1 IMNDEWA kamlongela Musa, "Mtse kuna nene, ghweghwe na Aruni, Nadabu na Abihu, ne iwabala sabini wa Waisiraeli, hampfika habehi mnitamanile kwa kutali. 2 Ghweghwe Musa uliyeka yautsonitsila, lekeni wayagho waleke kutsa hanili nene, na Waisiraeli waleke kudina kuchidunda."

3 Apfo Musa kaghenda kuwalongela iwanu ghose ghayamlongele IMNDEWA na ghose ghayamlaghitse. Iwanu hawahulike wose wedikila lumwe, "Ghose ghayalongile IMNDEWA tutsoghatenda." 4 Musa kaghandika ghose ghayalongile Imulungu.

Kuya kalamka nemitondotondo katsenga kwa ghamabwe hanu hakutambikila hasi mwe chidunda, kemitsa ghamabwe kumi na mbili ghawile ka ngutso ka pfatsili kolo kumi na mbili tsa Isiraeli. 5 Kuya kawatuma iwasongolo wamlapfile IMNDEWA nambiko tsa kulakatsighwa na kumsubutulila wang'ombe wamale ka nambiko tsa kukala tseghamba ne Imulungu. 6 Musa kasola idamu chidogho keka mna pfiya, na nusu ingi kamitsa hanu ha kulapfila nambiko. 7 Kuya kasola ichitabu che laghano lye Imulungu, kachisoma hambele he iwanu, nawo walonga, "Agho ghose ghayalongile IMNDEWA, tutsoghatenda na tutsoghakinda."

8 Musa kaisola idamu ila yekile mchiha, kawamitsila iwanu, kalonga, "Aino idamu ya laghano yalikile Imulungu na mwemwe, hayaweng'ile malaghitso ghano."

9 Kuya Musa, Aruni, Nadabu na Abihu ne iwabala sabini wa Isiraeli wadina kuchidunda. 10 Baho wamwona Imulungu wa Waisiraeli. Hane maghulu ghake tsahoneka ka ibahari ya chiyoo, kwenzeluka ka kulanga. 11 Naye Imulungu ng'awalaghile baye iwabala awo wa Waisiraeli. Wamwona Imulungu, waja na ukunwa.

12 IMNDEWA kamlongela Musa, "Utse kuno kuchidunda kwanili nene, nikwing'e ghamabwe ghanyandike ghamalaghitso ghangu ghose gha kuwalangulitsa Waisiraeli."

13 Kuya Musa koka na Yoshua, miyaghe iyomwapfilagha, kadina kuchidunda kwayali Imulungu. 14 Lekeni ng'ana yoke Musa tsakawalongela iwabala wala, "Mtubete hano mbaka hatutsakuya. Aruni na Huri wa hamwe namwe, imunu wowose ang'awa na lighomba yawaghendele wawo."

15 Musa kagheluka kuchidunda, na liwingu lighubika ichidunda. 16 Mng'alo we IMNDEWA ghuhulumka kuchidunda Sinai na liwingu lichighubika chidunda acho kwa ghamatsuwa sita. Litsuwa lya saba IMNDEWA kamkema Musa kulawa mna liwingu lila. 17 Mng'alo ghwe IMNDEWA tsaghwoneka kwa Waisiraeli ka ghumoto ighukwaka mchidunda. 18 Musa kengila mna liwingu lila, kagheluka kuchidunda. Kakala ako ghamatsuwa alubaini chilo ne imisi.