1 Kuya Imulungu kambaliki Nuhu na iwanaghe, kawalongela, "Mweleke, mwongetseke, muimemese isi. 2 Iwanyama wose, iwapfideghe, iwasomba na iwanyama iwotambala watsompfukani mwemwe, wose wamna ghamoko ghenu. 3 Iwanyama wose watsakuwa chijo chenu, nomwing'ani ka pfaniweng'ile imimeya kuwa chijo chenu. 4 Lekeni mleke kuja nyama ine idamu, nomghomani kwaapfila ughima wamna idamu. 5 Imunu wowose ang'amkoma miyaghe, katsohighighwa. Nitsomuhigha kwa kumkoma, imnyama wowose iyomkoma imunu.

6 Wowose iyomkoma imunu,

katsokomighwa ne imunu yungi,

kwaapfila Imulungu kamlumba imunu kwa kwighala naye.

7 "Namwe mweleke, mwongetseke,

mweleke ng'ani, mwongetseke muisi."

8 Imulungu kamlongela Nuhu ne iwanaghe, 9 "Lelo nakwika laghano lyangu namwe na iwatsukulu wenu 10 na chila ichilumbe ichili hamwe na mwemwe, iwapfideghe, iwanyama wa kufughighwa na wa kumuhulo, na awala wose iwalawile namwe mna safina. 11 Nakwika laghano na mwemwe, Sitsowakoma keli baye iwapfilumbe wose wane ughima kwa gharika, gharika ng'alitsoihinya keli baye isi." 12 Imulungu kalonga, "Achino chicho chitango cha laghano lyanikwika nene na mwemwe na chila chiumbe ichili hamwe na mwemwe kwa pfeleko pfose ipfikutsa. 13 Nakwika uminde wa mvula mna ghamawingu, nawo utsakuwa chitango cha laghano lyangu na isi. 14 Hanu hohose hanighala ghamabingu muisi na upinde wa mvula hautsolawila mna ghamabingu, 15 nitsolikumbuka lilaghano lyangu na mwemwe na iwapfilumbe wose wane ughima. Gharika ng'alitsowakoma keli baye iwapfilumbe wose. 16 Uminde wa mvula hautsolawila, nitsowona na kukumbuka laghano lyangu lya ghamatsuwa ghose na iwapfilumbe wose iwali muisi. 17 Achino chitsakuwa chitango cha laghano lyanyikile na iwapfilumbe wose muisi."

18 Iwana wa Nuhu iwalawile mna safina tsawakala Shemu Hamu na Yafeti. Hamu kakala aba wa Kanaani. 19 Awo iwo iwana wadatu wa Nuhu, na kubitila wawo iwanu wose wenela muisi.

20 Nuhu iyo iyanzile kulima, tsakahanda mitsabibu, 21 Nuhu hayanwele dipfai, kapatika, katsula maghwanda ghake, kawasa chidako mna chibumbulika chake. 22 Hamu, aba wake Kanaani, hayamwonile aba wake kachidako, kalawa kunze kawalongela ndughu tsake weli. 23 Lekeni Shemu na Yafeti wasola lighwanda walika mmahegha mwawo, kuya waghenda chisoghosogho, wamghubika aba wawo. Pfihanga pfawo pfihundukila kungi, waleke kumwona aba yawo pfayali chidako. 24 Nuhu hayalamke na hayamanyile mwanaghe mdodo pfayamtendele, 25 kalonga,

"Kanaani yalanighwe!

Katsakuwa imtumighwa wa ndughu tsake."

26 Kuya kalonga,

"Yatunitsighwe Imtwatsa, Imulungu wa Shemu!

Kanaani katsakuwa imtumwa wa Shemu.

27 Imulungu yamwongetsele Yafeti watsukulu,

awatende watsukulu wake wakale ne iwanu wa Shemu!

Kanaani katsakuwa imtumwa wa Yafeti."

28 Kulawa gharika haimalile Nuhu tsakakala miyaka 350. 29 Kuya kafa hakalile na miyaka 950.