1 Tsawatumila nyutsi tsa langi ya buluu, nzambalau na ndung'u kutengenetsela maghwanda gha kusang'anila Ikaye Ienzeluke. Tsawamtendela Aruni maghwanda mahenzeluka ka IMNDEWA pfayamlaghitse Musa. 2 Tsawatengenetsa chitsibau kwa chitambala chitselu chinoghile, na wachihamba kwa nyutsi tsa nzahabu, buluu, nzambalau na ndung'u. 3 Tsawatengenetsa pfibamba pfisisili pfe nzahabu, watsighana nyutsi ndodondodo ili watsidadatse hamwe na nyutsi tsa buluu, nzambalau, ndung'u, na chitambala chitselu chinoghile. 4 Chitsibau'cho tsachipfalighwa kwa mitsabi mili mmahegha iidadatsighwe hane membe tsake mbili. 5 Msipi ighutendighwe pfinoghile mchanya mwake ili kuchoela tsaghukala chinu chimwe na chitsibau'cho, kuya tsapfitengenetsighwa kwa pfinu pfipfo, nzahabu, nyutsi tsa langi ya buluu, nzambalau, ndung'u, na chitambala chinoghile ka IMNDEWA pfayamlaghitse Musa. 6 Kuya watengenetsa mabwe gha bei ng'ulu gha sadoniki, wagheka mna pfikindilo pfa nzahabu, nagho ghandikighwa mataghwa kumi na meli gha wana wa Isiraeli ka imunu pfayakwandika ghumuhuli kwa ukukwangula. 7 Tsawagheka ghamabwe agho mna pfihande pfa mmahegha mwe chitsibau acho ili kuwakumbuka iwana wa Isiraeli, ka IMNDEWA pfayamlaghitse Musa.

8 Tsawatengenetsa chikoba cha mmambagha ka pfawachitendile chitsibau chila, kwa nyutsi tsa nzahabu, buluu, nzambalau, ndung'u, mna chitambala chitselu chinoghile. 9 Chikoba acho tsachikala cha mlaba, utali wake nchi tisa na ghatsi wake nchi tisa, kuya tsachibetighwa. 10 Chikoba acho tsachihambighwa milia mine ya ghamabwe gha bei ng'ulu, mlia ghwa mwanduso tsaghukala ghwa akiki, topasi, na alimasi ndung'u, 11 Mlia ghwa kabili tsaghukala ghwa tsumalidi, yakuti samawi na alimasi, 12 mlia ghwa kadatu tsaghukala ghwa yasinto, akiki ndung'u na amesisto, 13 na mlia ghwa kane tsaghukala ghwa tsabalajadi, shohamu na yasipi, ghose tsaghaghumighwa mna pfikindilo pfa nzahabu. 14 Apfo tsahana mabwe kumi na meli ighandikighwe mataghwa gha wana wa Isiraeli. Tsaghandikighwa kwa kukwangula ka pfawakwandika ghumuhuli, chila libwe lyandikighwa taghwa kulangusa wana kumi na meli gha Isiraeli. 15 Tsawachitengenetsela chikoba cha mmambagha mikufu ya nzahabu iliyeka. 16 Tsawatengenetsa pfikindilo pfibili pfa nzahabu iliyeka na bangili mbili tsa uchanya tsa chikoba acho. 17 Mikufu ayo mili ya nzahabu tsawayoha hane bangili'tso tsa chikoba cha mmambagha. 18 Kusa kwe imikufi ayo mili ye nzahabu tsawakunanika kune pfikindilo pfibili, wapfikindilisa kune pfihande pfila pfa mmayegha pfe chitsibau, ubali wa hambele. 19 Tsawatengenetsa bangili mbili tsa nzahabu, watsika hane membe mbili tsa hasi ubali wa mghati wa chikoba acho cha mmambagha habehi na chitsibau. 20 Tsawatengenetsa bangili tsingi mbili tsa nzahabu na kutsika hambele mna ncha tsa hasi tsa pfihande pfa chitsibau, hanu hachilumba na msipi ighutendighwe pfinoghile. 21 Tsawoha chikoba cha mmambagha hane chitsibau kwa kutsoha bangili tsake na chitsibau kwa lutsabi lwa bululu, ili chikoba acho chileke kuleghela ili chikalile msipi ghula ighutengenetsighwe pfinoghile, ka IMNDEWA pfayamlaghitse Musa.

