1 Musa tsakawakema iwanu wose wa Isiraeli, kawalongela, "Achino chicho chayalaghitse IMNDEWA mchitende. 2 Matsuwa sita mtsosang'ana ng'onde tsenu, lekeni tsuwa lya saba litsakuwa lya Sabato, litsuwa lienzeluke kwe IMNDEWA. Imunu wowose iyosang'ana mna litsuwa alyo yakomighwe. 3 Mne litsuwa lya Sabato hata ghumoto mleke kubwina mna tsikaye tsenu."

4 Musa kawalongela Waisiraeli wose, "Achino chicho chayalaghitse IMNDEWA mchitende. 5 Mumlapfile pfinu IMNDEWA, chila munu yane ghumoyo ghunoghile yamghalile IMNDEWA pfinu'pfino, nzahabu, fetsa, shaba, 6 nyutsi tsa langi ya buluu, tsa nzambalau, ndung'u, maghwanda matselu ghanoghile ighadadatsighwe, mighala ya mene, 7 ngotsi tsa ng'olo mmale itsighelighwe udung'u, ngotsi tse iwamene, mbau tsa mjoholo, 8 ghamafuta ghe pfitasa, pfilungo pfikwikighwa mna ghamafuta gho kubaka na mna upfumba iunung'ila ghoya, 9 mabwe gha bei ng'ulu ighokemighwa sadoniki, na mabwe ghangi gha kwikila unzolingo mna chitsibau na chikoba cha mmambagha.

10 "Chila munu iyakubuhu mna sang'ano yoyose mna mwemwe, yatse yatende agho ghose ghayalaghitse IMNDEWA, 11 yatengenetse lihema, chighubiko chake na chighubiko cha kunze, pfifungo pfake, tsifito tsake, pfikalilo pfake, 12 sanduku lya laghano na mifumbati yake ya kulighalila, hanu ha libatsi, panziya ilidiwa hanu Haenzeluke ghendo, 13 metsa na mifumbati yake, pfinu pfake pfose, pfighate ipfikighwe hambele he IMNDEWA, 14 chighutso cha kwikila pfitasa na pfinu pfake pfose, pfitasa pfake na ghamafuta ghake, 15 sanduku lya kudusulila upfumba na mifumbati yake, ghamafuta gha kubaka na upfumba iunung'ila ghoya, panziya lyo kudiwa ghumlango ghwa Lihema Lienzeluke, 16 lisanduku lya kulapfila nambiko tsa kulakatsighwa hamwe ne wapfu wa shaba, mifumbati yake na pfinu pfake pfose, bigha kulu lya shaba na kalilo lyake, 17 panziya lye luwa, ngutso tsake na pfikalilo pfake, lipanziya lya ghumlango ghwe luwa, 18 pfighingi pfa Lihema Lienzeluke na pfe iluwa, hamwe na mitsabi yake, 19 maghwanda ighadadatsighwe ghoya, ighaenzeluke, ighopfalighwa na mtambika Aruni ne iwanaghe ahala hawakwingila hanu haenzeluke kunisang'anila."

20 Kuya iwanu wose wa Isiraeli woka hambele ha Musa, 21 na chila imunu kamlapfila IMNDEWA pfinu pfa Lihema lyo kwitinganila ka ghumoyo ghwake pfaghubama. Tsawalapfa chila chinu ichibamighwe kwe sang'ano yose yo kutambikila na kwa kutengenetsela maghwanda ighaenzeluke. 22 Watsa wose wane ghumoyo ghwa kulapfa, iwapinga ne iwamale, tsawalapfa pfipini, tsipete, tsiheleni, tsibangili na chila chinu cha nzahabu. Chila munu tsakamghalila IMNDEWA chinu cha nzahabu. 23 Chila munu yakalile kana nyutsi tsa langi ya buluu, nzambalau, ndung'u, au maghwanda matselu ghanoghile, mighala ye iwamene au ngotsi ye iwang'olo iighelighwe udung'u katsa kapfilapfa. 24 Wose iwadahile kughala fetsa au shaba tsawaghala kwa IMNDEWA ka nambiko tsawo. Pfipfila imunu wowose iyakalile na mbau tsa mjoholo tsakatsighala. 25 Wapinga wose iwakengele tsawafoghosa kwa ghamoko ghawo kuya wapfighala ipfinu pfila pfawafoghose, pfa nyutsi tsa langi ya buluu, nzambalau, ndung'u na maghwanda matselu ighanoghile. 26 Iwapinga wose wane ghumoyo gho kusang'ana tsawafoghosa mighala ya mene. 27 Na pfilongotsi tsawaghala ghamabwe gha bei ng'ulu gha sadoniki na ghamabwe ghangi gha kwikila unzolingo mna chitsibau na chikoba cha mmambagha, 28 pfipfila tsawaghala pfilungo, mafuta gha pfitasa, ghamafuta gho kubaka, na upfumba iunung'ila ghoya. 29 Waisiraeli wose iwapinga ne iwamale wane mimoyo ideng'elele ukumlapfila IMNDEWA, wamlapfila pfinu kwaajili ya sang'ano iyawalaghitse kubitila Musa waitende.

30 Kuya Musa kawalongela Waisiraeli, "Mlole! IMNDEWA kamsaghula Besaleli, imwana wa Uri, ayo Uri aba wake tsa Huri wa kabila lya Yuda. 31 Kammemesa Ghumuhe ghwake, kamwing'a ihekima, tsimbutsi, na uwetso, kamtenda yadahe kutenda tsisang'ano tsose, 32 yatende sang'ano tsinoghile, mna pfinu pfe nzahabu, fetsa na shaba, 33 mna ukusongola ghamabwe gha kuhambila na mna kusongola tsimbau, kwaajili ya sang'ano tsose tsa ufundi. 34 Kuya kamtenda yeye na Oholiabu, mwana wa Ahisamaki, wa kabila lya Dani wadahe kuwalangulitsa iwanu wangi. 35 Kaweng'a udaha wa kutenda chila sang'ano iitendighwa ne iwanu iwoghela unzolingo, au iwanu iwohamba kwa nyutsi tsa buluu, tsa nzambalau na ndung'u na maghwanda matselu ighanoghile. Wodaha kutenda sang'ano tsose tsa ufundi.