1 IMNDEWA kamlongela Musa, "Haya mlawe hanu hano, ghweghwe ne iwanu wako yauwalapfile isi ya Misiri, mghende kune isi yanilahile kuweng'a Abrahamu, Isaka na Yakobu, ahala hanilongile, ‘Nitsoweng'a iwatsukulu wenu isi ino.’ 2 Nitsomtuma malaika wangu yawalongolele, nitsowawinga Wakanani, Waamori, Wahiti, Waperizi, Wahivi na Wayebusi. 3 Mghende mna isi'yo ine wanyama wengi iwolapfa ghamatsiwa, na ine uki wingi. Lekeni kwaapfila mwemwe mwawasughu ng'ani sighenda namwe baye, hela nitsowakoma mnzila."

4 Iwanu hawahulike imbuli ayo ihile, wandusa chililo, nakuduhu munu yapfalile pfinu pfake ipfinoghile pfo ukwihamba. 5 Watenda apfo kwaapfila IMNDEWA tsakamlongela Musa, "Walongele Waisiraeli, mwemwe mwa wasughu ng'ani, ning'aghenda namwe hata kwa saa chidogho nitsowakoma. Lelo tsuleni pfinu pfenu pfinoghile pfo ukwihamba nimanye pfanitsowatenda." 6 Apfo Waisiraeli watsula pfinu pfawo pfinoghile pfo ukwihamba kwandusila hachidunda Holebu na kwawaghendelele na ghumwanza.

7 Hohose Waisiraeli hawekile ndalo wabwihile, Musa yang'ali yosola lihema na kulitsenga kutali chidogho na indalo, naye kaling'a taghwa lihema alyo Hema lya Kwitinganila. Na munu wowose yabamile yamanye chinu kulawa kwe IMNDEWA, yang'ali yoghenda kune Lihema lya Kwitinganila likalile kunze kutali ne indalo. 8 Musa hayang'ali yoghendagha kune lihema alyo, iwanu wose wang'ali wakwima wima chila munu hane ghumlango ghwe ichibumbulika chake, womlolesa Musa pfayoghenda mbaka hayakwingila mghati mwe lihema. 9 Iwagha pfino, Musa yang'engila mghati mwa Lihema lya Kwitinganila, ngutso ya libingu ing'ali ihulumka kulawa kulanga yakwima hane ghumlango ghwa Lihema alyo, na baho IMNDEWA kolonga na Musa. 10 Na iwanu wose hawoyona ingutso ya libingu yakwima hane ghumlango ghwa Lihema, wose wang'ali wenama mbaka ipfihanga pfodonza hasi, chila munu hamlango he chibumbulika chake. 11 Apfo pfipfo Imulungu pfayang'ali yolonga na Musa ka imunu kolonga na sale yake, kuya Musa yang'ali yakuyagha keli kune indalo, Lekeni imbwanga Yoshua, imwana wa Nuni, iyang'ali yomwapfila Musa, yeye ng'alawagha baye mna lihema.

12 Musa kamlongela IMNDEWA, "Lola! Ghweghwe tsakunongela, ‘Walongotse iwanu wano,’ lekeni ng'una unongele baye yutsomtuma yanyapfile nani. Kuya tsakulonga, ‘Nikumanya kwa litaghwa lyako, naghwe kutogholighwa hambele hangu.’ 13 Lelo nokulomba, ka nitogholighwa hambele hako, unanguse nzila tsako, kuya unitende nikumanye na nighendelele kuwona uluso wako. Kuya nokulomba ukumbuke ka iwanu wano Wasiraeli wawo iwanu wako." 14 Imulungu kalonga, "Nene imwenyegho nitsoghenda naghwe, na nitsokutenda ubwede." 15 Musa, kamlongela Imulungu, "Ka ng'ughenda baye na twetwe, uleke kutulapfa hanu hano. 16 Angu lelo iwanu watsomanyatse ka ghweghwe konoghelwa na nene na iwanu wako, ka ng'ughenda na twetwe baye? Ung'aghenda na twetwe itsotutenda tuleke kwighala na iwanu wose iwali mwiisi yose."

17 IMNDEWA kamlongela Musa, "Nitsotenda ghendo ka pfaulombile, kwaapfila nene nokumanya kwa litaghwa lyako naghwe kotogholighwa hambele hangu." 18 Kuya Musa kalonga, "Lelo nokulomba unanguse utunitso wako."

19 Naye kamwidika, "Nitsobita hambele hako kukulangusa wende wangu wose, na kulikema taghwa lyangu, ‘IMNDEWA.’ Nitsomtendela uluso ayula yanibama kumtendela uluso, na kumwonela libatsi ayula yanibama kumwonela libatsi". 20 Kuya kalonga keli, "Lekeni ng'udaha baye kuwona uhanga wangu, kwaapfila kuduhu munu yodaha kumbona kuya yawe mghima." 21 Kuya IMNDEWA kamlongela Musa, "Ahano hana hanu habehi na nene, naghwe kutsakwima mchanya mwe bambalawe, 22 na ung'alo wangu hautsobita, nitsokughela mna lwatu lwe libambalawe, nani nitsokughubika kwe chighanza cha ghumoko ghwangu aho hanitsobita. 23 Kuya nitsochilapfa ichighanza changu, naghwe kutsoghwona ghumghongo ghwangu, lekeni uhanga wangu ng'autsakwoneka baye."