1 Hambele, iwanu wamlongela Yosefu, "Aba wako koghula." Apfo kawasola iwanaghe weli Manase na Efraimu, waghenda kumwona Yakobu. 2 Iwanu hawamlongele Yakobu, "Imwanagho Yosefu kakutsa kukulola," Isiraeli kapata ngupfu na kakala mlusatsi. 3 Yakobu kamlongela Yosefu, "Imulungu Iyane Ngupfu ng'ani tsakandawila ako Luzu, mna isi ya Kanaani, kanibaliki. 4 Kanongela, ‘Nitsokwing'a iwana wengi, apfo watsukulu wako watsakuwa kolo nyingi, nitsoweng'a watsukulu wako waitawale isi ino matsuwa ghose.’ "

5 Yakobu kaghendelela kulonga, "Yosefu, iwanagho weli, yuweleke ano Misiri ng'ana nene sina mvike baye, awo wose wanangu, Efraimu na Manase watsakuwa wanangu ka pfawali Rubeni na Simoni. 6 Ung'eleka iwana wangi, awo watsakuwa wako, ng'awatsogholighwa baye isi yangu, ila watsogholighwa kubitila mataghwa gha Efraimu na Manase. 7 Notenda pfino kwa achila ichimlawile mai wako, Raheli. Haning'ali nikuya kulawa isi ya Padani Raheli tsakafila mna isi ya Kanaani, habehi na kupfika Efrata, tsambona usungu ng'ani. Apfo tsanimtsika baho, mmbalimbali mwa nzila ighenda Efrata, sambi yokemighwa Betilehemu."

8 Isiraeli hawonile iwana wa Yosefu, kamghutsa, "Awano tsina nani?"

9 Yosefu kamwidika aba wake, "Awano wanangu, iyangaile Imulungu haning'ali hano Misiri."

Kuya Isiraeli kalonga, "Chondechonde ngalile hano habehi niwabaliki." 10 Nenge tsa Isiraeli ng'atsing'ali kwona pfinoghile baye kwaapfila tsakalala. Apfo Yosefu kawasoghetsa iwanaghe habehi na aba wake, naye kawahaghatila na kawanonela. 11 Isiraeli kamlongela Yosefu, "Tsanyaghitsa sitsokwona keli baye, lekeni pfipfila Imulungu kabama niwone iwanagho." 12 Kuya Yosefu kawasola iwanaghe mmahatsa mwa Isiraeli na kamwinamila mbaka chihanga chake chidonza hasi.

13 Yosefu kamwika Efraimu ubali wa kumoso wa Isiraeli na Manase ubali wa kujilo. 14 Lekeni Isiraeli kaghugholosa ghumoko ghwake ghwa kujilo na kaghwika mwitwi mwa Efraimu, iyali mdodo, na ghumoko ghwake ghwa kumoso kaghwika mwitwi mwa Manase, iyali mkulu, mwana chaudele. 15 Kuya Isiraeli kambaliki Yosefu, kamlongela, "Ghwe Imulungu wa aba tsangu Abrahamu na Isaka iwakutegheletse mna ukukala kwao kose, Imulungu iyanilongotse mna ughima wangu mbaka leloli! Yawabaliki. 16 Malaika, iyang'ombole nene kulawa mna ghehile ghose, yawabaliki wasongolo wano. Taghwa lyangu na mataghwa gha iwabala wangu, Abrahamu na Isaka yakale mna iwasongolo wano, na wawe na iwana ketseketse na watsukulu ketseketse!"

17 Yosefu hayonile aba wake kamwikila Efraimu mwitwi ghumoko ghwa kujilo kona maya. Apfo kaghusola ghumoko ghwa aba wake kulawa mwitwi mwa Efraimu kaghwika mwitwi mwa Manase. 18 Yosefu kamlongela aba wake, "Bae aba wangu. Ayuno ano chaudele, wike ghumoko ghwako mwitwi mwake."

19 Lekeni aba wake tsakalema, kalonga, "Mwanangu nomanya chanitenda. Pfipfila iwana wa Manase watsakuwa wakulu. Lekeni mdodo wake kakuwa mkulu kubita yeye, na watsukulu wake watsakuwa wengi."

20 Apfo Isiraeli kawabaliki litsua lilila kalonga, "Waisiraeli watsoghakema mataghwa ghenu hawotsobaliki, watsolonga, ‘Imulungu yakutendele ghanoghile ka Efraimu na Manase.’ " Kwa kutenda apfo kamwika Efraimu hambele ya Manase.

21 Kuya Yakobu kamlongela Yosefu, "Ka pfaumbona, nene nahabehi kufa, lekeni Imulungu katsokala hamwe naghwe, naye katsowoitsa mna isi ya iwabala wenu. 22 Nokwing'a ghweghwe isi ya Shekemu na simwing'a baye ndughu yako yungi, isi ila ine lidongo linoghile niibokile kulawa kwa Waamori kwa kwitowa nawo kwa lipanga na uminde wangu."