1 Aho mwanduso ghendo Imulungu tsakalumba lilanga na isi 2 Isi yose tsaikala yahela lilumbo na yahela ichinu. Ichisi tsachighubika ghamatsi ghane china chirefu ighaghubike chila hanu. Ghumuhe ghwe Imulungu tsangungali ghwoyungayunga mchanya mwe ghamatsi. 3 Kuya Imulungu kalonga, "Ghumwanga ghulawile." Baho, ghumwanga ghulawila. 4 Imulungu kaghwona ghumwanga ghunogha, Imulungu kabaghula ghumwanga ne ichisi. 5 Imulungu kaghwukema ghumwanga "Misi," na ichisi kachikema "Chilo." Mihe ibita, nemitondo itsa, alyo tsatsuwa lya mwanduso.

6 Kuya Imulungu kalonga, "Lilanga lilawile, lighole ghamatsi na ghamatsi." 7 Apfo Imulungu katenda lilanga, kaghola ghamatsi, ghamwenga ghakale hasi, ghamwenga ghakale mchanya mwe lilanga. Ikala pfipfo. 8 Imulungu kaling'a taghwa lilanga lila "Kulanga". Mihe ibita, nemitondo itsa, alyo tsalikala litsuwa lya keli.

9 Kuya Imulungu kalonga, "Ghamatsi ighali hasi mwe ililanga ghakale hanu hamwe, ne lidongo ilisakale lyoneke." Ikala pfipfo. 10 Imulungu kalikema dongo lila ilisakale, "Isi," na ghamatsi ighakalile hamwe "Ibahari." Imulungu tsakona pfinogha. 11 Kuya Imulungu kalonga, "Isi ilapfe imimeya, imimeya iikweleka tsimbeghu, na imibiki ikweleka ghamatunda ghane tsimbeghu." Ikala pfipfo. 12 Apfo isi ilapfa imimeya, imimeya iikweleka tsimbeghu ka pfaili, na imibiki iikweleka ghamatunda ghane tsimbeghu ka pfaili. Imulungu tsakona pfinogha. 13 Mihe ibita, nemitondo itsa, alyo tsalikala litsuwa lya kadatu.

14 Kuya Imulungu kalonga, "Pfilawile ipfimuli mlanga, pfibaghule imisi na ichilo. Pfilanguse ukwandusa kwa ghamatsuwa, misimu na miyaka. 15 Pfimulike mlanga na kulapfa ghumwanga muisi." Ikala pfipfo. 16 Imulungu kalumba ipfimuli ipfikulu pfibili, litsua litawale nemisi, na lwetsi lutawale nechilo. Pfipfila kalumba na tsinondo. 17 Imulungu keka ipfimuli mlanga pfimulike muisi, 18 pfitawale nemisi na nechilo, napfo pfibaghule ghumwanga ne ichisi. Imulungu kona pfinogha. 19 Mihe ibita, nemitondo itsa, alyo tsalikala litsuwa lya kane.

20 Kuya Imulungu kalonga, "Wapfilumbe wengi iwali waghima wameme mna ghamatsi na wapfideghe waghuluke mlanga." 21 Apfo Imulungu kalumba wapfilumbe wakulu ng'ani we ibahari, wapfilumbe wose waghima iwamemile mna ghamatsi ka pfawali, na wapfideghe wose ka pfawali. Imulungu kona pfinogha. 22 Imulungu kawabaliki pfilumbe, kawalongela wakeleke, wameme mna tsibahari, na wapfideghe wongetseke muisi. 23 Mihe ibita, nemitondo itsa, alyo tsalikala litsuwa lya tano.

24 Kuya Imulungu kalonga, "Isi ilapfe wapfilumbe waghima ka pfawali, iwanyama iwofughighwa na wa kumuhulo ka pfawali, na wapfilumbe iwotambala ka pfawali." Ikala pfipfo. 25 Apfo Imulungu kalumba iwanyama wa kumuhulo ka pfawali, iwanyama iwofughighwa ka pfawali, na wapfilumbe iwotambala ka pfawali. Imulungu tsakona pfikala pfinogha.

26 Kuya Imulungu kalonga, "Tulumbe iwanu weghale na twetwe, na wawe ka twetwe. Watsowatawala iwasomba, wapfideghe ne iwanyama wose iwofughighwa na wa kumuhulo, na wapfilumbe wose iwotambala." 27 Apfo Imulungu kawalumba iwanu weghale ne imwenyegho, kawalumba kwa kwighala naye. Kawalumba immale ne ipinga. 28 Imulungu kawabaliki, kawalongela, "Mkeleke na mwongetseke. Mmeme muisi mwose, muwe ne uwetso mna ipfinu pfose. Muwatawale iwasomba, wapfideghe na wapfilumbe wose iwali muisi." 29 Kuya Imulungu kalonga, "Noweng'a chila ghummeya ighukweleka tsimbeghu mna isi yose, na chila mbiki ghune ghamatunda ghane tsimbeghu. Pfitsakuwa pfijo pfenu. 30 Ne wanyama wose wa kumuhulo, wapfideghe wose na wapfilumbe wose iwotambala muisi niweng'a mitsani ya chila ghummeya iwe chijo chawo." Ikala pfipfo. 31 Imulungu kona ipfinu pfose pfayalumbile pfikala pfinogha ng'ani! Mihe ibita, nemitondo itsa, alyo tsalikala litsuwa lya sita.