1 Litsuwa limwe, Dina imwana wa Lea na Yakobu, kaghenda kuwona iwapinga wa isi ila. 2 Shekemu imwana wa Hamori, Mhivi, imkulu wa isi ila, hayamwonile Dina, kamsola, kawasa naye chingupfu. 3 Ghumoyo wake tsaghumbama ng'ani Dina, kanoghelwa naye na kandusa kumtewetsa. 4 Kuya Shekemu kamlongela aba wake, "Unikwelele pinga yuno, yawe mwehe wangu."

5 Yakobu hayahulike Shekemu kamtendela pfihile Dina, iwanaghe wang'ali kunyika wodima iwanyama, tsakanyamala mbaka hawoyile. 6 Hamori, aba wake Shekemu, tsakaghenda kulonga na Yakobu. 7 Iwana wa Yakobu hawoyile kulawa kunyika, baho wahulika ichilawile. Wona usungu na maya, kwaapfila Shekemu katenda chinu chihile na kawaligha iwanu wa Isiraeli kwa kuwasa na neghe Yakobu. 8 Lekeni Hamori kamlongela, "Mwanangu Shekemu konoghelwa na Dina. Chondechonde mwing'eni yamkwele. 9 Mleke twikwele, twetwe tukwele neghe tsenu namwe mkwele neghe tsetu. 10 Kuya mwodaha kukala na twetwe mna isi yetu, mwodaha kukala hohose hambama, mwodaha kutsuhutsa na kupata sendi."

11 Kuya Shekemu kalonga na aba wake Dina, na ndughu tsake, "Mboneleni libatsi, na nitsomwing'ani chochose chambama. 12 Mnongele tsengele likuwatse na chochose chambama niwaghweke, nitsolapfa ka pfamtsonilongela. Lekeni ngayeni ipinga yuno nimkwele."

13 Iwana wa Yakobu wawedika kwa ukuwabugha Shekemu na aba wake, kwaapfila Shekemu ma tsakamtendela pfihile lumbu wawo Dina. 14 Wawalongela, "Ng'atudaha baye kumleka lumbu wetu yakwelighwe ne imunu yang'engile ngoma baye. Kutenda apfo kutsotughalila chinyala. 15 Tutsowatoghola kwa laghitso lyino, muwe ka twetwe, chila immale mna mwemwe yengile ngoma. 16 Kuya twetwe tutsowakwela neghe tsenu, namwe mtsowakwela neghe tsetu. Apfo tutsokala hamwe na kuwa wamwe. 17 Mng'alema kutoghola malaghitso na kwingila ngoma, tutsomsola lumbu wetu na kuka naye."

18 Hamori na Shekemu imwanaghe wanoghelwa na malaghitso agho, 19 na mbwanga ayo ng'akawe baye kutenda apfo kwaapfila pfayanoghelighwe na neghe Yakobu. Shekemu yang'ali yotogholighwa ng'ani mkaye mwawo kubita wose.

20 Hamori na Shekemu, imwanaghe, waghenda hanu ha mtingano hane libani likulu lya ghumji ghwawo, walonga ne iwanu wa isi yawo. 21 Walonga, "Iwanu wano sale tsetu. Leka wakale mna isi yetu na watsuhutse kwaapfila tuna isi ng'ulu. Twodaha kuwakwela neghe tsawo na wawo wodaha kuwakwela neghe tsetu. 22 Lekeni iwanu wano watsotoghola kukala na twetwe na kuwa wanu wamwe kwa laghitso lyino, chila immale mna twetwe yengile ngoma ka wawo pfawengile ngoma. 23 Apfi iwanyama wawo wose na pfinu pfawo ng'apfitsokuwa pfetu? Leka tuwatoghole wakale kuna twetwe." 24 Iwanu wose wa isi ila watoghola achila ichilongighwe na Hamori na imwanaghwe, Shekemu, apfo iwamale wose tsawengila ngoma.

25 Ghamatsuwa madatu hambele, iwamale wose hawang'ali ne usungu wo ukwingila ngoma, iwana weli wa Yakobu, Simeoni na Lawi, lumbu tsake Dina, wasola mimaghe yawo wawedukitsa mmakaye mwawo, wawakoma iwamale wose. 26 Wamkoma Hamori na Shekemu kwa mimaghe, wamsola Dina kulawa mng'anda mwa Shekemu woka naye. 27 Iwana wa Yakobu wawoyila keli iwanu awo iwawakomile na waghusola ghumji ghose kwaapfila tsawamtendela pfihile lumbu wawo. 28 Wawasola wang'olo wawo, ng'ombe wawo, pfihongwe wawo, na pfinu pfose ipfili mna ghumji na ipfili kumghunda. 29 Wasola mali tsawo tsose, iwana wawo wose ne iwapinga wawo na pfose ipfili mna tsing'anda tsawo. 30 Kuya Yakobu kawalongela Simeoni na Lawi, "Mngalila maghayo, lelo Wakanaani, Waperizi na iwanu iwokala mna isi ino watsonihila. Nene nahela iwanu wengi, wang'elunga na kunitowa, nene na kaye yangu tutsohinyighwa."

31 Lekeni wamwidika, "Ng'atudaha baye kumleka lumbu wetu yatendighwe ka mhembu."