1 Apfo pfipfo lilanga ne isi pfatsimalile kulumbighwa na wapfilumbe wose iwali mumo. 2 Mne litsuwa lya saba Imulungu kabwihila, kwaapfila tsakafambula ing'onde yake yose. 3 Imulungu kalibaliki litsuwa lya saba, kalitenda lihenzeluke, mana mna litsuwa alyo Imulungu tsakabwihila kwaapfila kafambula ing'onde yake yose ya kulumba.

4 Aino imbuli ye lilanga ne isi hatsilumbighwe.

Kulawa litsuwa lila IMNDEWA hayalumbile lilanga ne isi, 5 tsakukala kuduhu imimeya kune lidongo. Tsimbeghu tsikala ng'ana tsote baye, kwaapfila IMNDEWA tsang'ana yaileke baye imvula itowe na tsakukala kuduhu imunu iyolima muisi. 6 Ghamatsuwa ghala ghamatsi ighakalile hasi mwe iisi ghatsa mchanya na ghaghumila iisi yose. 7 Kuya Imulungu kasola lidongo muisi, kalumba immale kwa lidongo alyo, kamhumulila ghumuhe ghwe ughima mna imula yake, apfo immale kawa imunu mghima. 8 Kuya Imulungu keka konde ako Edeni, ubali wa kwalilawila litsua. Kamwika immale ayo iyamlumbile. 9 Ako Imulungu katenda imibiki inoghile ya chila aina ikule na yeleke ghamatunda ghanoghile. Mghati mwe ibostani tsakukala ne mbiki ghwa ughima ne mbiki ighuwatenda iwanu wamanye ghanoghile na ghehile

10 Tsakukala na ghumto ighung'ali ghughuluma ghamatsi mna konde lya Edeni, kulawa aho tsaghwighola mna imito mine. 11 Ghumto ghwa mwanduso taghwa lyake Pisoni, nagho ghubitila kune isi ya Hafila, ako hana nzahabu. 12 Nzahabu tsa hanu aho tsinogha ng'ani, kuya hana ghamafuta ighonung'ila, na ghamabwe gha bei ng'ulu. 13 Ghumto ghwa keli taghwa lyake Gihoni, ghobitila kune isi yose ya Kushi 14 Ghumto ghwa kadatu taghwa lyake Tigirisi, agho ghobita ubali we ukulawila litsua mwe isi ye Asiriya. Ghumto ghwa kane taghwa lyake Efurati.

15 Kuya IMNDEWA kamwika imunu ayo kune konde lya Edeni alilime na alilolese. 16 IMNDEWA kamlongela, "Kwodaha ukuja litunda lya imbiki wowose mna ibostani, 17 lekeni uleke ukuja ghamatunda ghe imbiki ighuwatenda iwanu wamanye ghanoghile na ghehile, ung'aja kutsakufa ghendo."

18 Kuya Imulungu kalonga, "Ng'apfinoghile baye imunu yuno akale yaliyeka. Nitsomtendela yungi wa kumwapfila, iyeghala naye." 19 Apfo Imulungu kasola lidongo muisi, katendela iwanyama wose na wapfideghe wose. Kuya kamghalila imunu ayo alole mataghwa ghayatsoweng'a, apfo pfipfo wapfilumbe pfawapatile mataghwa ghawo. 20 Apfo imunu ayo kaweng'a mataghwa iwanyama wose na wapfideghe wose, lekeni tsakuduhu wowose wa kumwapfila Adamu mna awo wose.

21 Kuya IMNDEWA kamwing'a imunu ayo inongo ndito ng'ani. Hayawasile, Imulungu kalapfa lubapfu lumwe lwe immale ayo kaghubika hanu hala ne inyama. 22 IMNDEWA kamlumba ipinga kwa lubapfu alo, kamghalila immale ayo. 23 Kuya immale ayo kalonga,

"Ayuno sambi kampate kulawa mna imipate yangu,

ne inyama ilawile mna inyama yangu,

taghwa lyake litsakuwa ‘ipinga,’

kwaapfila kalawa mna immale."

24 Apfo immale katsowaleka aba wake na mai wake, naye katselunga na mwehe wake, nawo watsakuwa lukuli lumwe.

25 Immale na mwehe wake wose tsawakala chidako, lekeni ng'awonile chinyala baye.