22 Tsawatengenetsa joho tali lya buluu yo kupfala mghati mwe chitsibau. 23 Nalyo tsalina tobo mghati lya kwingitsila litwi, litobo alyo tsalitsungulusighwa mindo iidadatsighwe ghoya ili lileke kudegheka. 24 Hane mindo ya hasi ya lijoho tsawahamba kwa makomamanga gha buluu, nzambalau, madung'u, na chitambala chitselu chinoghile. 25 Kuya tsawatengenetsa mbughi tsa nzahabu, na chila haghati ha komamanga tsaweka mbughi. 26 Apfo, mbughi na komamanga tsapfilongotsa kutsunguluka mindo ya lijoho'alyo, ili kutumika ka IMNDEWA pfayamlaghitse Musa.

27 Kuya wawatengenetsela Aruni ne iwanaghe kanzu tsa chitambala chitselu chinoghile, 28 chilemba cha chitambala chinoghile, kofia tsa chitambala chitselu chinoghile, kaputula tsa chitambala chitselu chinoghile, 29 na misipi ya chitambala chitselu chinoghile, kwa nyutsi tsa langi ya buluu, nzambalau, ndung'u na kuihamba pfinoghile, ka IMNDEWA pfayamlaghitse Musa. 30 Kuya tsawatengenetsa chibamba cha nzahabu iliyeka kwaajili ya pembelo henzeluka na kwandika mchanya mwake ka pfawakwandika muhuli, "ILAPFIGHWA KWA IMNDEWA IMULUNGU." 31 Kuya tsawachoha hambele ha chilemba achila kwa msipi ghwa langi ya buluu, ka IMNDEWA pfayamlaghitse Musa.

32 Apfo isang'ano yose ya Lihema lya Kwitinganila imala. Waisiraeli watenda ghose ka IMNDEWA pfayamlaghitse Musa. 33 Wamghalila Musa Lihema na ipfinu pfake pfose na pfinanikilo pfake na fulemu tsake, mifumbati yake, ngutso tsake, na pfikalilo pfake, 34 na chighubiko cha ngotsi tsa ng'unzu we ng'olo tsighelighwe langi ndung'u, na chighubiko cha ngotsi tsa mene, panzia lya Ikaye Ienzeluke, 35 sanduku lya laghano, na mifumbati yake, na ichighubiko chake ichili hanu ha libatsi, 36 imetsa na pfinu pfake na ipfighate ipfilapfighwe kwe Imulungu, 37 ne chighutso che pfitasa cha nzahabu iliyeka na pfitasa pfake na pfinu pfake hamwe na ghamafuta kwaajili ya pfitasa apfo, 38 sanduku lya nzahabu, mafuta gha kubaka, upfumba iunung'ila ghoya, na panzia lya ghumlango lya Lihema, 39 lisanduku lya shaba, iwapfu wake wa shaba, na imifumbati yake na pfinu pfake pfose, libigha na kalilo lyake, 40 mapanzia gha luwa na tsingutso tsake na pfikalilo pfake, panzia lya ghumlango ghwe luwa na mitsabi yake na pfighingi pfake na pfinu pfose ipfibamighwe mna isang'ano ya Lihema Lienzeluka, 41 na maghwanda ghose ighatengenetsighwe pfinoghile kwaajili ya sang'ano ya hanu hahenzeluka, maghwanda mahenzeluka ya mtambika Aruni, na gha wanaghe kwaajili ya sang'ano ya kulapfa nambiko. 42 Waisiraeli tsawatenda chila chinu ka IMNDEWA pfayamlaghitsa Musa. 43 Musa kailola sang'ano'yo, kanoghelighwa watenda chila chinu ka IMNDEWA pfayalaghitse. Apfo Musa kawabaliki.