1 Kuya Yosefu ng'adahile baye kwikatsa hambele he iwanu iwemile habehi naye. Kadamilila, kalonga, "Laweni kunze!" Apfo Yosefu hayelanguse kwa ndughu tsake tsakuduhu imunu yungi hamwe naye. 2 Yosefu tsakalila ng'ani mbaka Wamisiri wamuhulika. Pfipfila ne iwanu iwali mkaye mwa Farao tsawahulika. 3 Yosefu kawalongela ndughu tsake, "Nene na Yosefu! Pfii aba wangu mghima?" Ndughu tsake hawahulike apfi, tsawapfuka ghendo, apfo ng'awadahile baye kumwidika. 4 Kuya Yosefu kawalongela ndughu tsake, "Mtse kuna nene." Hawamsoghelele, kawalongela, "Nene na Yosefu, ndughu yenu, iyamuutsile Misiri. 5 Lelo mleke kwona usungu na mleke kwiyonela maya kwa kuniutsa, kwaapfila Imulungu tsakanituma niwalongole ili nikombole ughima we iwanu. 6 Aghuno mwaka ghwa keli ghwe nzala muisi, na ing'ali miyaka ingi mitano, iwanu ng'awatsolima wala kupfuna. 7 Lekeni Imulungu kanituma niwalongole ili niwekile chijo muisi na kuwakombolani kwa ukombotsi mkulu. 8 Apfo si mwemwe baye iyamnighalile kuno, ila Imulungu. Imulungu kanyika ka aba wa Farao, na imkulu wa kaye yake yose, na mtawala wa isi yose ya Misiri.

9 "Lelo mghende himahima kwa aba wangu, mumlongele apfi pfipfo pfayolonga mwanagho Yosefu, ‘Imulungu kanitenda niwe mkulu wa isi yose ya Misiri, hulumka himahima uleke kukawa. 10 Naghwe kutsokala mna isi ya Gosheni, kutsokala habehi na nene, ghweghwe, iwanagho, watsukulu wako, wang'olo wako, wamene wako, ng'ombe wako na pfose pfauli napfo. 11 Ung'akala Gosheni, nitsokulolesa. Ing'ali miyaka ingi mitano ye nzala yakutsa. Nene sibama baye, ghweghwe, na wali akaye yako na wanyama wako mfe nzala.’ "

12 Kuya Yosefu kalonga, "Mwemwe wenyegho mmbona kwa nenge tsenu, na ndughu yangu Benjamini naye kambona kwa nenge tsake, ka nene yanilonga na mwemwe na Yosefu ghendo. 13 Mumlongele aba wangu pfanili mkulu mna isi ya Misiri na ghose ghamwonile. Kuya mtende himahima mumghale hano aba wangu."

14 Kuya Yosefu kamhabatila Benjamini, mdodo wake, kalila, Benjamini naye tsakalila aku wehabatila. 15 Yosefu tsakawahabatila ndughu tsake, kawanonela aku kolila. Baho ndughu tsake tsawanza kulonga naye.

16 Mbuli atso hatsipfikile mng'anda mwa Farao ka ndughu tsake Yosefu watsa, Farao na watumwa wake wose tsawadeng'elela. 17 Farao kamlongela Yosefu, "Walongele ndughu tsako wawabapitse pfihongwe wawo imitsigho, woye mna isi ya Kanaani, 18 kuya wamghale hano aba wenu na iwanu wose wa kaye yenu. Nene nitsoweng'a hanu hanoghile mna isi ya Misiri, nawo watsobweda ukuja ipfijo pfa isi ino. 19 Pfipfila walaghitse wasole mituka yo ukukweghighwa na falasi kulawa hano Misiri, iwasole iwana wawo na wapinga wawo, watse na aba wawo. 20 Waleke kwalangula pfinu pfawoleka, kwaapfila ghanoghile ghendo gha Misiri ghatsakuwa ghawo."

21 Iwana wa Isiraeli tsawatenda ka pfawalaghitsighwe. Yosefu kaweng'a mituka ka Farao pfayalaghitse, pfipfila kaweng'a na mao. 22 Kuya tsakamwing'a chila munu mabwende ghangi gha sambi, lekeni tsakamwing'a Benjamini pfihindi miya ndatu pfa fetsa na maghwanda matano. 23 Yosefu kamtumila aba wake pfinu pfino kwa ghumwanza ghwake ghwa ukutsa Misiri, pfihongwe kumi iwaghalile pfinu pfinoghile kulawa Misiri, na pfihongwe wangi kumi wapinga iwaghalile ipfijo, pfighate na ipfijo pfimwenga. 24 Kuya Yosefu kawaagha ndughu tsake, hawang'ali wakuka kawalongela, "Mleke kwisonga mnzila."

25 Apfo walawa Misiri woya Kanaani kwa Yakobu, aba wawo. 26 Wamlongela aba wawo, "Yosefu kamghima! Naye iyo mkulu wa isi yose ya Misiri!" Yakobu tsakakangawala ng'adahile baye kutoghola.

27 Lekeni hawamlongele ghose Yosefu ghayawalongele, na hayonile mituka Yosefu yaighalile kumsola kughenda Misiri, Yakobu tsakadeng'elela sideke. 28 Isiraeli kalonga, "Sambi notoghola, mwanangu Yosefu kamghima. Nitsoghenda kumwona ng'ana sina nyife."