume, nitsowalapfa kwa Wamisiri na mtsoleka kuwasang'anila ng'onde ng'omu. Nitsowakombola kulawa mna utumwa wenu. Nitsakwinula ghumoko ghwangu ghune ngupfu na kuwatowa Wamisiri, na kuwakombola mwemwe. 7 Nitsowatenda mwemwe muwe wanu wangu, na nene nakuwa Imulungu wenu. Mtsomanya ka nene na IMNDEWA wenu ahala haniwalapfa mna tsing'onde tsa utumwa ako Misiri. 8 Na nene nitsowaghala mna isi yanilahile kumwing'a Abrahamu, Isaka na Yakobu. Nitsomwing'ani isi ayo iwe yenu. Nene na IMNDEWA.’ "

9 Musa kawalongela Waisiraeli mbuli ayo, lekeni ng'awamuhilikitse baye kwaapfila tsawatenyuka ghumoyo kwa kusang'ana ng'onde tsa utumwa.

10 Kuya IMNDEWA kamlongela Musa, 11 "Ghenda umlongele mfalume wa Misiri yawalekelele Waisiraeli woke mna isi yake."

12 Lekeni Musa kedika, "Ka Waisiraeli ng'awanihulikitse baye, angu Farao katsonihulikitsa? Nene sidahile baye kulonga pfinoghile." 13 Kuya IMNDEWA kawalaghitsa Aruni na Musa wamghendele mfalume wa Misiri, na wawalapfe Waisiraeli mna isi ya Misiri.

14 Awano wawo iwatsukulu wa Isiraeli, yakemighwe Yakobu. Aghano ghamataghwa gha iwana wamale wa Rubeni, iyakalile imwana chaudele wa Isiraeli, Hanoko, Palu, Hesironi na Kalimi. Awano tsawakala iwabala wa kolo tsa Rubeni. 15 Iwana wa Simoni tsawakala, Yemueli, Yamini, Ohadi, Yakini, Sohari na Shauri, imwana wa pinga yumwe Mkanani. Awano tsawakala iwabala wa kolo tsa Simoni. 16 Aghano mataghwa gha iwana wa Lawi, ne watsukulu wake, Gashoni, Kohasi na Merari. Lawi tsakakala kwa miaka miya imwe na selasini na saba. 17 Iwana wa Gerishoni tsa Libini na Shimei, nawo tsawana watsukulu wengi. 18 Iwana wa Kohati tsa Amramu, Ishari, Hebuloni na Uzieli. Kohati tsakakala kwa miaka miya imwe na salasini na ndatu. 19 Iwana wa Merari tsa, Mahili na Mushi. Awano tsa iwabala wa kolo tsa Walawi.

20 Amramu tsakamkwela Yokebeli, lumbu wa aba wake, iyamwelekele Aroni na Musa. Amramu tsakakala miyaka miya imwe na salasini na saba. 21 Iwana wa Ishari tsa Kola, Nefagi, na Zikiri. 22 Iwana wa Uzieli tsa, Mishaeli, Elisafani na Sitiri. 23 Aruni tsakamkwela Elisheba, neghe Abinadabu, lumbu jake Nashoni, naye Elisheba kamweleka Nadabu, Abihi, Eleazari na Itamari. 24 Nawo iwana wa Kora tsa, Asiri, Elikana na Abiasafu. Awo tsa iwabala wa kolo tsa Kora. 25 Eleasari imwana wa Aruni tsakamkwela neghe yumwe wa Putieli, naye pinga ayo kamwelekela Eleasari imwana iyakemighwe Fineasi. Awo tsa iwabala wa kolo tsa Lawi. 26 Aruni na Musa iwo wawala iwalongelighwe ne IMNDEWA, "Tsilapfeni Misiri kolo tsa Isiraeli." 27 Kuya wawo iwo iwamlongele Farao, mfalume wa Misiri, yawalekele Waisiraeli.

28 IMNDEWA hayalongile na Musa ako Misiri, 29 tsakamlongela, "Nene yuyo IMNDEWA. Mlongele Farao, mfalume wa Misiri, chila chinu chanikulongele."

30 Lekeni Musa tsakamlongela IMNDEWA, "Nene sidahile baye kulonga pfinoghile, lelo Farao katsonihulikitsa?"