1 Imulungu tsakalonga agha, tsakalonga,

2 "Nene iyo IMNDEWA, Imulungu wako, yanikulapfile mna isi ya Misiri, kwaukalile mtumwa.

3 "Uleke kuwa na milungu mingi ila nene niliyeka.

4 "Uleke kwitendela mwenyegho chinyagho ichighalile na ichinu chochose ichili kulanga, ichili muisi au mna ghamatsi hasi mwe isi. 5 Uleke kuchinamila wala kuchitambikila kwaapfila nene IMNDEWA, Imulungu wako, na Imulungu yane chepfu. Nowahigha iwana kwa nzambi tse aba tsawo, mbaka mweleko wa kadatu na mweleko wa kane wa awo iwonihila, 6 lekeni nonoghelwa na maelufu ya pfeleko iyaniwanoghela na kukinda ghamalaghitso ghangu.

7 "Uleke kulitumila pfihile taghwa lya Imfalume, Imulungu wako, kwaapfila nene IMNDEWA nitsomlagha ayula iyotumila pfihile taghwa lyangu.

8 "Uleke kulisemwa Litsuwa lya kubwihila, ulideghese. 9 Ghamatsuwa sita utende sang'ano, utende pfinu pfako pfose, 10 lekeni litsuwa lya saba, alyo Litsuwa lya kubwihila lya IMNDEWA, Imulungu wako. Litsuwa alyo uleke kutenda ng'onde yoyose, ghweghwe, wala imwanagho mmale wala imwanagho pinga, wala mtumwa wako mmale, wala mtumwa wako pinga, wala mnyama wako wa kufugha, wala mgheni iyali mkaye mwako. 11 Kwaapfila kwa ghamatsuwa sita nene IMNDEWA tsanilumba lilanga na iisi, ibahari na pfose ipfili mumo, kuya mna litsuwa lya saba tsanibwihila. Apfo nene IMNDEWA nilibaliki Litsuwa lya kubwihila, nilideghesa."

12 "Wateghelese aba wako na mai wako, ili ukale ghamatsuwa mengi mna isi iyanitsokwing'a nene IMNDEWA, Imulungu wako.

13 "Uleke kumkoma imunu.

14 "Uleke ughoni.

15 "Uleke ukwiba.

16 "Uleke kum'bangitsila miyagho.

17 "Uleke kusulukila ing'anda ya miyagho, uleke kumsulukila mwehe wake wala mtumwa wake, ng'ombe wake wala punda wake, au ichinu chochose cha miyagho."

18 Iwanu hawahulike ukuduma na kona lumwesa lwakwaka na kuhulika litsi lya malati mna chidunda acho ichikali cholawa lihotsi, wose tsawapfuka, wadedema. Tsawema kutali, 19 wamlongela Musa, "Ulonge na twetwe ghweghwe umwenyegho, na twetwe tutsokuteghelesa, lekeni IMNDEWA Imulungu yaleke kulonga na twetwe, hela tutsakufa."

20 Musa kawalongela, "Mleke kupfuka, kwaapfila Imulungu katsa kumghetsani ili mumtamanile yeye ghamatsuwa ghose na mleke kutenda nzambi." 21 Iwanu hawemile kutali, Musa tsakaghenda habehi na liwingu lila tito kwayakalile Imulungu.

22 IMNDEWA kamlongela Musa yawalongele Waisiraeli, "Mwemwe muwenyegho tsamuhulika pfanilongile namwe kulawa kulanga. 23 Mnitamanile nene niliyeka, mleke kwitendela milungu ya fetsa wala nzahabu. 24 Mnitsengele hanu ha kutambikila ha lidongo, baho mtsonitambikila iwang'olo wenu na wang'ombe wenu ka nambiko tsa kulakatsighwa na nambiko tsa ukukala tseghamba ne Imulungu. Hanu hohose hanihabaghule mwemwe mnitamanile, nitsakutsa baho na kumbalikini. 25 Mng'anitendela hanu ha kutambikila ha ghamabwe, mleke kuhatsenga kwa ghamabwe ighasongolighwe, kwaapfila mng'atumila pfinu pfa ukusongolela ghamabwe, ng'ahatsakuwa hanu hanoghile kuna nene. 26 Kuya mleke kutsenga hanu ha kutambikila hane pfidanando, hela imunu yang'adina mchanya mwake katsokala mwatsi.