1 Yakobu tsakamwona Esau kakutsa ne iwanu miya nne. Apfo Yakobu kawaghola iwanaghe kuna Lea, Raheli na watumwa wala mapinga weli. 2 Yakobu tanu kaweka hambele iwatumwa ne iwana wawo, kuya kawinza Lea ne iwanaghe, kuya Raheli na Yosefu imwanaghe. 3 Yakobu imwenyegho tsakawalongola, kuya kenama mbaka chihanga chake chidonza hasi mala saba mbaka hayapfikile habehi na ndughu yake. 4 Lekeni Esau katsuma kumbokela, kamkumbatila, kamwikila ghamoko. Kuya wose weli tsawalila. 5 Esau hayenule tsinenge kawona iwapinga wala ne iwana, kaghutsa, "Apfi iwanu wano iwali na ghweghwe tsina nani?"

Yakobu kamwidika, "Awano iwana yangaile Imulungu nene mtumwa wako kwa uluso wake." 6 Kuya awala iwatumighwa ne iwana wawo wamsoghelela, wenama wamtowela ghamaghoti. 7 Kuya Lea ne iwanaghe wamsoghelela, wenama wamtowela ghamaghoti. Kuya wawinza Yosefu na Raheli, pfipfila wenama wamtowela ghamaghoti.

8 Esau kaghutsa, "Lelo Pfii kingili lya wanyama lyanitingane nalo mzila lina maana yachi?"

Yakobu kamwidika, "Nzawadi yako, tsambama umbonele libatsi mtwatsa wangu."

9 Lekeni Esau kalonga, "Ndughu yangu nina mali nyingi. Ukale nayo mali yako."

10 Yakobu kalonga, "Bae, ka kunitoghola ubokele nzawadi yangu. Mana ukwona chihanga chako ka nichona chihanga cha Imulungu, sambi kumbokela pfinoghile. 11 Chondechonde ubokele nzawadi yanikughalile, Imulungu kambonela libatsi, kangaya ghose ighanibamile." Yakobu kaghendelela kulonga naye mbaka Esau katoghola.

12 Esau kalonga, "Ona, uleke tuke. Nitsokulongola."

13 Lekeni Yakobu kamwidika, "Mtwatsa wangu kwomanya iwana wano wadodo, iwang'olo ne iwang'ombe woghwawitsa, nobamighwa niwalolese. Ning'awadima kwa litsuwa limwe, wanyama wose watsokufa. 14 Nokulomba ulongole, nitsokuwinza lughalugha, nitsoghenda ka wanyama na iwana pfawoghenda, mbaka tutingane Seiri."

15 Esau kalonga, "Leka nikulekele iwanu wangu wamwenga."

Yakobu kamghutsa, "Ule kwotenda apfo? Ghwe mbonele hela libatsi mtwatsa wangu." 16 Apfo litsuwa lilila Esau kandusa ghumwanza ghwa ukuya Seiri. 17 Yakobu tsakaghenda mbaka Sukoti. Ako tsaketsengela pfibumbulika ne iwanyama wake. Ndo mana hanu aho hakemighwa Sukoti.

18 Yakobu tsakalawa Padani Aramu, kafika habehi ne Shekemu mna isi ya Kanaani, tsakatsenga pfimbulika habehi na isi ayo. 19 Yakobu kaghula mghunda kwa pfihindi miya imwe pfa pfesa, hanu hatsengile pfibumbulika pfake. Kaghula mghunda awo kwa wana wa Hamori, aba wake Shekemu. 20 Kuya baho katsenga hanu ha kulapfila nambiko ha ghamabwe, kahakema Elelohe Isiraeli, mana yake Imulungu iyo Imulungu wa Isiraeli.