1 Abrahamu tsakakala kalala ng'ani, na Imulungu tsakambaliki mna ghose ghayatendile. 2 Litsuwa limwe Abrahamu kamlongela mtumwa wake mkulu kubita iwatumwa wangi, iyang'ali yakwimilitsa mali yake yose, "Wike ghumoko ghwako hane hatsa lyangu, 3 nobama wilahe kwa taghwa lye IMNDEWA, Imulungu wa kulanga na iisi, ka ng'utsomkwelela baye imwanangu mna iwanu iwokala hano Kanaani, 4 ila uye mna isi iyanyelekighwe, umkwelele ipinga mwanangu Isaka kulawa mna ndughu tsangu."

5 Imtumwa ayo kamghutsa, "Pfii lelo ipinga ayo ang'alema kutsa na nene mna isi ino, nimuyitse mwanagho mna isi yulawile?"

6 Abrahamu kamwidika, "Bae! Walangitse uleke kumuyitsa ako mwanangu. 7 IMNDEWA, Imulungu wa kulanga, iyandapfile mkaye mwa aba wangu na mna isi yanyelekighwe, tsakelaha kuna nene ka katsoweng'a watsukulu wangu isi ino. Yeye katsomtuma malaika wake yakulongole ukamghalile mwanangu ipinga kulawa ako. 8 Ipinga ayo ang'alema kutsa naghwe, ghweghwe ng'utsakwohighwa baye ne ukwilaha kwangu kuno. Lekeni uleke kumuyitsa ako imwanangu." 9 Apfo imtumwa ayo keka ghumoko ghwake hasi mwe hatsa lya Abrahamu, imtwatsa wake, kuya kelaha kutenda aghala ghayamlongele Abrahamu.

10 Kuya imtumwa ayo kawasola ngamiya kumi kulawa mna ngamiya we imtwatsa wake na pfinu pfingi pfinoghile kulawa kwa imtwatsa wake, kaghenda mna ghumji ghwayakalile Nohari, ubali wa kuchanya wa Mesopotamiya. 11 Hayapfikile, kawafughamisa ngamiya habehi ne chisima ichikalile kunze mwa ghumji. Tsaikala nemihe iwapinga hawoghenda kudegha ghamatsi. 12 Kuya kalomba, "Ghwe Imtwatsa, Imulungu wa mtwatsa wangu Abrahamu, unyapfile leloli nimpate ipinga ayo, na umwonele libatsi mtwatsa wangu Abrahamu. 13 Lola, nyima habehi na chisima chino, na wali we iwanu wa isi ino wakutsa kudegha ghamatsi. 14 Imwali iyanitsomlongela yatule chiha chake yangaye ghamatsi nuwe, naye ang'angaya ghamatsi nene na ngamiya wangu, ayo yawe yuyo yumsaghulile imtumwa wako Isaka. Ing'alawila pfino nitsomanya ka kumwonela libatsi mtwatsa wangu."

15 Ng'ana yamalitse baye kulomba, baho Rebeka tsakapfika ne chiha chake mwitwi. Rebeka tsakakala neghe Betueli, imwana wa Milika ipinga wa Nohari, ndughu yake Abrahamu. 16 Mwali ayo tsakanogha ng'ani, na ng'ana yawase baye ne mmale wowose, kahulumka hane chisima, kadegha ghamatsi, kagheluka. 17 Imtumwa ayo kamtsumila kamlongela, "Chonde chonde ngaya ghamatsi chidogho nuwe."

18 Mwali ayo kalonga, "Haya nuwa mkulu wangu." Kuya katula chiha himahima, kachikinda mmoko kamwing'a ghamatsi yanwe. 19 Hayamalitse kumwing'a ghamatsi, kamlongela, "Pfipfila nitsoweng'a ghamatsi ngamiya wako, wanwe weghute." 20 Apfo imwali ayo kaghida ghamatsi himahima hanu ho kunwela ghamatsi iwanyama, kuya katsuma keli hane chisima kadegha ghamatsi ghangi, kawanwesa ngamiya wake wose. 21 Imtumwa ayo kaghendelela kumlola mwali ayo aku kanyamala tulu, ili yamanye ka Imulungu kamwapfila kumpata mwali ayo.

