1 IMNDEWA kamlawila Abrahamu habehi na mibiki mikulu ya Mamre hayakalile hane libani lya hema lyake mmisi, mna chipindi cha pwihi. 2 Abrahamu kenula nenge tsake, kawona iwanu wadatu hambele hake. Bahala hayawonile kawatsumilila kaghenda kuwabokela. Hayapfikile kenama chihanga chake chidonza hasi. 3 Kalonga, "Wakulu tsangu chonde chonde mleke kumbita nene mtumwa wenu, ila mtse ukaye yangu. 4 Niwaghalile ghamatsi chidogho muhopfughe ghamaghulu ghenu na mbwihile hane chimbeho cha mbiki. 5 Niwaghalileni ichijo, mje mghute kuya mghendelele na ghumwanza, kwaapfila mnitsila nene imtumwa wenu."

Wamwidika, "Pfinogha, utende ka pfaulonga."

6 Apfo Abrahamu katsumila mna lihema kamlongela Sara, "Sola utimbo iunoghile debe limwe wambikile ichijo himahima." 7 Kuya katsumila mna kingili lya ng'ombe, kasaghula ng'ombe yumwe iyanoghile na iyanenehe, kamwing'a imtumwa, iyamchinjile na kumwabika himahima. 8 Kuya Abrahamu kawaghalila siagi ne ghamatsiwa ne nyama iyambikighwe, kawekela wahenza awo ichijo, naye tsakema habehi yawo hawang'ali wakuja hasi mwe mbiki.

9 Kuya iwanu awo wamghutsa Abrahamu, "Alikwani ipinga wako Sarai?"

Kawedika, "Kamna lihema."

10 Kuya Imkulu yumwe kamlongela, "Nitsokuyila ghendo ghamatsuwa ka ghano ghumwaka iukutsa na pinga wako Sarai katsakuwa ne imwana mmale."

Sarai tsakakala kuchughu mwa libani lye lihema kotegheletsa. 11 Abrahamu na Sara tsawalala ng'ani, na Sara tsakakala kalala ng'ani ukweleka imwana. 12 Apfo Sara kasekelela mmoyo mwake kalonga, "Nene nilala, pfipfila mmale wangu naye kalala, nitsodahatse kudeng'ela na kupata iwana?"

13 Kuya IMNDEWA kamghutsa Abrahamu, "Ule Sara koseka na kolonga, ‘Nene nilala, nitsodahatse kweleka iwana?’ 14 Apfi kuna chinu chochose ing'achidahika baye kwe IMNDEWA? Nitsokuyila ghamatsuwa ka ghano ghumwaka iukutsa na Sara katsakweleka imwana mmale."

15 Lekeni Sara tsakapfuka, kabela kalonga, "Sisekile baye."

Lekeni Imulungu kamlongela, "Bae, tsakuseka."

16 Iwanu awo woka, wapfika hanu hawadahile kona ghumji ghwa Sodoma, baho Abrahamu kawahagha. 17 Kuya IMNDEWA kelongela mmoyo, "Apfi nimpfise Abrahamu chinu chanibama kutenda? 18 Abrahamu katsakuwa aba we isi ng'ulu na iwanu wose wa tsiisi tsose watsobalikighwa kubitila yeye. 19 Nimsaghula yeye, yawalaghitse iwanaghe na iwanu wa kaye yake waiwinze nzila yangu kwa kutenda ghanoghile na gha haki. Wang'atenda apfo, nitsomtendela ghose ghanimlongele."

20 Kuya IMNDEWA kamlongela Abrahamu, "Kuna chililo chikulu che iwanu kwa Sodoma na Gomora na nzambi tsawo tsowotenda tsiha ng'ani. 21 Lelo nohulumka nikalole ka achila chawatendile cheghala na chililo chanihulike. Ka si pfipfo, nitsomanya."

22 Kuya iwanu weli mna iwanu wala woka, waghenda Sodoma, lekeni Abrahamu tsakema hambele he Imtwatsa. 23 Kuya Abrahamu kamsoghelela IMNDEWA kamghutsa, "Apfi kutsowakoma iwanu iwanoghile na iwanu iwehile? 24 Tulonge mna ghumji ghula hana iwanu iwanoghile hamsini. Apfi kutsohinya ghumji ghwose, ng'utsoghulekela baye ghumji kwa iwanu awo hamsini? 25 Imane ka kutsotenda apfo. Kukoma iwanu wehile hamwe ne wanoghile, kuwahigha wanoghile hamwe na wehile! Mbe, mlamutsi wa iisi yose ng'atsoleka baye kuhigha pfinoghile!"

26 IMNDEWA kamwidika, "Ning'awona iwanu iwanoghile hamsini wamna ghumji ghula ghwa Sodoma, nitsoghulekakela ghumji agho."

27 Kuya Abrahamu kalonga keli, "Lelo sipfukile baye kulonga ne Imtwatsa, nene yanili timbwisi na lipfu liliheka. 28 Tulonge hana iwanu iwanoghile alubaini na watano. Pfii kutsoghuhinya ghumji ghwose kwa kuhunguka iwanu wano watano?"

IMNDEWA kamwidika, "Sitsoghuhinya baye ghumji aghwo ka nitsawona iwanu iwanoghile alubaini na watano."

29 Abrahamu kalonga keli, "Pfii ka hana iwanu alubaini?"

Imulungu kamwidika, "Sitsoghuinya baye ka hana iwanu wanoghile alubaini."

30 Abrahamu kalonga, "Chonde chonde uleke kumbonela maya, ndeke nonge keli. Pfii ka watsakoneka iwanu selasini?"

IMNDEWA kamwidika, "Sitsowakoma baye ning'awona iwanu selasini."

31 Abrahamu kalonga, "Chonde unilekele mana sipfukile baye kulonga naghwe. Pfii ka hana iwanu ishilini?"

Imulungu kalonga, "Sitsouhinya baye ghumji agho ning'awona iwanu ishilini."

32 Kuya Abrahamu kalonga, "IMNDEWA uleke kumbonela maya, ndeke nonge keli mala lumwe luliheka. Pfii ka watsakoneka iwanu kumi waliheka?"

IMNDEWA kamwidika, "Sitsoghuhinya baye ghumji agho ka ghuna iwanu awo kumi." 33 IMNDEWA hayamalitse kulonga na Abrahamu, koka, naye Abrahamu koya ukaye.