1 "Besaleli, Oholiabu na iwatenda sang'ano iweng'ighwe ne Imulungu ujutsi na ukumanya, iwanu iwomanya kutenda chila chinu ichibamighwa kutsengela Lihema Lienzeluke, watsotenda chila chinu ka IMNDEWA pfayalaghitse."

2 Kuya Musa kamkema Besaleli, Oholiabu ne iwanu wose iweng'ighwe ujutsi ne IMNDEWA, na chila munu yabamile kutsa kusang'ana. 3 Nawo tsawabokela kulawa kwa Musa ipfinu pfose ipfilapfighwe na Waisiraeli kwa mimoyo yawo wenyegho kwaajili ya sang'ano ya Lihema Lienzeluke. Kuya iwanu tsawaghendelela kumghalila Musa tsinzawadi chila mitondo, tsawalapfile kwa kubama wenyegho. 4 Kuya iwanu wose wane ujutsi iwang'ali wosang'ana mna kutsenga Lihema lya kwitinganila waghenda 5 wamlongela Musa, "Iwanu woghala pfinu pfingi kubita ipfibamighwa kwa isang'ano yailaghitse IMNDEWA tuitende."

6 Apfo Musa kalaghitsa mna indalo yose iwanu wose wamale kwe iwapinga waleke kughendelela kughala pfinu pfa kutsengela Lihema Lienzeluke, baho iwanu ng'awaghalile keli ipfinu baye, 7 kwaapfila ipfinu pfawakalile napfo tsa pfingi ng'ani kubita ipfibamighwa kutendela isang'ano yose.

8 Iwamale wose wane ujutsi tsawatengenetsa lihema kwa mapanzia kumi gha maghwanda matselu ghanoghile, na kwa nyutsi tsa buluu, nzambalau, na ndung'u, kuya waghahamba kwa pfiumbe wane mapamanilo iwakemighwe makelubi, kwa sang'ano ya fundi iyakubuhu. 9 Chila panzia tsalina utali wa futi alubaini na mbili, na ughatsi wake futi sita. Mapanzia ghose tsaghelingana. 10 Tsakaghalumbitsa hamwe mapanzia matano ili kutenda hande limwe, na katenda pfipfo kwa ghamapanzia aghala ghangi matano. 11 Kuya katenda pfitanzi pfa buluu mna mindo ya panziya lya utsighilo lya hande lya mwanduso, na pfitanzi pfingi mna panziya lya utsighilo lya lihande lya kabili. 12 Katenda pfitanzi hamsini mna panzia limwe lya hande lya mwanduso, na pfitanzi hamsini pfingi mna mindo ya panziya lili mna lihande lya kabili, ipfitanzi'pfo tsapfilolesa. 13 Kuya katenda pfipfungo hamsini pfa nzahabu, kaghalumbitsa hamwe ghamahande 'ghala meli gha ghamapanzia, apfo lihema liwa limwe.

14 Pfipfila katenda ghubiko lya lihema kwa mapanzia kumi na limwe gha mighala ya mene. 15 Chila panziya tsalina futi alubaini na tano, na ughatsi wake futi sita. Mapanzia ghose kumi na limwe tsaghelingana. 16 Apfo kaghalumbitsa hamwe mapanzia matano, na mapanzia sita kaghalumbitsa hangi. 17 Kuya katengenetsa pfitanzi hamsini mna mindo ya panzia lya utsighilo lya hande limwe, na pfitanzi hamsini mna mindo ya lipanziya lya utsighilo lya lihande lya kabili. 18 Pfipfila tsakatengenetsa pfifungo hamsini pfa shaba ili kulumbitsa mahande 'ghala meli gha lighubiko, ili kutenda lighubiko liwe limwe. 19 Kuya katengenetsa maghubiko ghangi meli, limwe lya ngotsi ndekendeke ndung'u tsa ng'olo mmale, na mchanya mwake ghubiko lingi lya ngotsi ndekendeke tsa mene.

20 Kuya katengenetsa fulemu tsa mjoholo tso ukwimila lihema. 21 Chila fulemu tsaina utali wa futi kumi na tano na ughatsi wake futi mbili na lobo. 22 Chila fulemu tsaina membe mbili tso kulumbitsila. Fulemu tsose tsa lihema pfipfo pfayatsitengenetse. 23 Fulemu'tso tsa lihema tsatsitengenetsighwa apfi, fulemu ishilini ubali wa kusini, 24 na pfikalilo pfake alubaini pfa fetsa pfiwe hasi mwe tsifulemu'tso ishilini, pfikalilo pfibili hasi mwa chila fulemu ili kukindisa tsimembe 'tsila mbili. 25 Kune ubali wa kabili wa lihema, ubali wa kasikazini tsakatengenetsa fulemu ishilini, 26 na pfikalilo pfake alubaini pfa fetsa, pfikalilo pfibili hasi mwa chila fulemu. 27 Ubali wa kuchughu wa lihema, ubali wa maghalibi, tsakatengenetsa fulemu sita. 28 Naye katengenetsa fulemu mbili tso kukala mna tsimembe mbili tsa Lihema ubali wa kuchughu. 29 Natso tsatsibasa kulawa hasi, na tsibasa pfipfo hatsighendile kuchanya, tsilumbitsa hane bangili ya mwanduso. Pfipfo pfatsitengenetsighwe fulemu'tso mbili mna tsimembe'tso mbili. 30 Apfo tsahana fulemu nane na pfikalilo pfake pfa fetsa kumi na sita, pfikalilo pfibili hasi mwa chila fulemu.

31 Kuya katengenetsa mifumbati ya mjoholo, mifumbati mitano yo kukindilisa fulemu tsa ubali umwe wa Lihema, 32 na mifumbati mitano yo kukindilisa tsifulemu tsa ubali wa kabili wa Lihema na mifumbati mitano iwe ya ubali wa kuchughu wa Lihema iuli maghalibi. 33 Naye kaghutengenetsa mfumbati ghwa haghati ghulumbilile kulawa utsighilo uno mbaka utsighilo ungi wa tsifulemu. 34 Tsifulemu tsose katsindika nzahabu, kuya katengenetsa bangili tsa nzahabu tso kukindila imifumbati'yo, nayo kaikandika nzahabu.

35 Naye katengenetsa panzia lya maghwanda matselu ighanoghile lidadatsighwe kwa nyutsi tsa buluu, nzambalau, na ndung'u. Panziya alyo tsalihambighwa pfinoghile kwa pfilumbe wane mapamanilo iwokemighwa makelubi kwa tsinyutsi'tso. 36 Na kalitengenetsela ngutso nne tsa mijoholo, katsikandika nzahabu na kutsighelela pfifungo pfa nzahabu. Pfipfila kapfitengenetsela pfikalilo pfine pfa fetsa. 37 Pfipfila katengenetsa panzia lyo kudiwa ghumlango ghwa lihema lya nyutsi tsa buluu, nzambalau, ndung'u na maghwanda matselu, nalyo tsalihambighwa pfinoghile kwa sang'ano ya kudalitsi, 38 na ngutso tsake tano itsili na pfinanikilo. Kusa kwa tsingutso tsake na tsifito tsake kapfikandika nzahabu, lekeni pfikalilo pfake pfitano tsapfikala pfa shaba.