22 Ngamiya hawafambule kunwa ghamatsi, imtumwa ayo kamwing'a imwali ayo pete ya nzahabu ya bei ng'ulu na kampfatsa bangili mbili tsa nzahabu mna ghamoko. 23 Kuya imtumwa ayo kamghutsa, "Chonde chonde, nongele ghweghwe uli neghe noni? Pfii mng'anda mwa aba wako hana hanu ho ukuwasa twetwe?"

24 Rebeka ayo kamwidika, "Nene na neghe Betueli, imwana wa Milika mwehe wa Nohari." 25 Kaghendela kulonga, "Ukaye yetu hana mitsani na ipfijo pfingi, pfipfila hanu ho kuwasa mwemwe habaho."

26 Baho imtumwa yula kenama, kamtamanila IMNDEWA. 27 Kalonga, "Yatunyighwe Imulungu, Imulungu wa mtwatsa wangu Abrahamu, iyang'alekile baye kumwonela uluso mtwatsa wangu na kumtendela achila chayamlongele. Na hata nene IMNDEWA kanongotsa mbaka mna lukolo lwa mtwatsa wangu."

28 Kuya mwali yula katsuma kaghenda kuwalongela iwanu iwali ukaye ha mai wake aghala ghose ighalawile. 29 Rebeka tsakakala na lumbu wake iyakemighwe Labani, Labani katsumila kuchisima kwayakalile imtumwa wa Abrahamu, 30 kwaapfila Labani tsakayona pete ila na bangili mna ghamoko gha lumbu wake, na tsakahulika mbuli tsayalongelighwe tsa imunu ayo. Kampfika imunu ayo kema habehi na ngamiya wake mmbalimbali mwe chisima. 31 Labani kamlongela, "Utse ukaye, ghweghwe yubalikighwe ne Imtwatsa. Ule kwima kunze? Nene ma nikuhandalila hanu ho kuwasa na hanu ho kukala ngamiya wako."

32 Apfo imtumwa ayo wa Aburahamu kengila mng'anda. Labani kawadohola ngamiya, kaweng'a chijo, kaweng'a ghamatsi gha kuhopfughila ghamaghulu yeye ne iwanu wake. 33 Kuya wamwikila chijo, lekeni yeye kalonga, "Sikuja baye mbaka niwalongele chanibama kulonga."

Labani kamlongela, "Lelo tulongele."

34 Imunu yula kalonga, "Nene namtumwa wa Abrahamu, 35 Imulungu kambaliki ng'ani mtwatsa wangu, kawa munu mkulu, kana mali nyingi. IMNDEWA kamwing'a iwang'olo ne iwamene na fetsa na nzahabu na iwatumwa wamale ne iwapinga na ngamiya na pfihongwe. 36 Sara kamwelekela mtwatsa wangu imwana mna ubala wake, naye kamwing'a imwana ayo mali tsake tsose. 37 Kuya mtwatsa wangu kanongela nilahe, tsakanongela, ‘Uleke kumkwelela mwanangu ipinga kulawa mna isi ya Wakanaani yanikala nawo. 38 Ila ughende ukaye kwa aba wangu, mna lukolo lwangu, ukamkwelele ipinga mwanangu Isaka.’ 39 Kuya nimghutsa IMNDEWA wangu, ‘Pfihi yang'alema kutsa na nene?’ 40 Lekeni yeye kanyidika, ‘IMNDEWA, iyanimtegheletsa ghamatsuwa ghose katsowatuma malaika wake waghende naghwe, na katsoutenda ghumwanza ghwako ghunoghe. Kuya kutsomkwelela mwanangu ipinga kulawa mkaye mwa aba wangu, mna lukolo lwangu. 41 Ung'apfika mna lukolo lwangu, ka ng'awatsokwing'a ipinga baye, chawilahile ng'achitsokupata baye.’

