1 Kuya IMNDEWA kamlongela Musa, "Ghenda kwa Farao umlongele, ‘Imulungu kolonga apfi, uwalekelele iwanu wangu woke wakanitamanile. 2 Ung'alema kuwalekela woke, nitsoitowa isi yako yose kwa kuighalila pfibutwa. 3 Ghumto Naili ghutsomema pfibutwa, nawo watsopfika mbaka mng'anda mwako, mna chiheleto chako cha kuwasa, mna lusatsi lwako, na mng'anda mwa pfilongotsi wayagho na iwanu wako. Pfibutwa awo watsakwingila mpfikong'o mwenu, hata mna pfinu pfenu pfa kukandila usaghe. 4 Pfibutwa watsodina mlukuli mwako, mna ng'uli tse iwanu wako na iwatawala weyagho.’ "

5 Kuya IMNDEWA kamlongela Musa, "Mlongele Aruni yenule ng'weku yake mchanya mwe imito, mchanya mwe tsimbwimbwi na matsiwa, pfibutwa watsolawa mumo na ukwenela chila hanu mna isi ya Misiri." 6 Apfo Aruni kagholosa ng'weku yake mchanya mwe ghamatsi ghose. Bahala pfibutwa walawila waighubika isi yose ya Misiri. 7 Lekeni wahawi wa Misiri kwa uhawi wawo nawo wawaghala pfibutwa mna isi ya Misiri.

8 Baho Farao kawakema Musa na Aruni, kawalongela, "Mlombeni IMNDEWA yawalapfe pfibutwa kuna nene na kwe iwanu wangu, nani nitsowalekela Waisiraeli woke kumtambikila IMNDEWA."

9 Musa kamwidika Farao, "Ona nongele lelo, tsuwachi kobama nikulombele kwe Imulungu, niwalombele watawala wako ne iwanu wako. Nitsomlomba yawakome pfibutwa iwali mna tsing'anda tsenu, watsokala iwali kumto waliyeka."

10 Farao kedika, "Nombele ilupfi."

Musa kamwidika, "Nitsotenda ka pfaulongile ili umanye ka kuduhu wowose yeghala ne IMNDEWA, Imulungu wetu. 11 Pfibutwa watsolawa mng'anda mwako, mna tsing'anda tse iwatawala wayagho na iwanu wako. Watsosighala awala iwali kumto waliyeka." 12 Apfo Musa na Aruni woka ukaye kwa Farao, na Musa kamlomba IMNDEWA yawalapfe pfibutwa iyawaghalile kwa Farao. 13 IMNDEWA katenda ka Musa pfayalombile, pfibutwa wala wafa mna tsing'anda, mpfitala na mmighunda. 14 Iwanu tsawawakunga hamwe pfibutwa awo, waweka malundolundo, na isi yose tsainung'a. 15 Lekeni Farao hayonile pfibutwa wafa, kaghendelela kuwa msughu, ng'awahulikitse tsina Musa na Aruni ka IMNDEWA pfayalongile.

16 Kuya Imulungu kamlongela Musa, "Mlongele Aruni yagholose ng'weku yake yalitowe litimbwisi, nalyo lyakuwa mvupfu mna isi yose ya Misiri." 17 Apfo Aruni kagholosa ghumoko ghwake kalitowa timbwisi, na timbwisi lyose mna isi ya Misiri liwa mvupfu. Nawo wawatambala iwanu ne iwanyama. 18 Wahawi wa Misiri nawo kwa uhawi wawo waghetsa kughalusa timbwisi liwe mvumvu, lekeni ng'awadahile baye. Mvumvu awo tsawenela chila hanu. 19 Baho iwahawi awala wamlongela Farao, "Aino isang'ano ye Imulungu!" Lekeni Farao kaghendelela kuwa msughu, ng'awahulikitse baye tsina Musa na Aruni. Ka apfila pfayalongile IMNDEWA.

20 Kuya IMNDEWA kamlongela Musa, "Ilupfi ulamke nemitondotondo umghendele Farao hayoghenda kumto umlongele, ‘IMNDEWA kolonga apfi, walekelele iwanu woke wakanitambikile. 21 Ung'alema kuwalekelela woke, nitsowaghalila pfunge lye wang'onzi wawadese, ghweghwe na iwatawala wayagho na iwanu wako wose. Watsakwingila mna tsing'anda tsenu na tsing'anda tsose tsa Wamisiri tsitsomema wang'onzi, isi yose itsakwenela wang'onzi. 22 Lekeni nitsoibaghula isi ya Gosheni, kwawokala iwanu wangu ileke kuwa na wang'onzi. Baho ghweghwe kutsomanya ka nene IMNDEWA nosang'ana muisi mwako. 23 Nitsowakinga iwanu wangu na aghala ighatsowapata iwanu wako. Chihulo chino chitsolawila ilupfi.’ " 24 IMNDEWA katenda ka pfayalongile, tsakaghala mapfunge makulu ghe iwang'onzi, wapfingilila mng'anda mwa Farao, na mna tsing'anda tsa watawala wayaghe, mna isi yose ya Misiri. Iwang'onzi awala waihinya isi yose ya Misiri.

25 Kuya mfalume kamkema Musa na Aruni kawalongela, "Mwodaha kughenda mkamlapfile nambiko Imulungu wenu, lekeni mumuno mna isi aino."

26 Lekeni Musa kamwidika, "Mbe! Ng'apfinoghile baye kutenda apfo, kwaapfila nambiko yatutsomlapfila IMNDEWA, Imulungu wetu, tsitsowehila Wamisiri. Na tung'awalapfila nambiko itsiwehila, ambe watsotutowa na ghamabwe? 27 Twobamighwa tughende ghumwanza ghwa ghamatsuwa madatu kunyika tukamtambikile Imulungu wetu ka pfayatulaghitse."

28 Farao kalonga, "Nitsowalekelela mghende mkamtambikile IMNDEWA wenu kunyika, lekeni mleke kughenda kutali ng'ani. Lelo mnombele."

29 Musa kamwidika, "Bahala hanitsakuka, nitsomlomba IMNDEWA mapfunge ghe iwang'onzi ilupfi ghalawe kuna ghweghwe Farao, iwatawala wayagho na iwanu wako. Lekeni uleke kutughutsukila keli kwa ukulema kuwalekelela iwanu waghende kumtambikila IMNDEWA."

30 Musa koka ukaye kwa Farao, kamlomba IMNDEWA, 31 na IMNDEWA katenda ka Musa pfayalombile. Wang'onzi walawa mng'anda mwa Farao, iwatawala wayaghe na iwanu wake. Ng'asighale baye hata ng'onzi yumwe. 32 Lekeni hata litsuwa lino Farao kaghendelela kuwa msughu, ng'awalekele baye Waisiraeli woke.