1 Waisiraeli wose tsawoka mna inyika ya Sini, waghenda kulawa hanu hamwe mbaka hanu hangi ka IMNDEWA pfayalaghitse. Watsenga pfibumbulika wabwihile ako Refidimu. Lekeni ako tsakuduhu ghamatsi gho kunwa. 2 Apfo iwanu wesonga na Musa, walonga, "Utwing'e ghamatsi tunwe."

Musa kawaghutsa, "Ule mwisonga na nene? Mbona mwomghetsa IMNDEWA?" 3 Lekeni wose tsawana ing'ilu sideke, wamnung'unikila musa, walonga, "Ebali utulapfile Misiri utukome kwa ng'ilu twetwe wose ne iwanetu ne iwanyama wetu?"

4 Apfo Musa kamlilila IMNDEWA, kalonga, "Nitendetse nene ne iwanu wano? Wahabehi ghendo kunitowa na ghamabwe."

5 IMNDEWA kamlongela Musa, "Ulongole hambele ha iwanu wano, uwasole iwabala wawo, na ukinde mmoko mwako ing'weku ila yautowele ghumto Naili. 6 Nitsakwima hambele ako Horebu, hane libambalawe, naghwe kutsolitowa libambalawe alyo ne ng'weku yako, ghamatsi ghatsolawa mna libambalawe alyo, na iwanu wose watsakunwa." Musa katenda pfipfo aku iwabala wa Waisiraeli womlola.

7 Hanu aho Musa tsakahakema Masa na Meriba kwaapfila Waisiraeli tsawesonga na wamghetsa Imulungu, tsawalonga, "Apfi Imulungu ghendo ka hamwe na twetwe?"

8 Waamaleki tsawatsa kwitowa ne Waisiraeli ako Rafidimu. 9 Musa kamlongela Yoshua, "Saghula wamale mghende mketowe ne Waamaleki. Ilupfi nitsakwima kuchanya aku nikinda ing'weku ila iyanongele Imulungu nikinde." 10 Yoshua tsakatenda ka Musa pfayamlaghitse, kaghenda kwitowa ne Waamaleki. Lekeni Musa na Aruni na Huri, wao tsawadina kuchanya. 11 Musa hayenule ghamoko ghake kuchanya, Waisiraeli tsawahuma, lekeni hayauhulumse Waamaleki tsawahuma. 12 Ghamoko gha Musa haghepfile, Aruni na Huri wasola libwe kulu wamghalila Musa yakalile. Kuya waghakindilitsa ghamoko ghake, Yumwe kenula ghumoko ghwa kujilo na yungi kenula ghumoko ghwa kumoso. Apfo ghamoko gha Musa ghagholoka uchanya mbaka litsuwa haliswele. 13 Kwa kutenda apfo Yoshua tsakawatowa ghendo Waamaleki.

14 Imulungu kamlongela Musa, "Uchandike mchitabu chinu chino, chiwakumbuse. Kuya umlongele Yoshua ka nene nitsowakoma ghendo Waamaleki wahupe." 15 Musa tsakatsenga hanu ha kutambikila, kahakema hanu aho, "IMNDEWA yuyo ibendela yangu." 16 Kalonga, "Mwinule uchanya bendela ye IMNDEWA! Imulungu katsetowa na Waamaleki kulawa lukolo mbaka lukolo lungi."