1 Apfo Yosefu kamghendela Farao, kamlongela, "Aba wangu na ndughu tsangu, hamwe na iwang'olo wawo, ng'ombe wawo na mali tsawo tsose, wapfika kulawa isi ya Kanaani. Lelo wa ako Gosheni." 2 Yosefu kawasola ndughu tsake watano, kawaghala kwa Farao.

3 Farao kawaghutsa, "Ng'onde yachi yamsang'ana?"

Wamwidika, "Twetwe watumwa wako twa wadimi, ka pfawakalile iwabala wetu." 4 Kuya wamlongela Farao, "Twetwe watumwa wako tutsa kukala hano ka wahenza, kwaapfila mna isi ya Kanaani kuna nzala ng'ani na kuduhu ichijo kwa iwanyama. Apfo twokulomba twetwe watumwa wako tukale mna isi ya Gosheni." 5 Farao kamlongela Yosefu, "Aba wako na ndughu tsako wakutsila ghweghwe, 6 isi yose yamna ghamoko ghako. Mwing'e aba wako na ndughu tsako hanu hanoghile mna isi ino. Na mna ndughu tsako, ung'awamanya iwanu iwosang'ana ghoya, wasaghule wawe wabetetsi wa iwanyama wangu."

7 Kuya Yosefu kamghala Yakobu, aba wake kwa Farao. Yakobu hayambaliki Farao, 8 Farao kamghutsa, "Angu kuna miyaka mingapi?"

9 Yakobu kamwidika Farao, "Nina miyaka miya imwe na selasini yaning'ali nikwanga kwanga. Miyaka ayo iwa midodo na imema maghayo, na ng'aighala baye na miyaka iwakalile nayo aba tsangu mna ukwanga kwawo." 10 Kuya Yakobu kambaliki Farao, koka. 11 Kuya Yosefu kaweng'a aba wake na ndughu tsake hanu hakemighwe Ramesesi, hanu hanoghile mna isi ya Misiri, ka Farao pfayamlaghitse. 12 Yosefu tsakamwing'a chijo aba wake, ndughu tsake na iwanu wose wa kaye ya aba wake, hamwe na iwana wawo.

13 Mne isi yose tsakuduhu chijo. Nzala tsa ng'ulu ng'ani mbaka iwanu wa isi ya Misiri na Kanaani tsawasoka. 14 Yosefu tsakakunga tsisendi kulawa mna isi ya Misiri na Kanaani kwa ipfijo ipfighulighwe, kuya kaghala sendi tsila kwa Farao. 15 Sendi tsa iwanu wa Misiri na Kanaani hatsimalile, Wamisiri wose wamghendela Yosefu wamlongela, "Twing'e ichijo! Ule tufe hambele yako? Lola, sendi tsetu tsimala."

16 Yosefu kawalongela, "Ka mwahela sendi, ngalileni iwanyama wenu kuya nene nitsoweng'a ichijo." 17 Apfo wamghalila Yosefu farasi, iwang'olo, iwamene na pfihongwe, naye kaweng'a ichijo. Ghumwaka ghula Yosefu yang'ali yoweng'a ipfijo na wawo wang'ali womwing'a iwanyama wawo.

18 Ghumwaka ghuwinzile, wamtsila keli wamlongela, "Ng'atudaha baye kukupfisa mkulu wetu ka sendi tsetu tsimala na iwanyama wetu wamna ghamoko ghako, kuduhu chinu ichisighale ila ngupfu tsetu na mighumda yetu. 19 Ule tufe hambele yako na mighunda yetu ihinyike? Tughule twetwe na mighunda yetu, twetwe na mighunda yetu tutsakuwa pfinu pfa Farao. Twing'e mbeghu tukale waghima, tuleke kufa, na mighunda yetu ileke kusakala."

20 Apfo Yosefu kamghulila Farao isi yose ya Misiri. Kwaapfila nzala tsaikala ng'ulu ng'ani, Wamisiri wose tsawahutsa mighunda. Isi tsaiwa ya Farao. 21 Iwanu wose wa Misiri, kulawa hanu hamwe mbaka hanu hangi, wawa iwatumwa wa Farao. 22 Lekeni Yosefu ng'adahile baye kughula mighunda ya walapfa nambiko, kwaapfila Farao yang'ali yoweng'agha ipfijo. Apfo ng'awahutsile baye mighunda yawo. 23 Yosefu kawalongela iwanu, "Mlole, nimghulani mwemwe na nimghulila Farao imighunda yenu. Mbeghu tsino ano, mkatsihande mna mighunda yenu. 24 Lekeni hamtsopfuna mtsomwing'a Farao lifungu lya tano lya mapfuno ghenu. Mapfuno ighasighale ghatsakuwa mbeghu tsenu, chijo chenu, cha ndughu tsenu na iwanenu."

25 Kuya wamwidika, "Mkulu wetu, kuukombola ughima wetu, kutwonela libatsi, na twetwe tutsakuwa watumwa wa Farao." 26 Apfo Yosefu keka laghitso mbaka leloli Misiri, Wamisiri wobamighwa wamlihe Farao lifungu lya tano lya mapfuno ghawo. Mighunda ya walapfa nambiko iliyeka ng'aighulighwe na ng'aiwile mighunda ya Farao.

27 Waisiraeli tsawakala Gosheni mna isi ya Misiri. Hamwo tsawapata mali, tsaweleka iwana no ukwongetseka. 28 Yakobu tsakakala Misiri kwa miyaka kumi na saba, apfo ughima wake wose tsaukala miyaka miya imwe alubaini na saba. 29 Gamatsuwa ghake gha ukufa haghapfikile, Yakobu kamkema Yosefu imwanaghe, kamlongela, "Ka nokunoghela, wike ghumoko ghwako hane hatsa lyangu wilahe, ka kutsonangusa libatsi na uluso, nokulomba uleke kunitsika Misiri. 30 Hanitsakufa, uleke kunitsika mna isi ino. Lusole lukuli lwangu ukalutsike hanu kwawatsikighwe iwabala wangu."

Yosefu kamwidika, "Nitsotenda ka pfaulongile."

31 Yakobu kalonga, "Wilahe ka kutsonitendela apfi." Yosefu kelaha, kuya Yakobu kenamila ubali wa lusatsi lwake kamlongela mighede Imulungu.