1 Lelo Sarai, ipinga wa Abramu, yang'ali ng'ana yamwelekele baye iwana. Lekeni tsakakala na mtumwa iyakemighwe Hagari, iyalawile Misiri, 2 apfo Sarai kamlongela Abramu, "Imulungu kanenda ndeke kweleka iwana. Lelo uwase na imtumwa wangu, songaha kodaha kunyelekela iwana." Abramu katoghola achila chayalongile Sarai. 3 Apfo Sarai kamwing'a Abramu Hagari, mtumwa wake Mmisiri, yawe ipinga wake. Aghano ghalawila Abramu hayakalile Kanaani kwa miyaka kumi. 4 Abramu kawasa na Hagari, naye Hagari kakinda inda. Hagari hayamanyile kana inda, kandusa kumbetsa Sarai.

5 Kuya Sarai kamlongela Abramu, "Ukwiha kuno kwanendelighwa, naghwe kwa mumo. Nikwing'a mtumwa wangu mna ghamoko ghako, sambi kona kana inda, konibetsa. Leka Imulungu yatuhighe nene na ghweghwe."

6 Abramu kamwidika, "Mtumwa wako kolongotsighwa na ghweghwe, mtendele chochose chaubama." Kuya Sarai kamdununza Hagari mbaka koka.

7 Malaika we Imulungu kamwona Hagari habehi na mbwibwi mchiwala, mbwibwi iikalile mna nzila ighenda Shuri. 8 Malaika ayo kamghutsa, "Hagari, mtumwa wa Sarai, ulawa kwani na ughenda kwani?" Hagari kamwidika, "Nompfuka bibi yangu Sarai."

9 Kuya malaika ayo kamlongela, "Uye kwa bibi yako na umuhilikitseghe yeye." 10 Kuya malaika ayo kaghendelea kulonga, "Nitsokwongetsela watsukulu nawo ng'awatsodahika baye kupetighwa kwa apfila pfawatsokuwa wengi." 11 Kuya malaika ayo we Imulungu kamlongela, "Ghweghwe sambi kuna inda na kutsakweleka imwana mmale. Kutsomkema Ismaili kwaapfila Imulungu kona pfaughatsike. 12 Imwanagho katsakuwa ka punda wa kumuhulo, katsesonga na chila imunu na chila imunu katsesonga naye, naye katsebaghula na lukolo lwake lwose."

13 Hagari kamkema Imulungu iyalongile naye, "Ghweghwe kwa Imulungu iyakona," kwaapfila tsakalonga, "Lelo nimwona ayula iyombona." 14 Apfo chisima chila tsachikemighwa Beerilahairoi, mana yake ichisima cha iyali ne ughima iyombona. Chisima acho tsachikala haghati ha Kadeshi na Beredi.

15 Hagari kamwelekela Abramu imwana mmale, na Abramu kamkema imwana ayo Ismaili. 16 Abramu tsakana miyaka semanini na sita Hagari hayamweleke Ismaili.