1 Kuya inzala tsang'ali mna isi ya Kanaani. 2 Hawamalitse ichijo chawaghulile Misiri, aba wawo kawalongela, "Mghende keli Misiri mkatughulile ichijo chingi."

3 Lekeni Yuda kamlongela aba wake, "Imunu yula katukanya ghendo, kalonga, ‘Sitsowabokela baye ka ng'amkutsa baye na mtsuwanda wenu.’ 4 Ung'amleka ndughu yetu yaghende na twetwe, tutsoghenda kukughulila ichijo. 5 Ung'alema aleke kughenda na twetwe, twetwe ng'atughenda baye, kwaapfila imunu yula katulongela, ng'amtsombona baye ka ng'amkutsa na mdodo wenu."

6 Isiraeli kawaghutsa, "Ule mnighalile maghayo ghano kwa kumlongela imunu ayo ka mna mdodo wenu yungi?"

7 Wamwidika, "Munu yula tsakatughutsa ng'ani mbuli tsetu na mbuli tsa kaye yetu. Kalonga, ‘Pfii aba wenu mghima? Pfii mna mdodo yungi?’ Apfo tsatumwidika ka pfayatughutsile. Twetwe tung'amanyiletse ka ang'atulongele tumghalile mdodo wetu?"

8 Kuya Yuda kamlongela Isiraeli aba wake, "Mleke ng'ende naye, na tutsoghenda sambi baha kughula chijo, hela twetwe, ghweghwe ne iwana wetu tuleke kufa nzala. 9 Nene nitsomlolesa, pfipfila nitsomuyitsa. Ning'aleka kumuyitsa na kumwika hambele hako, ghweghwe undilile nene ghamatsuwa ghose. 10 Kwaapfila ka ng'atukawile baye, tung'aghendile ako no ukuya lwakabili."

11 Kuya aba wawo kawalongela, "Ka apfo pfipfo pfaili, msole pfijo ipfinoghile pfa isi yetu, mumghalile nzawadi imunu ayo. Mumghalile mafuta chidogho gha ukwaju, uki chidogho, ubani, manemane, kungu na lotsi. 12 Msole sendi kubita aila iibamighwa, kwaapfila mwobamighwa muitse sendi tsila itsikighwe mna maghunila ghenu, songaha tsawasemwa kutsisola. 13 Pfipfila msoleni mdodo wenu mghende naye kwa imunu ayo. 14 Nomlomba Imulungu yawonele libatsi hambele he imunu ayo ili yawalekelele ndughu yenu na Benjamini muye nawo. Wanangu wang'ahupa wose leka iwe pfipfo."

15 Apfo wasola mighweko na sendi kubita atsila tsa mwanduso, aku welongotsa na Benjamini, wasumkila Misiri. Hawapfikile, waghenda kwima hambele ya Yosefu. 16 Yosefu hayamwonile Benjamini kelongotsa nawo, kamlongela mbetetsi wa ing'anda yake, "Wasole iwanu wano waghale ukaye yangu, umchinje imnyama, wambikile chijo, kwaapfila watsakuja na nene nemisi ino." 17 Imunu yula katenda ka Yosefu pfayamlongele, kawaghala iwanu wala ukaye kwa Yosefu.

18 Lekeni hawonile woghalighwa mng'anda mwa Yosefu, tsawapfuka, welongela, "Tughalighwa kuno kwa sendi tsila tsawatuyitsile mna maghunila ghetu hatutsile mwanduso. Kobama yatughoghe, yatuboke pfihongwe wetu na kututenda tuwe watumwa wake." 19 Apfo tsawamghendela mbetetsi wa Yosefu, walonga naye hawang'ali mna libani. 20 Wamlongela, "Chondechonde mkulu wetu, mwanduso tsatuhulumka hano kughula chijo. 21 Lekeni chilo chila hatupfikile hanu ho ukuwasa, tsatupfughula maghunila ghetu na chila munu kona sendi tsake mna ghunila lyake. Lelo tutsuyitsa sendi tsenu. 22 Pfipfila tutsa na sendi tsingi tsa kughulila ichijo. Ng'atumanyile baye iyekile sendi tsila mna maghunila ghetu."

23 Mbetetsi yula kawalongela, "Mleke kupfuka, Imulungu wenu, yeye iyali Imulungu wa aba wenu, kamwing'ani fetsa atso mna maghunila ghenu, ma nibokela sendi tsenu." Kuya kawaghalila Simoni.

24 Mbetetsi yula kawengitsa iwanu wala mng'anda mwa Yosefu. Kaweng'a ghamatsi waopfughe ghamaghulu ghawo, kaweng'a chijo pfihongwe wawo. 25 Nawo tsawaandaa nzawadi tsawo wamwing'e Yosefu hayatsopfika nemisi, kwaapfila tsawahulika watsakuja naye. 26 Yosefu hayapfikile ukaye, wamwing'a ipfinu apfila pfawatsile napfo kumghweka, kuya wamwinamila. 27 Kawalamsa baho kawaghutsa, "Tsamnongela mbuli tsa aba wenu iyalalile, pfii kalamka? Pfii kamghima?"

28 Wamwidika, "Aba wetu, iyali mtumwa wako kamghima." Kuya wamwinamila.

29 Yosefu hayenule tsinenge kamwona Benjamini, mdodo wake, imwana wa mai wake, kawaghutsa, "Pfii ayuno iyo mdodo wenu yamnilongele mbuli tsake?" Kuya kalonga, "Msongolo, Imulungu yakubaliki." 30 Bahala Yosefu katsumka kalawa, kwaapfila ghumoyo ghwake tsaghumwonela usungu mdodo wake, tsakabama alile, apfo kaghenda mng'anda mwake, kalila. 31 Hayahopfughe chihanga chake, kalawa, keghanamitsa, kalaghitsa watumwa waghale chijo. 32 Yosefu tsakeng'ighwa ichijo yeye yaliyeka, ndughu tsake wawo waliyeka, na Wamisiri iwatsile nawo waja waliyeka, kwaapfila Wamisiri tsawaghomighwa ukuja na Waheburaniya. 33 Ndughu tsake Yosefu tsawakala hambele hake kwa kulola ukulu wawo, kwanzila chaudele mbaka mtsuwanda. Tsawelolesa nawo wakangawala. 34 Tsaweng'ighwa chijo kulawa mmetsa mwa Yosefu, lekeni Benjamini tsakeng'ighwa mala tano kubita ndughu tsake. Apfo tsawaja, wanwa no ukudeng'elela naye.