1 Yakobu kawakema iwanaghe kawalongela, "Mwitingane hamwe niwalongele ighatsowalawila ghamatsuwa ighakutsa.

2 Mwitingane na mtegheletse, mwemwe iwana wa Yakobu. Mnitegheletse nene Isiraeli, aba wenu.

3 Rubeni, ghweghwe kwa mwanangu chaudele,

Ghweghwe mwanangu wa mwanduso na usongolo wangu,

Ghweghwe kwa mkulu na kuna ngupfu kubita iwanangu wose.

4 Ghweghwe kweghala na ghamatsi ighopiruka,

Lekeni ng'autsolongola keli,

Mana tsakuwasa na chimada wangu,

Na kuluhinya lusatsi lwa aba wako.

5 Simoni na Lawi wawo ndughu.

Wotumila mimaghe kutenda ughobo.

6 Lekeni nene sitselunga mna mtingano ghwawo,

Sibama baye kwilunga na mtingano ghwawo,

Kwaapfila kwa maya yawo tsawamkoma imunu,

Na tsawamghana ng'ombe nyughe ye mghulu kwa uhonzolomo wawo.

7 Noilani maya yawo, mana tsa ng'ali ng'ani,

Na maya yawo tsayahela libatsi.

Nitsowabaghula mna isi ya Yakobu.

Nitsowapwililisa mna isi ya Isiraeli.

8 Ghwe Yuda, ndughu tsako watsokutunitsa.

Kutsowabota iwanebe wako msingo.

Ndughu tsako watsokupfughumila ghamafindi.

9 Ghwe Yuda, kweghala na simba,

Iyalawile kuwinda na kukwila mchanya,

Iyagholose na kuwasa hasi.

Simba iyane ngupfu, yuhi iyodaha kumlamsa?

10 Yuda kutsokindagha ng'weku ya chindewa,

na ng'weku yo kutawala mmaghulu mwake,

mbaka hayatsopfika mwenyegho,

Na iwanu wose watsomtoghola.

11 Katsomwoha chihongwe wake mna mtsabibu,

na imwana wa chihongwe mna mtsabibu.

Katsotsapfa lighwanda lyake mna dipfai,

na maghwanda ghake mna dipfai ndung'u.

12 Nenge tsake tsitsakuwa ndung'u kwa kunwa dipfai, na matsino ghake ghatsakuwa matselu kwa kunwa matombo.

13 Zabuloni katsokala kumwani.

Naye katsakuwa hanu ho ukwikila minumbwi.

Isi yake itsobakana na Sidoni.

14 Isakari keghala na chihongwe iyane ngupfu,

Iyowasa haghati mwa mitsigho yake.

15 Katsakona hanu ho ukubwihila hanoghile,

Na isi iinoghelesa.

Katsakwinama na kuhughala mtsigho.

Katsakuwa mtumwa kwa sang'ano ng'omu.

16 Dani katsakuwa mlamutsi yanoghile kwe iwanu wake,

ka kolo tsingi tsa Isiraeli.

17 Dani katsakuwa ka nzoka mnzila,

Nzoka iyane sumu mmbalimbali mwe inzila,

Katsomluma chihongwe chisegheyu,

Naye imunu iyamdinile katsoghwila chisogho.

18 Ghwe Imtwatsa, nokubeta ung'ombole!

19 Gadi katsotowighwa na iwanu iwoboka pfinu,

Lekeni yeye katsowawinza kuchisogho na kuwatowa.

20 Isi ya Asheri itsomela pfijo pfingi,

Naye katsomwing'a mfalume chijo ichinoghile.

21 Nafutali keghala na funo iyalekelighwe,

iyakweleka iwana iwanoghile.

22 Yosefu keghala na mbiki ighukweleka,

Mbiki ighukweleka ghamatunda ighuli habehi na mbwibwi,

Ghamaputila ghake ghatanda mbanda.

23 Iwanebe wake tsawamtowa ng'ani,

Tsawamwasila mighowa na wamtsupfa ng'ani.

24 Lekeni uminde wake tsaukala pfinoghile

Ghamoko ghake tsaghapata ngupfu,

Kwa ghamoko gha Yane Ngupfu wa Yakobu,

Kwa taghwa lya Mdimi, iyokemighwa Bambalawe lya Isiraeli.

25 Kwaapfila Imulungu wa aba wako katsokwapfila,

Imulungu Yane Ngupfu Ng'ani katsokubaliki

balaka tse imvula kulawa mlanga,

balaka tsa ghamatsi ighaghendese kulawa hasi,

balaka tsa iwapinga kweleka iwana wengi na iwanyama kweleka iwana wengi.

26 Aba wako katsokubaliki kubita balaka itsilawa mna pfidunda pfa ghumwande,

Kubita ipfinu pfinoghile ipfikoneka mna pfidunda ghamatsuwa ghose.

Na pfinu apfo pfikale mwitwi mwa Yosefu,

pfikale mnotsi mwake, yeye iyali mkulu kwa ndughu tsake.

27 Benjamini keghala na yumbwa mkali wa kumuhulo.

Nemitondo kakuja chawingile,

nemihe kowinga na kughola chawingile."

28 Atsino kolo kumi na mbili tsa Isiraeli, na atso tsitso mbuli tsayawalongele Yakobu hayawabaliki, chila yumwe ka pfayabamighwe

29 Kuya Yakobu kawalaghitsa iwanaghe, "Nene nahabehi ukufa na kughenda kwe iwanu wangu. Mnitsike hamwe na iwabala wangu mna mango ilili mna mghunda mwa Efuroni Mhiti, 30 ako Makipela, ubali wa kumoso wa Mamre, mna isi ya Kanaani. Abrahamu tsakaghula mango na mghunda aghwo kwa Efuroni Mhiti, ghuwe hanu hake ha kutsikila. 31 Ako kuko kwayatsikighwe Abrahamu na Sara, mwehe wake, Isaka na Rebeka, mwehe wake, na ako kuko kwanimtsikile Lea. 32 Mghunda aghwo na mango ayo tsapfighulighwa kwa Wahiti." 33 Yakobu hayamalitse kuwalaghitsa iwanaghe, kagholosa maghulu ghake mlusatsi na baho kafa.