1 Awala malaika weli wa kulanga tsawapfika Sodoma nemihe. Loti tsakakala hane libani lya ghumji. Baho hayawonile, kenuka kaghenda kuwabokela, kenama chihanga chake chidonza hasi, 2 kalonga, "Watwatsa wangu, chonde chonde mwingile mng'anda mwangu mtumwa wenu. Mwopfughe ghamaghulu ghenu na chilo chino muwase hano. Nemitondo mwodaha kughendelela na ghumwanza."

Lekeni wamwidika, "Bae, tutsowasa mchibwalu."

3 Loti kawadedetsa ghendo, kuya watoghola wengila mng'anda mwake. Kawatendela ichijo, kawambikila pfibumo ipfilihela usasu, wapfija.

4 Lekeni ng'ana wawase baye, iwamale wose wa ghumji ghwa Sodoma, wadodo ne iwabala waitsunguluka ing'anda ya Loti. 5 Wamkema Loti, wamghutsa, "Walikwani iwanu wala iwatsile chilo chino? Walapfe kunze tuwase nawo." 6 Loti kalawa kuya kahinda libani kuchisogho. 7 Kawalongela, "Bae, ndughu tsangu mleke kutenda pfinu pfino pfihile. 8 Loleni, nina neghe tsangu weli ng'ana wawase baye ne mmale. Leka niwalapfileni kunze, muwatendele chochose chambama. Lekeni mleke kuwatendela chinu chochose iwanu wano, kwaapfila watsa mng'anda mwangu."

9 Lekeni iwanu awo wamwidika, "Seghela hano! Ghweghwe tsakutsa hano ka mhenza, lekeni lelo kwetenda mlamutsi! Tutsokutendela pfihile kubita iwanu awo." Wamkunughitsa Loti wabama kubena libani. 10 Lekeni iwanu wala iwakalile mng'anda wagholosa ghamoko ghawo, wamkwegha Loti mng'anda wahinda libani. 11 Kuya wawabopfula tsinenge iwanu iwali kunze, apfo ng'awadahile baye kulyona libani.

12 Kuya iwanu wala weli wamghutsa Loti, "Kuna imunu yungi hanu hano? Iwanagho au neghe tsako au wakwe tsako au ndughu yako yoyose? Walapfe hanu hano sambi baha, 13 kwaapfila tutsohahinya hanu hano, kwaapfila mtwatsa kahulika masing'iniko makulu ghe iwanu kwaajili ye iwanu iwokala hano, naye katutuma kuhahinya."

14 Kuya Loti kalawa, kaghenda kuwalongela wakwe tsake iwabamile kuwakwela neghe tsake. Kawalongela, "Mlawe hanu hano sambi baha, kwaapfila IMNDEWA katsoghuhinya ghumji ghuno!" Lekeni wakwe tsake watsagha yang'ali yodawala.

15 Lupfilipfili wamalaika wamlongela Loti, "Himahima! Msole ipinga wako ne iwanagho weli iwali hano hela mtsakufa ghumji haghutsohinyighwa." 16 Loti hayang'ali yokawa, iwanu wala wamkinda ghumoko ghwake na ghumoko ghwa ipinga wake na ghamoko ghe iwanaghe wawalongotsa kunze mwe ghumji, kwaapfila IMNDEWA kawonela libatsi. 17 Hawawalapfile kunze, malaika yumwe kawalongela, "Mtsume muukombole ughima wenu. Mleke kulola kuchughu wala kwima hanu hohose kulwanda. Tsumileni mpfighongo hela mtsokomighwa!"

18 Lekeni Loti kawedika, "Bae, chonde chonde, watwatsa wangu! 19 Nomanya mmbonela libatsi kuukombola ughima wangu. Lekeni mpfidunda kutali ng'ani na nene sidaha baye kutsumila ako. Ghehile ghano ghatsonipfika ng'ana mvike ako, na nene nitsokufa. 20 Lola, isi ila ndodo, nene nodaha kutsumila hala kwaapfila ya habehi. Mndeke nitsumile hala, hanu hala nene nitsohona."

21 Kamwidika, "Pfinogha, nitoghola chulombile. Sitsoihinya baye isi ila yaulonga. 22 Sumka utsume! Sidaha baye kughuihinya ghumji ghuno mbaka upfike hala." Apfo ghumji ghula tsaghukemighwa Soari.

23 Litsuwa ma tsalilawa Loti hayapfikile Soari. 24 Kuya IMNDEWA kaghala imvula ya ghumoto itowe mna imiji ya Sodoma na Gomora. 25 Kaihinya imiji yose na ulwanda lwose, kawakoma iwanu wose na chila chinu ichotile mna isi ila. 26 Lekeni ipinga wake Loti kahunduka kalola kuchughu, kaghaluka, kawa ngutso ya ghumkele.

27 Lupfilipfili tsuwa liwinzile Abrahamu tsakasumka kaghenda hanu hala hayemile hambele he Imulungu, 28 kuya kalola kuisi kwaili Sodoma na Gomora na isi yose ya ulwanda, tsakona lihosi muisi lyoghenda kulanga ka lihosi lya ghumoto mkulu. 29 Lekeni Imulungu hayahinyile imiji iili mlwanda iyang'ali yokala Lutu, kamkumbuka Abrahamu, kamlapfa Loti kulawa mna maghayo, aleke kukomighwa nawo.

30 Kwaapfila Loti ang'ali yopfuka kukala Soari, yeye ne iwanaghe weli mapinga wagheluka mpfidunda, waghenda kukala mmango. 31 Litsuwa limwe mwanaghe mkulu kamlongela mdodo wake, "Aba wetu kalala, haduhu mmale mna isi yose iyodaha kutukwela tweleke iwana. 32 Leka tumnwese aba wetu imbwali, kuya tuwase naye, tumwelekele iwana." 33 Chilo chila wamwing'a aba wawo imbwali, imwana mkulu kaghenda kuwasa naye, na aba wake ng'amanyile baye chinu ichitendeke.

34 Ilupfi yake, imwana mkulu kamlongela mdodo wake, "Nechilo tsaniwasa na aba, leka leloli tumnwese keli imbwali, kuya nechilo ughende ukawase naye. Kuya twetwe wose tutsomwelekela iwana aba wetu." 35 Apfo chilo chila wamnwesa keli mbwali aba wawo, kuya imwana yula mdodo naye kaghenda kuwasa na aba wake, na aba wake ng'amanyile chinu ichitendeke. 36 Apfo iwana wose weli wa Loti tsawakinda hinda kulawa kwa aba wawo. 37 Imwana mkulu tsakeleka imwana mmale, kamkema Moabu. Ayo iyo aba wa Wamoabu mbaka leloli. 38 Imwana mdodo naye tsakeleka imwana mmale, kamkema Benami. Ayo iyo aba wa Waamoni mbaka leloli.