1 Yakobu tsakasola pfinu pfake pfose, kaghenda Misiri. Hayapfikile Beasheba kamlapfila nambiko Imulungu wa Isaka, aba wake. 2 Imulungu tsakalonga na Isiraeli mndoto nechilo, kalonga, "Yakobu, Yakobu!"

Yakobu kamwidika, "Oo, nokutegheletsa."

3 Imulungu kamlongela, "Nene na Imulungu, Imulungu wa aba wako. Uleke kupfuka kughenda Misiri, kwaapfila nitsokwing'a iwana ketseketse. 4 Nitsoghenda naghwe Misiri na nitsokuyitsa kuno. Hautsakufa Yosefu katsokala hamwe naghwe."

5 Kuya Yakobu tsakalawa Beasheba, iwana wa Isiraeli wamsola aba wawo, iwana wawo na iwapinga wawo mna imituka ila yaighalile Farao kuwasola. 6 Pfipfila tsawawasola iwanyama wawo na mali tsawo tsawapatile mna isi ya Kanaani, Yakobu kawasola iwatsukulu wake wose, 7 iwanaghe, watsukulu wake na lukolo lwake lwose kaghenda nawo mbaka Misiri.

8 Aghano mataghwa gha iwana wa Isiraeli iwaghendile Misiri, Rubeni, imwana chaudele wa Yakobu. 9 Iwana wa Rubeni tsa Hanoki, Palu, Hesironi na Kami. 10 Simeoni na iwanaghe, Yemueli, Yamini, Ohadi, Yakini, Sohari na Shuli yelekighwe na ipinga Mkanaani. 11 Lawi na iwanaghe, Gerishoni, Kohati na Merari. 12 Yuda na iwanaghe, Eri, Onani, Shela, Peresi na Zera. Lekeni Eri na Onani tsawafila mna isi ya Kanaani. Iwana wa Peresi tsa Hesironi na Hamuli. 13 Isakari na iwanaghe, Tola, Puva, Yashubu na Shimoni. 14 Zabuloni na iwanaghe, Seredi, Eloni na Yaleeli. 15 Awo tsaiwana wa Lea, iyamwelekele Yakobu mna isi ya Padani aramu, hamwe na Dina, neghe wake. Iwanaghe wose na iwatsukulu wake wose tsa selasini na wadatu. 16 Gadi na iwanaghe, Sifioni, Hagi, Shuni, Esiboni, Eri, Arodi na Areli. 17 Asheri na iwanaghe, Imna, Ishiva, Ishivi, Beria na Sera, lumbu wawo. Beria na iwanaghe, Heberi na Malikieli. 18 Awano iwana na watsukulu kumi na sita wa Yakobu na Zilipa, imtumwa Labani iyamwing'ile Lea, neghe wake.

19 Raheli tsakamwelekela Yakobu iwana weli, Yosefu na Benjamini. 20 Hako Misiri, Asenati neghe Potifera iyakalile mlapfa nambiko wa isi ya Oni, tsakamwelekela Yosefu iwana weli, Manase na Efraimu. 21 Iwana wa Benjamini tsa Bela, Bekeri, Ashiberi, Gera, Naamani, Ehi, Roshi, Mupimu, Hupimu na Ardi. 22 Awano tsa iwana wa Raheli ne watsukulu wake, iyamwelekele Yakobu, wose tsa kumi na nne.

23 Imwanaghe Dani yang'ali Hushimu. 24 Nafutali na iwanaghe, Yeseeli, Guni, Yeseri na Shilemu. 25 Awano saba iwana wa Yakobu na Bila, imtumwa Labani iyamwing'ile Raheli, neghe wake.

26 Iwana wa Yakobu na watsukulu wake tsa sitini na sita, iwapinga wa iwanaghe ng'awapetighwe baye. 27 Yosefu hayang'ali Misiri tsakeleka iwana weli. Iwanu wose wa kaye ya Yakobu iwaghendile Misiri tsa sabini.

28 Yakobu tsakamtuma Yuda yalongole kumlomba Yosefu wetingane Gosheni. Hawapfikile Gosheni, 29 Yosefu tsakadina mtuka ghwake, kaghenda kumbokela Isiraeli, aba wake ako Gosheni. Hawetingane, Yosefu kamkumbatila aba wake na kalila kwa chipindi chitali. 30 Yakobu kamlongela, "Sambi hata ning'afa si chinu baye, kwaapfila nikwona na nimanya ka kwamghima."

31 Kuya Yosefu kawalongela ndughu tsake na iwanu wa kaye ya aba wake, "Nogheluka kumlongela Farao ka ndughu tsangu na kaye ya aba wangu, iwang'ali wokala mna isi ya Kanaani ma wanitsila. 32 Nitsomlongela mwemwe mwa wadimi mana mwodima iwanyama, na mtsa na iwang'olo wenu, iwamene wenu, ng'ombe wenu na mali tsenu tsose. 33 Lelo, Farao hayatsowakema na kuwaghutsa, ‘Ng'onde yachi yamsang'ana?’ 34 Mmwidike, ‘Mkulu, twetwe watumwa wako, kulawa udodo wetu mbaka leloli twetwe twa wadimi, ka pfawakalile iwabala wetu,’ mlonge apfi ili mkale Gosheni." Yosefu tsakalonga apfi kwaapfila Wamisiri wowahila iwadimi.