1 "Kuya utsenge Hema Lihenzeluke kwa mapanzia kumi gha maghwanda matselu ghanoghile, na kwa nyutsi tsa buluu, nzambalau na ndung'u. Mapanzia agho kutsoghahamba na picha tsa makelubi iwacholighwe na mafundi iwakubuhu. 2 Chila panzia liwe na utali wa futi alubaini na mbili na ughatsi wa futi sita. Mapanzia agho ghawe gha chipimo chimwe. 3 Mapanzia matano ughalumbitse hamwe, alino na alino, na mapanzia matano ghangi ughalumbitse hamwe, alino na alino. 4 Kuya udadatse pfitanzi pfa langi ya buluu mna mindo ya utsighilo wa panzia limwe lya hande lya mwanduso, pfipfila udadatse pfitanzi mna mindo ya utsighilo wa panzia limwe lya hande lya keli. 5 Wike pfitanzi hamsini mna lipanzia limwe na pfitanzi hamsini pfingi kune mindo ya lipanzia lya hande lya kabili, ipfitanzi'pfo pfilolese. 6 Kuya utengenetse pfifungo hamsini pfa nzahabu, apfo pfitsakuwa pfo kulumbitsa ghamahande agho meli ili lihema liwe limwe.

7 "Pfipfila utengenetse mapanzia ighatengenetsighwe kwe mighala ya wamene ghawe chighubiko mchanya mwe lihema. Ghamapanzia agho ghawe kumi na limwe. 8 Chila panzia liwe na utali wa futi alubaini na tano, na ughatsi wake futi sita. Mapanzia agho ghose kumi na limwe ghelingane. 9 Kuya kutsoghalumbitsa hamwe mapanzia matano, na mapanzia sita ghangi kutsoghalumbitsa hangi, na lipatsia lya sita ulikunje mala mbili hambele ha lihema. 10 Kuya wike pfitanzi hamsini mna hande limwe, na pfitanzi hamsini pfingi kune mindo ya lipanzia lye lihande lya keli, na ipfitanzi'pfo pfilolese. 11 Utengenetse pfifungo hamsini pfa shaba, upfike mna pfitanzi pfila hamsini ili kulumbitsa mahande ghala meli gha mapanzia na kutenda lipanzia lya lihema liwe limwe. 12 Na inusu ila ya panzia iikalile kutsoika ilebele ubali wa kunzingo kwe kaye ienzeluke. 13 Na ayo futi imwe na nusu ya ubali umwe, na ila ifuti imwe na nusu ya ubali wa kabili, ya utali wa ghamapanzia gha lihema usighale, utsileke tsilebele kune ubali umwe na kune ubali ungi wa ing'anda ienzeluke ili kuighubika.

14 "Utengenetse maghubiko ghangi meli gha lihema, limwe litendighwe kwa ngotsi tsa ng'olo wamale lighelighwe udung'u, na lingi litendighwe kwa ngotsi tsa mene.

15 "Utengenetse fulemu tsa mibani ya mjoholo yo ukwimitsila wima ikaye ienzeluke. 16 Chila fulemu utali wake uwe futi kumi na tano, na ughatsi wake futi mbili na lobo. 17 Chila fulemu iwe ne ndimi mbili, atso tsiwe tsa kukindilitsila. Fulemu tsose tse ikaye ienzeluke utsitengenetse pfipfo. 18 Kutsotsitengenetsela ikaye ienzeluke fulemu ishilini kune ubali wa kusini, 19 na pfikalilo alubaini pfa pfetsa hasi mwe mibani ayo ishilini, pfikalilo pfibili hasi ha bani limwe tso kubokela tsindimi tsake mbili, na pfikalilo pfibili hasi ha libani lingi tso kubokela tsindimi tsake mbili. 20 Na kune ubali wa kasikazini we ikaye ienzeluke, utengenetse mibani ishilini, 21 na pfikalilo pfake alubaini pfa fetsa, pfikalilo pfibili hasi mwa libani limwe, na pfikalilo pfibili hasi mwa libani lingi. 22 Kwa ubali wa kuchughu we ing'anda ienzeluke, ubali wa kwalikuswela litsuwa, utengenetse mibani sita. 23 Pfipfila utengenetse mibani mibili, ayo ikale mna tsimembe tse ikaye ienzeluke ubali wake wa kuchughu. 24 Imibani'yo ibase kulawa hasi, na kwa uchanya ilumbitsighwe kune bangili imwe ya mwanduso. Mibani yose ya mna tsimembe itendighwe pfipfo kune tsimembe mbili. 25 Apfo kutsakuwa na mibani minane ne pfikalilo pfake kumi na sita pfa pfetsa, pfikalilo pfibili hasi mwa chila bani.

26 "Utengenetse mifumbati ya mjoholo, mifumbati mitano ya kulumbitsa mibani ubali umwe wa ikaye ienzeluke, 27 na mifumbati mitano kwaajili ya ubali wa kabili wa ikaye ienzeluke, na mifumbati mitano ya ukulumbitsa imibani ya ubali wa kuchughu wa ikaye ienzeluke, kwalikuswela litsuwa. 28 Mfumbati ghwa haghati ighuli nusu ya utali we mibani ghulumbilile kulawa utsighilo uno mbaka utsighilo ungi wa ikaye ienzeluke. 29 Mibani yose uikandike nzahabu na uitengenetsele bangili tsa nzahabu itsitsokindilisa mifumbati, ne mifumbati'yo uikandike nzahabu. 30 Apfo kutsoitsenga ikaye ienzeluke ka apfila pfanikulanguse akula kuchidunda.

31 "Utengenetse panzia lya nyutsi tsa langi ya buluu, nzambalau na ndung'u na chitani inoghile. Panzia alyo ulihambe kwa picha tsa makelubi iwacholighwe kwe isang'ano ya ifundi iyakubuhu. 32 Kuya ulinanike mna ngutso nne tsa mjoholo itsikandikighwe nzahabu, ne pfinanikilo pfake pfa nzahabu, mna pfikalilo pfine pfa fetsa. 33 Naghwe ulinanike lipanzia alyo kune pfinanikilo'pfo, kuya ulighale Lisanduku lya laghano ahala hane lipanzia. Lipanzia alyo litsoghola Hanu Haenzeluke na Hanu Haenzeluke ng'ani. 34 Kuya uchike ichighubiko ichikemighwa Hanu ha Libatsi mchanya mwe Lisanduku lya laghano lili ihanu'ho Haenzeluke ng'ani. 35 Imetsa ila uike kunze kwe lipanzia, ne ichitasa uchike ubali wa kusini wa lihema, chilolese ne imetsa. Imetsa ayo iwe ubali wa kasikazini.

36 "Utengenetse lipanzia lya nyutsi tsa langi ya buluu, nzambalau na ndung'u, na chitani inoghile ifoghosighwe na kutalitsighwa, alyo liwe lya kudiwila lilango lya lihema. 37 Pfipfila utengenetse ngutso tano tsa mijoholo na utsikandike nzahabu. Ngutso atso tsiwe na pfifungo pfe nzahabu, chila imwe iwe na chikalilo cha shaba.