1 Besaleli tsakatengenetsa sanduku kwa mbau tsa mjoholo, utali wake futi ndatu na lobo ndatu, ughatsi wake futi mbili na lobo na chimo chake futi mbili na lobo. 2 Kalikandika nzahabu iliyeka mghati na kunze, kuya kalitengenetsela kingamitsi ya nzahabu chila ubali. 3 Kuya kalitengenetsela bangili nne tsa nzahabu tso kulighalila, katsighela mna tsimembe tsake, bangili mbili ubali umwe, na bangili mbili ubali ungi. 4 Kuya katengenetsa mifumbati ya mjoholo na kaikandika nzahabu. 5 Na mifumbati'yo kaighela mna tsibangili itsili mna tsibali tsila mbili tsa lisanduku, iwe yo kulighalila.

6 Kuya katengenetsa chighubiko ichikemighwa hanu ha libatsi kwa nzahabu iliyeka, utali wake futi ndatu na lobo ndatu, na ughatsi wake futi mbili na lobo. 7 Pfipfila kahonda nzahabu kafina pfiumbe wabili wane mapamanilo iwakemighwe makelubi kaweka mna utsighilo we ichighubiko'cho, 8 kerubi yumwe mna utsighilo umwe, na kerubi wa keli mna utsighilo ungi. Kawafina makerubi'wo wawa chinu chimwe na ichighubiko'cho utsighilo uno na utsighilo ungi. 9 Makerubi welolesa, mapamanilo ghawo ghapamanyala ghaghubika chighubiko cha lisanduku, ne pfihanga pfawo tsapfinamila ichighubiko cha lisanduku.

10 Kuya tsakatengenetsa metsa ya mjoholo ine utali wa futi ndatu, na ughatsi wake futi imwe na nusu, na chimo chake futi mbili na lobo. 11 Tsakaikandika nzahabu iliyeka, na kuitengenetsela kingamitsi ya nzahabu. 12 Tsakaitsungulusila lufito line ughatsi wa lobo futi, na kaitengenetsela kingamitsi ya nzahabu. 13 Kuya katengenetsa bangili nne tsa nzahabu na katsighela mna tsimembe tsake hala haghatsighile matendeghu. 14 Bangili'tso tsa kukindila mifumbati ila ya kughalila tsatsikighwa habehi na ubau ula iutsungulusighwe. 15 Tsakatenda mifumbati mibili ya mjoholo ya kuighalila, kuya kaikandika nzahabu. 16 Kuya tsakatengenetsa pfinu pfa nzahabu iliyeka pfa kwika mchanya mwe metsa, pfisahani pfake, na pfikombe pfake na mabakuli gha nambiko tsa pfokunwa.

17 Kuya watengenetsa na chighutso che pfitasa kwa nzahabu iliyeka. Kalilo lyake, na lufito lwa chinu acho che ukwikila pfitasa tsapfikala chinu chimwe na pfikombe pfake, pfikonyo pfake na maluwa ghake, 18 nacho tsachikala na maputila sita ighalawile chila mlubapfu mwake, maputila madatu ubali uno na madatu ubali ungi wa chighutso. 19 Mne chila putila tsakukala na pfikombe pfidatu ipfighalile na maluwa gha mlotsi, chila chikombe na chikonyo chake na luwa lyake. 20 Na mna chighutso tsakukala na pfikombe pfidatu ipfighalile na maluwa gha mlotsi, na pfikonyo pfake na maluwa ghake. 21 Tsakukala na pea ndatu tsa maputila, hasi mwa chila pea tsakukala na chikonyo chimwe. 22 Pfikonyo, na maputila tsapfilumbitsighwa hamwe na chighutso che pfitasa, na chose tsachitengenetsighwa kwa nzahabu iliyeka. 23 Kuya katengenetsa na pfitasa pfake saba, mibato yake na tsisahani tsake kwa nzahabu iliyeka. 24 Tsakachitengenetsa chighutso che pfitasa na pfinu pfake kwa kilo salasini na tano tsa nzahabu.

25 Tsawatengenetsa sanduku lyo kupfukitsila upfumba kwa mibani ya mjoholo. Sanduku'alyo tsalikala la mlaba, utali wake futi imwe na nusu kwa sentimita ishilini mane na sano, chimo chake sentimita ishilini tisa. Membe tsake tsatsikala chinu chimwe na hanu henyegho hakupfukitsila upfumba. 26 Naye tsakahakandika nzahabu iliyeka, ubali we chanya na mlubapfu mwose, membe tsake, kuya tsakatenda kingamitsi ya nzahabu. 27 Tsakatengenetsa bangili mbili tsa nzahabu haisi he kingamitsi, hane tsibanzi mbili itsilolesa. Bangili'tso tsitumika kukindila mifumbati ya kuhaghalila. 28 Tsakatengenetsa mifumbati mibili ya mjoholo na kuikandika nzahabu. 29 Kuya tsakatengenetsa ghamafuta ghanoghile gha kubaka, na upfumba iunung'ila ghoya iuanganyighwe naipfinu pfinung'ila ghoya.