1 Inzoka tsakakala kakengela ng'ani kubita iwanyama wose wa kwibagho iwalumbighwe ne IMNDEWA. Inzoka kamghutsa ipinga, "Apfi Imulungu kalonga mleke kuja ghamatunda gha mbiki ghwoghwose mkonde?"

2 Ipinga kamwidika, "Ghamatunda ghe imibiki ili mkonde twodaha ukuja, 3 lekeni Imulungu kalonga, ‘Mleke ukuja ghamatunda ghali mna imbiki ighuli mghati mwe konde, na mleke kughudonza, mng'atenda apfo, mtsakufa.’ "

4 Inzoka kamwidika, "Bae, ng'amtsakufa. 5 Imulungu kalonga apfo kwaapfila komanya mng'aja mtsokuwa ka yeye, na mtsomanya ghanoghile na ghehile." 6 Ipinga kaghona ghamatunda ghe mbiki agho ghanogha ng'ani kwa ukuja, na ghanogha kughalola, naye kapfikitsa itsakuwa pfinogha kumanya ghanoghile na ghehile. Apfo kaghondola kaja, pfifila kamwing'a immale wake yakalile hamwe naye, naye kaja. 7 Bahala hawajile tsinenge tsawo tsipfughuka, watanga ka wachidako. Apfo wasola imitsani ya mkuyu watendela maghwanda weghubika.

8 Nemihe Adamu na mwehe wake wamhulika IMNDEWA ang'ali yakwanga mkonde, nawo wepfisa mna imibiki IMNDEWA aleke kuwona. 9 Lekeni IMNDEWA kamkema Adamu, "Adamu Ulikwani?" 10 Naye kamwidika, "Tsanikuhulika mkonde, nipfuka kwaapfila tsang'ala chidako, apfo nipfisa." 11 Imulungu kamghutsa, "Yuhi yakulongele kwachidako? Pfii kuja ghamatunda ighanikughomile uleke kughaja?"

12 Immale ayo kamwidika, "Ipinga yumwikile hano hamwe na nene, kangaya litunda kulawa kune imbiki ghula na nene ndiya."

13 Kuya IMNDEWA kamghutsa ipinga ayo, "Chinu chachi chutendile?"

Ipinga kamwidika, "Inzoka kangutsukila, na nene ndiya."

14 Kuya IMNDEWA kamlongela inzoka,

"Kwa achino chutendile,

ghweghwe kulighitighwa mna iwanyama wose

na wapfilumbe wose wa kumuhulo,

kutsotambala kwa lida lyako,

naghwe kutsakuja litimbwisi

ghamatsuwa ghose gha ughima wako.

15 Nitsokutenda ghweghwe ne ipinga mwihile,

ne iwanagho ne iwana we ipinga wehile ghamatsuwa ghose.

Imwana we ipinga katsokuhonda litwi lyako,

naghwe kutsomluma ichisegheyu."

16 Kuya kamlongela ipinga,

"Nitsokwongetsela usungu mna ukweleka,

kwa usungu kutsakweleka iwana.

Kutsomsulukila immale wako,

naye katsokutawala."

17 Kuya Imulungu kamlongela Adamu, "Kwaapfila kumhulikitsa mwehe wako, ne ukuja litunda lyanikulaghitse, ‘Uleke ukuja ghamatunda gha imbiki aghwo,’

kwa achino chutendile lidongo lilighitighwa.

Kutsopata ichijo kwa ukusang'ana kwa usungu

kulawa mna lidongo ghamatsuwa ghose ghe ughima wako.

18 Lidongo litsolapfa imibagho na tsimiwa,

naghwe kutsakuja imimeya ya kwibagho.

19 Naghwe kutsosang'ana na kulawa lijaso

ili kutenda lidongo likulapfile ichijo

mbaka hautsakufa.

Kwaapfila tsanikulumba kulawa mna lidongo,

naghwe kutsakuya keli mna lidongo."

20 Adamu kamwing'a taghwa mwehe wake Eva, kwaapfila ipinga ayo tsakakala mai we iwanu wose iwelekighwe. 21 IMNDEWA kawatendela Adamu na mwehe wake maghwanda ghe ngotsi ye imnyama, kuya kawapfatsa.

22 Kuya IMNDEWA kalonga, "Sambi imunu kawa ka yumwe wetu, komanya ghanoghile na ghehile. Apfo aghomighwe kughondola ghamatunda gha mbiki ighulapfa ughima. Kwaapfila ang'aja, katsokala mghima ghamatsuwa ghose." 23 Apfo IMNDEWA kamuwinga mna likonde lya Edeni, naye kamtenda alilime lidongo, kulawa amo kwayalumbighwe. 24 Kuya kune ubali wa kwalilawila litsua wa likonde lya Edeni, Imulungu keka Makerubi na lipanga ilikwaka ghumoto, ilitsunguluka chila hanu ukukalitsa imunu wowose aleke kutsa habehi ne imbiki ughulapfa ughima.