1 Litsuwa limwe Musa yang'ali yodima iwang'olo ne iwamene wa Yetiro, aba wake mkwe, imtambika wa Midiani, tsakalilongotsa kingilli lye iwanyama awo mbaka ubali ungi we inyika, kapfika Horebu chidunda cha Imulungu. 2 Baho malaika we IMNDEWA kamlawila ka lambi lya ghumoto ilikwaka mghati mwe chibagho. Musa kachona chibagho chakwaka ghumoto, lekeni ng'achilakala baye. 3 Kalonga, "Achi chihulo! Hebali chibagho chino ng'achilakala baye? Leka tanu ng'ende habehi mbone."

4 IMNDEWA Imulungu hayonile Musa kakutsa habehi, kamkema kulawa mna ichibagho achila, kalonga, "Musa! Musa!"

Musa kedika, "Ooh."

5 Imulungu kalonga, "Uleke kutsa habehi, tsula imikwabatsa yako, kwaapfila kwakwima hanu haenzeluke. 6 Nene na Imulungu wa iwabala wako, Abrahamu, Isaka na Yakobu." Apfo Musa kapfisa uhanga wake, kwaapfila tsakapfuka kumlola Imulungu.

7 Kuya IMNDEWA kalonga, "Niwona iwanu wangu pfawodununzika ghendo ako Misiri na nihulika chililo chawo ichitendighwa na iwemilitsi wawo. Nomanya pfawodununzika, 8 apfo nihulumka kuwakombola mna ghamoko gha Wamisiri na kuwaghala mna isi inoghile, isi ine lidongo linoghile na inoghile kufughila iwanyama, isi yawokala Wakanani, Wahiti, Waamori, Waperisi, Wahipfi na Wayebusi. 9 Nihulika ghendo chililo che iwanu wangu, kuya mbona Wamisiri pfawowadununza. 10 Lelo nokutuma kwa Farao mfalume wa Misiri ukawalapfe iwanu wangu mna isi yake."

11 Musa kamlongela Imulungu, "Angu nene nili nani mbaka nimghendele mfalume Farao na kuwalapfa Waisiraeli mna isi ya Misiri?"

12 Imulungu kamwidika, "Nene nitsakuwa hamwe naghwe, achino chitsakuwa chitango ka nene nikutuma. Hautsowalapfa Misiri iwanu, mtsonitambikila mna chidunda chino."

13 Lekeni Musa kedika, "Hanitsowaghendela Waisiraeli na kuwalongela, ‘Imulungu wa iwabala wetu kanituma kuna mwemwe,’ Hawatsonighutsa ‘Taghwa lyake nani?’ Kuya nitsowalongelatse?"

14 Imulungu kamwidika, "Walongele apfino, ayula iyokemighwa ‘Nene yeye Yuyo, kanituma kuna mwemwe.’ " 15 Walongele Waisiraeli, Nene na IMNDEWA, Imulungu we iwahenga wenu, Imulungu wa Abrahamu, Isaka na Yakobu nikutuma kuna wawo. Alino taghwa lyangu ghamatsuwa ghose, apfino pfipfo iwanu pfawatsonikema. 16 Ghenda uketingane na iwabala wa Isiraeli uwalongele, Imfalume, Imulungu wa aba tsenu, Imulungu wa Abrahamu, Isaka na Yakobu kandawila kalonga, Niwalola kuya mbona aghala ghamtendelighwa ako Misiri. 17 Nilamla niwalapfe mna maghayo ghenu ako Misiri na nitsowaghala mna isi ine lidongo linoghile na inoghile ukufughila iwanyama, yawokala Wakanani, Wahiti, Waamori, Waperisi, Wahiti na Wayebusi.

18 "Iwanu wangu watsokutegheletsa, ghweghwe na iwabala wa Waisiraeli mtsomghendela mfalume wa Misiri kumlongela, ‘IMNDEWA wa Waeburaniya, katulawila. Lelo utuleke tuke ghumwanza ghwa ghamatsuwa madatu kunyika, tukamtambikile Imfalume, Imulungu wetu.’ 19 Nomanya mfalume ayo wa Misiri ng'atsowalekelela baye mke mbaka ghumoko ghune ingupfu ghumnanaitse. 20 Apfo nitsogholosa ghumoko ghwangu ghune ngupfu kuitowa isi ya Misiri kwa pfihulo pfanitsotenda amwo. Hambele katsowalekelela mghende."

21 "Kuya nitsowatenda Wamisiri wawakunde Waisiraeli, na hamkuka ng'amtsolawa ghamoko ghaliheka baye. 22 Chila ipinga Mweburaniya katsomlomba ipinga Mmisiri iyokala habehi yake, au mgheni yali mkaye mwake, yamwing'e pfinu pfa fetsa au pfa nzahabu hamwe na maghwanda. Mtsowapfatsa iwanenu iwamale ne iwapinga. Apfo pfipfo pfamtsowaboka Wamisiri pfinu pfawo."