1 "Utengenetse sanduku lya kulakatsila nambiko kwa mibani ya mjoholo, chiwe na membe nne. Utali wake na ughatsi wake pfilingane, chila ubali uwe futi saba na nusu, na chimo chake chiwe futi nne na nusu. 2 Mna chila membe ye lisanduku utengenetse membe imwe ka ye mnyama. Tsimembe'tso tsiwe chinu chimwe na lisanduku'lyo, naghwe ulikandike shaba. 3 Utengenetse tsinongo tsake tso kulaghalila lipfu, tsikoleo tsake tso kulapfila lipfu, bakuli tsake, pfuma pfo kuhomela inyama, ne pfihali pfa kuhalila ghumoto. Pfinu pfose pfino pfitengenetsighwe kwa shaba. 4 Kuya ulitengenetsele wapfu wa shaba une bangili nne tsa shaba kune membe tsake nne. 5 Uwike wapfu awo mna ukingo we lisanduku ubali wa hasi ili upfike haghati mwe lisanduku. 6 Pfipfila utengenetse mifumbati ya mjoholo yo kudutila lisanduku alyo, nayo uikandike shaba. 7 Mifumbati ayo itsakwingitsighwa mna tsibangili tsila, ili ikale mna tsibanzi mbili tse lisanduku ahala halitsodutighwa. 8 Lisanduku alyo ulitengenetse kwe mibani, na mghati liwe mwatsi, ka pfipfila pfanikulanguse akula kuchidunda pfipfo pfautsolitengenetsa.

9 "Ikaye ayo ienzeluke iwe na luwa. Ubali wa Kusini we iluwa alwo wike mapanzia ighatendighwe kwa maghwanda matselu ighanoghile ghalebele, utali wake uwe futi miya na hamsini. 10 Tsingutso tse luwa tsiwe ishilini na pfikalilo pfake pfiwe ishilini. Apfo pfose pfiwe pfa shaba. Lekeni pfinanikilo na tsifito tsake tsiwe tsa fetsa. 11 Pfipfila ubali wa Kasikazini we iluwa alwo uwe na panzia line utali wa futi miya na hamsini, na tsingutso tsake tsiwe ishilini, na pfikalilo ishilini, apfo pfose pfiwe pfa shaba, lekeni pfinanikilo pfa tsingutso na tsifito, pfiwe pfa fetsa. 12 Na ughatsi we iluwa alwo ubali wa Maghalibi, lipanzia lyake litsakuwa na futi sabini na tano, na tsingutso kumi na pfikalilo pfake kumi. 13 Na ughatsi we iluwa alwo ubali wa Mashaliki kwaghuli ghumlango utsakuwa futi sabini na tano. 14 Lipanzia lya ubali umwe wa ghumlango, liwe na futi ishilini na mbili na nusu na tsingutso ndatu na pfikalilo pfake pfidatu. 15 Pfipfila mna ubali wa kabili we ghumlango, lipanzia liwe na futi ishilini na mbili na nusu, na tsingutso tsake ndatu na pfikalilo pfake pfidatu. 16 Hane ghumlango ghwe iluwa kuwe na panzia alyo kudiwa ghumlango, utali wake uwe futi salasini. Lipanzia alyo lidadatsighwe na nyutsi tsa langi ya buluu, nzambalau na ndung'u, na maghwanda matselu ighanoghile ighekighwe unzolingo udadatsighwe. Lipanzia alyo likindighwe na ngutso nne tsine pfikalilo pfine. 17 Tsingutso tsose itsitsunguluka iluwa tsikindisighwe kwa fito tsa fetsa, pfinanikilo pfake pfiwe pfa fetsa na pfikalilo pfake pfiwe pfa shaba. 18 Utali we iluwa alwo utsakuwa na futi miya na hamsini, ughatsi wake futi sabini na tano, na chimo chake chiwe futi saba na nusu, iluwa alwo luwe na panzia lya maghwanda matselu ighanoghile, na pfikalilo pfake pfiwe pfa shaba. 19 Pfinu pfose pfa kutumila mna ikaye ienzeluke, ipfitumika mna isang'ano yake yose, ne pfighingi pfake pfose, na ipfighingi pfose pfe iluwa pfiwe pfa shaba.

20 "Walaghitse Waisiraeli wakughalile mapfuta gha nzeituni ighalengele, agho ghawe gha kutuwila ichitasa, na iochitasa acho chakeghe ghamatsuwa ghose. 21 Aruni na iwanaghe watsochituwa ichitasa acho chakeghe mna Ikaye Ienzeluke kunze kwa lipanzia ilili hambele ha lisanduku lye laghano. Watsochika chakeghe hambele hangu kulawa hamihe mbaka hamitondo. Laghitso lino likindighwe na Waisraeli wose mna ghamatsuwa ghao ghose, na mna pfeleko pfao pfose.