1 Ghamatsuwa tsaghabita, lelo tsuwa limwe mwika dipfai wa imfalume wa Misiri na mwambika pfighate wake mkulu, wamtotsela mkulu wawo, imfalume wa Misiri. 2 Farao kawonela maya iwakulu wano weli, 3 kaweka mna geretsa mng'anda mwa imkulu wa iwabatetsi, hanu hayohighwe Yosefu. 4 Imkulu wa iwabetetsi kamsaghula Yosefu yawasang'anile. Tsawakala mchifungo ghamatsuwa mengi.

5 Chilo chimwe mumula mna geretsa mwika dipfai kalota ndoto na mwambika pfighate naye pfipfila tsakalota. Chila ndoto tsaing'ali ilonga chinu chake. 6 Nemitondo Yosefu hayaghendile kuwona, wose weli tsa wana usungu. 7 Apfo kawaghutsa iwakulu awo iwang'ali hamwe naye mchifungo, mng'anda mwa imtwatsa wake, "Ebali pfihanga pfenu pfolangusa mna usungu?" 8 Wamwidika, "Wose tulota ndoto, lekeni kuduhu imunu iyodaha kutulongela ndoto atso tsilonga choni."

Kuya Yosefu kawalongela, "Apfi kulangusa ndoto tsilonga choni si sang'ano ya Imulungu baye? Nongeleni ndoto tsenu."

9 Apfo mghida dipfai kalonga, "Mna indoto yangu nighwona mbiki ghwa mtsabibu hambele yangu, 10 na mbiki aghwo tsaghukala na maputila madatu. Haung'ali ghutula, ghamaluwa ghake ghasanula na mikungwi yake tsa ina nzabibu itsipfile. 11 Chikombe cha Farao tsa chamna ghamoko ghangu, apfo nisola tsabibu, nitsikama mna chikombe cha Farao, nimwing'a."

12 Yosefu kamlongela, "Ndoto yako ilonga pfino, maputila madatu ghagho matsuwa madatu. 13 Mne matsuwa madatu Farao katsokulekelela na kukuyitsa mna sang'ano yako, na kutsomwing'a Farao chikombe mna ghamoko ghake ka pfautendile ghumwande. 14 Lekeni ipfinu hapfitsokughendela ghoya, ng'umbuke na unitendele uluso, ulonge mbuli tsangu kwa Farao ili yandapfe mna gheletsa lino. 15 Mana nene tsanisolighwa kwa ngupfu kulawa mna isi ya Waheburaniya, na hano Misiri sitendile chochose ichinitenda nyohighwe."

16 Imkulu wa iwambika pfighate hayonile Yosefu kailonga pfinoghile ndoto ila, kamlongela Yosefu, "Nene pfipfila ndota. Tsandota nighala pfiseghe pfidatu pfa pfighate mwitwi mwangu. 17 Mna chiseghe cha kuchanya, tsahana ipfijo pfingi kwa Farao. Lekeni iwapfideghe wang'ali wopfija kulawa mna chiseghe acho mwitwi mwangu!"

18 Yosefu kamwidika, "Indoto ayo yolonga pfino, pfiseghe pfidatu ghagho matsuwa madatu. 19 Mne matsuwa madatu imfalume katsokulapfa mwigheletsa, na katsokughana litwi lyako na katsokukondeka mna mbiki, na wapfideghe watsoluja lukuli lwako."

20 Mne litsuwa lya kadatu, litsuwa lya kwelekighwa kwake Farao, Farao kawatendela chihungo wakulu wake wose. Kuya kawalapfa mchifungo mwika dipfai wake na mwambika pfighate wake, kaweka hambele he iwakulu wake. 21 Farao kamuyitsa mwika dipfai mna sang'ano yake, yamwing'eghe Farao chikombe. 22 Lekeni kamghana litwi mkulu yula we iwakwambika pfighate, kamkondeka mna mbiki. Ghose ghalawila ka Yosefu pfayawalongele. 23 Lekeni mwika dipfai ng'amkumbuke baye Yosefu, tsakamsemwa ghendo.