1 Yosefu kamwinamila aba wake kamuhabatila, kamlilila na kamnonela. 2 Kuya Yosefu kawalaghitsa iwaghanga wake, wambakatse dawa Isiraeli, aba wake, ili aleke kwola. Nawo tsawatenda pfipfo. 3 Sang'ano ya kulubaka dawa lukuli tsaisola matsuwa alubaini. Wamisiri tsawamlilila Yakobu kwa matsuwa sabini.

4 Chililo hachimalile, Yosefu kawalongela iwanu iwali mkaye mwa Farao, "Nomlombani, mghende kwa Farao mumlongele pfino, 5 ‘Aba wangu hayanga'ali habehi no ukufa tsakanilomba nilahe, kanilaghitsa nimtsike mna mango yaiihongole mwenyegho mna isi ya Kanaani.’ Apfo nomlomba andeke ng'ende kumtsika aba wangu, kuya nitsakuya."

6 Farao kamwidika, "Ughende ukamtsike aba wako ka pfayakulaghitse."

7 Apfo Yosefu kaghenda kumtsika aba wake. Yosefu kaghenda hamwe na iwakulu wose wa Farao, wanzehe wa ing'anda ya Farao, hamwe na iwakulu wa isi yose ya Misiri. 8 Iwanu wa kaye ya Yosefu, ndughu tsake na iwanu wa kaye ya aba wake tsawaghenda naye. Mne isi ya Gosheni tsawawaleka iwana waliyeka hamwe na iwang'olo, iwamene na ng'ombe wawo. 9 Pfipfila tsawaghenda hamwe na iwadina farasi na mituka ye falasi. Tsalikala kingili kulu ng'ani.

10 Hawapfikile chibwalu cha kupetela, ichili Atadi, kumwambu mwa ghumto Yoridani, tsawalila kwa usungu ng'ani, naye Yosefu tsakamtendela aba wake matanga gha matsuwa saba. 11 Wakanaani iwokala hala hawawonile iwanu pfawodomboketsa mna chibwalu cha Atadi, walonga, "Chililo chino cha Wamisiri chikulu!" Achino chicho chitendile ihanu aho hali kumwambu mwa ghumto Yoridani hakemighwa Abeli Misiri.

12 Iwana wa Yakobu tsawamtendela aba wawo ka pfayawalaghitse, 13 wamsola mbaka isi ya Kanaani, tsawamtsika mna mango ilili mna mghunda akula Makipela, habehi na Mamre. Imango hamwe na mghunda aghwo Abrahamu tsakapfighula kwa Efuroni Mhiti, kuwe hanu ho ukutsikila. 14 Yosefu hayamtsikile aba wake, koya Misiri hamwe na ndughu tsake na iwanu wose iwaghendile naye kumtsika aba wake.

15 Ndughu tsake Yosefu hawonile aba wawo kafa, walonga, "Pfii katsotuhila na kutuliha aghala ghehile ighatumtendele?" 16 Apfo tsawawatuma iwanu kughenda kwa Yosefu, walonga, "Aba wako ng'ana yafe tsakatulaghitsa, 17 katulongela tukulongele pfino, ‘Chondechonde uwaleghusile ndughu tsako ghehile.’ Lelo twokulomba utuleghusile ghehile ighatukutendile twetwe watumwa wa Imulungu wa aba wako." Yosefu hayahulike pfino kalila.

18 Kuya ndughu tsake wamghendela, wamwinamila, walonga, "Lola, twetwe twa watumwa wako."

19 Lekeni Yosefu kawalongela, "Mleke kupfuka, pfii nene na Imulungu iyowahigha iwanu? 20 Mwemwe tsambama kunitendela ghehile, lekeni Imulungu kaghalusa ghawe ghanoghile, ili niukombole ughima we iwanu wengi ka pfamkona leloli. 21 Mleke kupfuka. Nene nitsomwing'ani chijo mwemwe na iwanenu." Kuya kawakanza.

22 Yosefu tsakaghendelela kukala Misiri hamwe na iwanu wa kaye ya aba wake. Yosefu tsakakala na miyaka miya imwe na kumi. 23 Naye tsakawona iwana na iwatsukulu wa Efraimu, imwanaghe, pfipfila kawona iwana wa Makiri, imwana wa Manase. 24 Yosefu kawalongela ndughu tsake, "Nene nahabehi ukufa. Imulungu katsowatsilani ghendo kumwapfilani. Katsowalapfa mna isi ino na kuwaghala mna isi iyawalongele katsoweng'a Abrahamu, Isaka na Yakobu." 25 Kuya Yosefu kawalongela iwana wa Isiraeli welahe, kalonga, "Imulungu ang'atsowatsila kumwapfilani, msole mipate yangu kulawa kuno, mke nayo." 26 Kuya Yosefu tsakafa hayang'ali na miyaka miya imwe na kumi. Tsawalubakatsa lukuli lwake dawa luleke kwola, tsawalwika mna sanduku ako Misiri.