42 "Leloli hanipfikile hane chisima tsanilomba, ‘Ghwe Imtwatsa, Imulungu wa mtwatsa wangu Abrahamu, chonde chonde unyapfile, ungaye achila chanitsilile. 43 Ulole, nyima ahano habehi na chisima, yang'atsa mwali kudegha ghamatsi nitsomlongela, "Chonde chonde ngaya ghamatsi chidogho mna ichiha chako nuwe," 44 Naye yang'anilongela, "Nuwa, pfipfila nitsowadeghela ghamatsi na ngamiya wako," imwali ayo yuyo Imulungu iyamsaghulile imwana wa mtwatsa wangu.’ 45 Ng'ana nimalitse kulomba mna ghumoyo ghwangu, lola Rebeka katsa na chiha mwitwi mwake. Kahulumka kuchisima kudegha ghamatsi. Nimlongela, ‘Chondechonde ngaya ghamatsi nuwe.’ 46 Rebeka katula himahima ichiha chake ichikalile mwitwi mwake, kalonga, ‘Nuwa, pfipfila nitsowanwesa ngamiya wako.’ Apfo nene nuwa, kuya kawanwesa ngamiya wangu. 47 Nimghutsa, ‘Nongele ghweghwe uli neghe nani?’ Naye kanyidika, ‘Nene neghe Betueli, imwana wa Nohari na Milika.’ Baho nimpfatsa pete na bangili mna ghamoko ghake. 48 Kuya ninama, nimtamanila Imtwatsa. Nimtunya Imulungu, Imulungu wa mtwatsa wangu Abrahamu, iyanilongotse mnzila kughenda kwa lukolo lwa mtwatsa wangu, kumkwelela ipinga imwana wa mtwatsa wangu. 49 Lelo mng'amwonela libatsi na kumtendela uluso mtwatsa wangu mnongele, ka si pfipfo baye, mnongele na nene nitsomanya nitendetse."

50 Labani na Betueli wamwidika, "Imbuli ino yolawa kwa IMNDEWA, ng'atudaha baye kulonga chinu chochose. 51 Rebeka ayuno ano, umsole mke. Leka yawe ipinga wa imwana wa mtwatsa wako, ka IMNDEWA pfayalongile." 52 Imtumwa wa Abrahamu hayahulike achila chawalongile, kenama kamtamanila Imulungu. 53 Kuya imtumwa ayo kalapfa pfinu pfa fetsa na nzahabu na ghamaghwanda kamwing'a Rebeka. Pfipfila kaweng'a pfinu pfa bei ng'ulu lumbu wake Rebeka na mai wake.

54 Kuya imtumwa wa Abrahamu na iwanu iwelongotse naye waja chijo na wanwa, na chilo chila wawasa baho. Hawalamke nemitondo, kalonga, "Mndeke mbuye kwa mtwatsa wangu."

55 Lekeni lumbu wake Rebeka na mai wake tsawalonga, "Mleke Rebeka yakale na twetwe ka ghamatsuwa kumi, kuya mwodaha kuka naye."

56 Lekeni yeye kalonga, "Mleke kunikawitsa, mana IMNDEWA kaghutenda ghumwanza ghwangu ghunoghe, mndeke mbuye kwa mtwatsa wangu."

57 Kuya walonga, "Leka tanu tumkeme Rebeka mwenyegho tumghutse."

58 Apfo wamkema Rebeka wamghutsa, "Pfii kwobama kuka na imunu yuno?"

Naye kedika, "Ona, nakuka naye."

59 Apfo, wamleka yoke na imtumwa wa Abrahamu ne iwanu wake, aku kelongotsa na mtumwa pinga wa ukaye yawo. 60 Wambaliki Rebeka, wamlongela,

"Ghwe lumbu wetu,

uwe mai we iwanu ketse ketse,

iwanagho waitawale imiji ya wanebe wawo!"

61 Kuya, Rebeka na iwatumwa wake mapinga wadina ngamiya, wamuwinza mtumwa wa Abrahamu, woka naye.

62 Ghamatsuwa agho, Isaka tsakalawa Beerilahairoi, na ang'ali yokala Negebu. 63 Tsuwa limwe nemihe Isaka tsakaghenda kuchiwala ukwalangula, na hayalolile, kawona ngamiya wakutsa. 64 Rebeka hayamwonile Isaka, kahulumka mna ngamiya wake. 65 Kamghutsa imtumwa wa Abrahamu, "Angu ayula iyakutsa kutubokela kuchiwala nani?"

Imtumwa ayo kamwidika, "Ayuno iyo mtwatsa wangu. Kuya Rebeka kasola chitambala chake keghubika chihanga."

66 Kuya imtumwa ayo kamlongela Isaka ghose ghatendile. 67 Isaka kamsola Rebeka, kamghala mna chibumbulika chayang'ali yokala Sara, mai wake, kawa mwehe wake. Rebeka kamnoghela Isaka, apfo kamkanza Isaka kwa lifwa lya mai wake.