1 Sara tsakakala na miyaka miya imwe na ishirini na saba. 2 Sara tsakafila Kiriatharaba, iyo Heburoni mna isi ya Kanaani. Abrahamu kamlilila na kamwikila matanga.

3 Abrahamu tsakaluleka lukuli lwa mwehe wake, kalawa kaghenda kulonga ne Wahiti, kawalongela, 4 "Nene namuhenza mna mwemwe mniutsile hanu ho ukutsikila, nobama nimtsike mwehe wangu."

5 Wahiti wamwidika Abrahamu, 6 "Tutegheletse imtwatsa wetu, Ghweghwe kwa imunu mkulu kuna twetwe, mtsike mwehe wako kokose kwaubama mna pfibaka pfetu. Kuduhu imunu iyatsokulemela kukwing'a hanu umtsike mwehe wako."

7 Kuya Abrahamu kawenamila Wahiti. 8 Kawalongela, "Ka mwondekela nimtsike mwehe wangu, chonde chonde mlombeni Efuroni mwana wa Sohari, 9 yanihutsile mango lila lya Makipela, ilili hane mbaka wa mghunda wake. Mlombeni yanihutsile nihimbe ipfibaka, yanihutsile hambele henu kwa sendi yoyose iyobama."

10 Efuroni tsakakala na Wahiti wayaghe iwetingane mna libani kulu lya ghumji. Apfo kamwidika Abrahamu hambele he Wahiti, 11 kamlongela, "Bae imtwatsa, nitegheletse, nokwing'a mghunda wose na mango ilili mumghunda amwo, kuya nokwing'a hambele he iwanu wangu, umtsike mwehe wako."

12 Abrahamu kawenamila keli iwanu wa isi ila, 13 kamlongela Efuroni, aku iwanu womtegheletsa, "Chonde chonde, nolomba unitegheletse. Nitsoghula mghunda ghwose, nolomba utoghole nikulihe, nimtsike mwehe wangu."

14 Efuroni kamwidika Abrahamu, 15 "Nitegheletse mtwatsa wangu, mghunda ighuhutsighwa kwa pfihindi miya nne pfa fetsa kuna nene na ghweghwe si chinu baye. Mtsike mwehe wako."

16 Abrahamu katoghola chayalongile Efuroni, kampetela ka pfalongile hambele he iwanu, pfihindi miya nne pfa fetsa, ka pfaibamighwe ne iwatsulutsi wa ghamatsuwa agho.

17 Apfi pfipfo Abrahamu pfayaghulile mali ya Efuroni ako Makipela habehi na Mamre, tsakaghula mghunda na mango na mibiki yose iili mumghunda mbaka hane mibaka. 18 Pfinu apfo tsakeng'ighwa Abrahamu pfiwe pfake hambele ye Wahiti wose iwakalile hala mna mtingano ula.

19 Kuya Abrahamu kamtsika Sara, mwehe wake hane mango alyo lya Makipela habehi na Mamre mna isi ya Wakanaani. 20 Apfo mghunda aghwo na mango iili amwo, Wahiti tsawamwing'a Abrahamu hawe hanu hake ho ukutsikila.