1 Mne isi ila tsakukulawila inzala ng'ulu kubita nzala ila ya ghamatsuwa gha Abrahamu. Isaka kamghendela Abimeleki imfalume wa Wafilisti ako Gerari. 2 Imulungu kamlawila Isaka, kamlongela, "Uleke kughenda Misiri, ukale kune isi yanitsokulongela. 3 Ukale mna isi ayo, nitsokala naghwe na nitsokubaliki. Kwaapfila nitsokwing'a isi tsino tsose ghweghwe na watsukulu wako. Nitsolitimitsa laghano lyanitendile na aba wako Abrahamu. 4 Nitsokwing'a watsukulu wengi ka tsinondo itsili kulanga na nitsoweng'a isi tsino, na kubitila iwanagho iwanu wa isi tsose watsobalikighwa. 5 Nitsokubaliki, kwaapfila Abrahamu kanihulikitsa, katenda ghanimlongele atende na kakinda ghamalaghitso ghangu."

6 Apfo Isaka tsakakala ako Gerari. 7 Iwanu wa Gerari hawamghutsile mbuli tsa ipinga wake, yeye tsakedika, "Ayuno lumbu wangu." Mana tsakapfuka kulonga ka Rebeka mwehe wake, kwaapfila iwanu wa isi ila wang'amkomile wamsole Rebeka iyanoghile ng'ani. 8 Isaka tsakakala hala ghamatsuwa mengi, tsuwa limwe Abimeleki imfalume wa Wafilisti, tsaangali yolola kunze hane dirisha lyake, kamwona Isaka komkinda kinda Rebeka, mwehe wake. 9 Apfo Abimeleki tsakamkema Isaka, kalonga, "Ayuno mwehe wako ghendo! Mbona tsakulonga ayo lumbu wako?"

Isaka kamwidika, "Tsanipfuka ning'akomighwe na wang'amsolile Rebeka."

10 Kuya Abimeleki kalonga, "Ule kututendela pfino? Immale yumwe ang'awasile ne ipinga wako, ambe ung'atughalile ghamaghomba." 11 Apfo Abimeleki kawakanya iwanu wake, kawalongela, "Imunu wowose iyatsomtendela pfihile imunu yuno au ipinga wake, ayo katsokomighwa."

12 Mna ghumwaka ghughula, Isaka tsakahanda tsimbeghu mna isi ila na tsakapfuna mala miya imwe ya achila chahandile, kwaapfila Imulungu tsakambaliki. 13 Isaka tsakapata ipfinu pfingi, kuya kawa na mali nyingi. 14 Isaka tsakakala ne iwang'olo wengi, wang'ombe wengi na watumwa wengi mbaka Wafilisti wamwonela chepfu. 15 Apfo Wafilisti tsawapfifukia ipfisima pfose ipfihimbighwe ne iwatumwa wa Abrahamu, hala Abrahamu hayang'ali mghima.

16 Kuya Abimeleki kamlongela Isaka, "Ulawe mna isi yetu, mana sambi kuna ngupfu kubita twetwe." 17 Apfo Isaka kalawa mna isi ila, kaghenda kukala kune ulwanda lwa Gerari. 18 Kuya Isaka kapfihimba keli ipfisima apfila ipfihimbighwe mna ghamatsuwa gha Abrahamu, naye kapfikema mataghwa ghaghala ghapfing'ile aba wake.

19 Iwatumwa wa Isaka wahimba chisima mna ulwanda na wapata ghamatsi ghanoghile. 20 Lekeni iwadimi wa Gerari tsawesonga ne iwadimi wa Isaka walonga, "Ghamatsi ghano ghetu." Apfo Isaka kachikema chisima chila, "Kwisonga."

21 Iwatumwa wa Isaka wahimba keli chisima chingi, lekeni wesongela keli chisima acho. Naye kachikema "Tsengwe." 22 Isaka kalawa hanu hala, kahimba chisima chingi lekeni ng'awesongele baye chisima acho, apfo kachikema Rehoboti. Kalonga, "Kwaapfila IMNDEWA katulekelela, twetwe tutsakongetseka mna isi ino."

23 Isaka kalawa ako kaghenda Beerisheba. 24 Chilo chila Imulungu kamlawila kamlongela, "Nene na Imulungu wa aba wako Abrahamu. Uleke kupfuka, nahamwe naghwe. Nitsokubaliki na nitsokwing'a watsukulu wengi kwa laghano lyanikile na mtumighwa wangu Abrahamu." 25 Isaka katsenga hanu ha kulapfila inambiko ha ghamabwe, kamtanila Imtwatsa. Kuya katsenga hema, na iwatumwa wake wahimba chisima chingi.

26 Abimeleki, Ahusati sale yake, na Fikoli mkulu wa iwang'ewele walawa Gerari wamghendela Isaka. 27 Isaka kawaghutsa, "Ule mtsa kuna nene, ambe tsamnihila na mniwinga?"

28 Wamwidika, "Lelo twomanya Imulungu kahamwe naghwe, apfo twetwe twakona pfinogha ghweghwe na twetwe twilahe, kuya twilaghane na ghweghwe, 29 ka ng'utsotutendela ghehile, ka twetwe pfang'atukutendele ghehile, ila tsatukutendela ghanoghile na tukuleka ughende tseghamba. Ghweghwe sambi Imulungu kakubaliki." 30 Isaka kawatendela chihungo, wose waja na kunwa. 31 Walamka nemitondotondo litsuwa liwinzile, welaha ka pfawalongile. Kuya Isaka kawasindikitsa kawaleka waghende tseghamba. 32 Mna litsuwa lilila watumwa wa Isaka wamtsila wamlongela mbuli tsa achila ichisima chawahimbile, walonga, "Tupata ghamatsi." 33 Isaka kachikema chisima chila Sheba, apfo tsawaghukema ghumji agho Beerisheba.

34 Esau hakalile na miyaka arubaini, kakwela iwapinga weli Wakanaani, Yudisi imwana wa Beeri na Basemati imwana wa Eloni. 35 Iwapinga awo weli tsawaghala usungu kwa Isaka na Rebeka.