1 Yosefu kamlaghitsa mbetetsi yula we ing'anda yake, kamlongela, "Ughamemese maghunila ghe iwanu wano chijo chingi ka pfawodaha kughala, kuya wike sendi ya chila imunu mna ghunila lyake. 2 Kuya wike ichikombe changu cha fetsa mna ghunila lya ayula mdodo hamwe na sendi yake ye ichijo." Naye tsakatenda ka Yosefu pfayamlaghitse. 3 Hakuchele nemitondotondo, wawaleka woke hamwe na pfihongwe wawo. 4 Ng'awaghendile baye kutali kulawa mna ghumji, Yosefu kamlongela mbetetsi wake, "Sambi baha wawinze iwanu wala, na hautsowapfika, waghutse, ‘Ule mliha ghehile kwa ighanoghile? 5 Ule mwemwe mwiba chikombe cha mkulu wangu? Angu achi si ichikombe chayonwela mkulu wangu baye, kuya kochilaghulilagha? Chinu chino chamtendile chiha ghendo!’ "

6 Mmbetetsi yula hayawapfikile tsakawalongela mbuli atso. 7 Lekeni wawo wamghutsa, "Mtwatsa una mana yachi haulonga pfino? Twetwe watumwa wako ng'atudaha baye kutenda chinu ka acho! 8 Ulole, hata sendi tsatwonile mna maghunila ghetu tsatumuyitsileni kulawa mna isi ya Kanaani. Lelo twodahatse ukwiba fetsa au nzahabu kulawa mng'anda mwe imtwatsa wako? 9 Imunu wowose mna twetwe ang'oneka nacho, yakomighwe, na twetwe tutsakuwa watumwa wako."

10 Imunu yula kalonga, "Pfinogha, iwe ka pfamlongile. Imunu wowose ang'oneka nacho katsakuwa mtumwa wangu, namwe wangi mtsolekelighwa." 11 Chila imunu kahulumsa hasi ghunila lyake himahima, kalipfughula. 12 Kuya imunu yula kaghendelela ukubama, kandusila kwa imkulu mbaka kwa mdodo. Ne ichikombe tsachoneka mna ghunila lya Benjamini. 13 Baho waghadegha maghwanda ghawo kwa usungu. Kuya wawabapitsa pfihongwe wawo imitsigho, woya mna ghumji.

14 Yuda na ndughu tsake hawapfikile ukaye kwa Yosefu, Yosefu mwenyegho tsayang'ali baho, nawo wamwinamila. 15 Yosefu kawaghutsa, "Ebali mtendile pfino? Apfi ng'ammanyile baye imunu ka nene nodaha kulaghula?"

16 Yuda kamwidika, "Mtwatsa, tukulongele choni? Twodaha kulonga choni? Tulonge choni ili ghweghwe umanye ka twetwe tutotsa? Imulungu kaghona matotso ghetu. Twetwe wose sambi twa watumwa wako, twetwe na yula yoneke ne ichikombe."

17 Lekeni Yosefu kalonga, "Mbe! Sidaha baye kutenda apfo. Imunu yula iyoneke ne ichikombe yaliheka iyo iyatsakuwa mtumwa wangu. Mwemwe wangi muye tseghamba kwa aba wenu."

18 Yuda kamghendela Yosefu kamlongela, "Chondechonde mtwatsa wangu, ndeke nonge naghwe chidogho. Uleke kumbonela maya mtumwa wako, kwaapfila ukulu winawo weghala ne Farao mwenyegho. 19 Mkulu wangu tsakutughutsa, ‘Apfi aba wenu kamghima na mwinaye ndughu yungi?’ 20 Kuya tukwidika, ‘Ona Aba wetu mghima, lekeni kalala, na tunaye mdodo wetu yungi, ayu aba wetu kamweleka hayang'ali kalala. mbala wake mdodo ayo ma kafa, naye kwa mai wake kakala kayeka, naye konoghelwa ng'ani na aba wetu.’ 21 Kuya tsakutulongela watumwa wako, ‘Mghaleni kuna nene nimwone.’ 22 Mtwatsa wangu tsatukulongela, ‘Msongolo ng'odaha baye kumleka aba wake, ang'amleka, aba wake katsakufa.’ 23 Lekeni tsakutulongela watumwa wako, ‘Ka ng'amtsohulumka ne imdodo wenu, ng'amtsombona keli baye.’

24 "Hatuyile kwa aba wetu, tsatumlongela ka pfautulaghitse. 25 Kuya aba wetu katulongela, ‘Mghende mkaghule keli ichijo chidogho.’ 26 Lekeni tsatumlongela, ‘Ng'atudaha baye kuhulumka, mbaka tughende na ndughu yetu mdodo. Ka ng'atsoghenda na twetwe, ng'atudaha baye kumwona imunu yula.’ 27 Kuya mtumwa wako, aba wetu, katulongela, ‘Mwomanya mwehe wangu Raheli tsakanyelekela iwana weli. 28 Yumwe tsakagha. Nani tsanilonga, "Nomanya ghendo ayo wamtsaulatsaula ne imnyama wa kumuhulo." Mana kulawa baho sina nimwone keli. 29 Mng'amsola hayuno naye, na ghehile ghang'amlawila, mwodaha kunitsika mchibaka kwa usungu na unzehe wangu.’

30 "Apfo mtwatsa, ning'oya kwa mtumwa wako, aba wangu bila ya mbwanga yuno, aku ugima wa aba wangu wouhila ugima wa mbwanga ayuno, 31 yang'ona mbwanga yuno ng'ali na twetwe baye, katsakufa. Apfo twetwe watumwa wako, tutsomkoma aba wetu kwa usungu. 32 Nene mtumwa wako, tsanimlongela aba wangu nitsomlolesa msongolo ayuno. Ning'aleka kumuyitsa kuna ghweghwe, nitsakuwa na totso kuna ghweghwe ghamatsuwa ghose. 33 Lelo nokulomba, ndeka nene niwe mtumwa wako hanu ha msongolo yuno, na mleke msongolo yuno yoye ukaye hamwe na ndughu tsake. 34 Lelo nitsodahatse kumghendela aba wangu bila ya msongolo yuno? Sidaha baye ukwona ghehile ighatsomlawila aba wangu."