1 Kuya Musa na Aruni wamghendela mfalume wa Misiri, walonga, "Imfalume, Imulungu wa Isiraeli, kolonga apfi, ‘Walekelele iwanu wangu woke, wakanendele chihungo kulwanda.’ "

2 Imfalume kawaghutsa, "Angu IMNDEWA Imulungu yali nani? Ebali nimtegheletse yeye na niwaleke Waisiraeli woke? Nene simmanyile baye IMNDEWA ayo, wala siwalekelela baye Waisiraeli woke."

3 Musa na Aruni wamwidika, "Imulungu wa Waeburaniya tsaketingana na twetwe. Lelo tulekelele tughende kunyika kwa ghamatsuwa madatu tukamtambikile Imfalume, Imulungu wetu. Tung'aleka kutenda apfo, katsotukoma kwa utamu au kwa ing'ondo."

4 Lekeni mfalume wa Misiri kawalongela, "Musa na Aruni, ebali mwobama kuwalapfa iwanu mna tsisang'ano tsawo? Walongeleni iwanu woye mna tsisang'ano tsawo!" 5 Kuya Farao kalonga, "Mlole, iwanu wenu wa wengi kubita Wamisiri, lelo mwobama weme kusang'ana!"

6 Litsuwa lilila Farao kawalaghitsa Wamisiri iwowemila iwanu, kalonga, 7 "Kulawa leloli mleke kuwaghalila iwanu wano mitsani ya ukufatulila matofali. Walekeni wenyegho waghende kuibama. 8 Lekeni wobamighwa watende matofali mengi ka aghala ighang'ali ghotendighwa mwanduso, lileke kuhunguka hata tofali limwe. Wahela ng'onde ya ukusang'ana, ndo mana wombama niwalekelele waghende kumlapfila nambiko Imulungu wawo! 9 Muwongetsele iwanu wano sang'ano ng'omu ng'ani waghaye, waleke kuhulikitsa ughutsu."

10 Kuya iwemilitsi na iwakulu we iwanu wawaghendela Waisiraeli, walonga, "Farao kolonga apfino, ‘Sitsowaghalila keli imitsani. 11 Mwemwe muwenyegho mghende kuibama kwokwose kwamuyona, lekeni isang'ano yenu ng'aitsohunguka baye.’ " 12 Apfo iwanu wapwililika Misiri yose kubama imitsani. 13 Nawo iwemilitsi wawo wawananaitsa, wawalongela, "Mmalitse sang'ano yenu ya chila litsuwa, ka pfawang'ali womghalilani imitsani." 14 Wemilitsi Wamisiri tsawawatowa iwakulu we isang'ano wa Waisiraeli iwasaghulighwe wemile isang'ano, wawalongela, "Ebali ng'ammalitsa baye ing'onde yenu na ng'amtenda ka pfamng'ali mtendagha aho mwanduso?" 15 Baho iwakulu we isang'ano wa Waisiraeli wamghendela Farao, wamlilila, walonga, "Ule kwotutendela apfi twetwe iwatumwa wako? 16 Ng'atukwing'ighwa keli baye imitsani, aku twobamighwa kutenda matofali, kuya twetwe watumwa wako twotowighwa, lekeni iwatotsile iwanu wako."

17 Lekeni Farao kalonga, "Mwa wadebwe mwemwe, mwolonga, ‘Tulekelele tughende tukamlapfile nambiko IMNDEWA,’ Kwaapfila ng'ambama baye ukusang'ana. 18 Lelo ghendeni mkasang'ane, ng'amtsakwing'ighwa imitsani yoyose, na mfatule matofali ka pfamng'ali mtendagha." 19 Apfo awo iwakulu we Waisiraeli hawalongelighwe ka matofali ghawobamighwa kutenda chila litsuwa ghaleke kuhunguka, webona ka wamna maghayo.

20 Hawalawile kwa Farao, tsawetingana na Musa na Aruni yawang'ali wowabeta, 21 wawalongela, "IMNDEWA yalole chinu chino, yawahighe mwemwe kwaapfila mumtenda mfalume na iwakulu wa Misiri watuhile. Muweng'a imbuli ya ukutukomela twetwe!"

22 Kuya Musa kamuhundukila IMNDEWA, kalonga, "Ghwe IMNDEWA ebali kowatendela ghehile iwanu wano? Ule unitumile? 23 Kwaapfila kulawa hanighendile kulonga na Farao kwa taghwa lyako, kawatendela ghehile iwanu wano. Naghwe ng'utendile chinu chochose kuwakombola iwanu wako!"