1 Gharika haimalile iwana wa Nuhu, Shemu, Hamu na Yafeti weleka iwana. Awano iwo watsukulu wa Nuhu.

2 Iwana wa Yafeti tsawakala Gomeri, Magogu, Madai, Yavani, Tubali, Mesheki na Tirasi. 3 Iwana wa Gomeri tsawakala Ashikenazi, Rifati na Togoma. 4 Iwana wa Yavani tsawakala Elisha, Tarishishi, Kitimu na Dodanimu. 5 Iwanu wano iwo iwabala we iwanu iwakalile kumwani, chila iwanu kwa chilugha chake, kwa kolo tsawo, na kwa isi tsawo.

6 Hamu tsakaweleka Kushi, Misiri, Putu na Kanaani. 7 Naye Kushi kaweleka Seba, Havila, Sabita, Raama na Sabiteka. Raama kaweleka Sheba na Dedani. 8 Kushi kamweleka Nimrodi, Kushi tsakakala imunu wa mwanduso yane ngupfu muisi. 9 Imulungu tsakamwapfila Nimrodi, naye tsakakala munu iyowinda yane ngupfu, apfo iwanu tsawalonga, "IMNDEWA yakutende muwinda mkulu ka Nimrodi." 10 Undewa wake wanzila Babiloni, Ereku, Akadi, Kaline na Shinari. 11 Kulawa ako Nimrodi kaghenda isi ya Ashuru, katsenga imiji ya Ninawi, Rehobotiri na Kala 12 na Reseni ighuli mghati mwa Ninawi na ghumji mkulu ghwa Kala.

13 Misiri tsakaweleka Waludi, Waanamu, Walehabi, Wanafutuhi, 14 Wapatirusi, Wakasiluhi, ako kuko kwawalawile Wafilisti na Wakafitori.

15 Kanaani kamweleka imwanaghe chaudele, iyakemighwe Sidoni, na Wahiti, 16 na Wayebusi na Waamori na Waarigishi, 17 Wahaviti na Wamwariki na Wasini, 18 Warivadi na Wasemari na Wahamati.

Hambele kolo tsa Wakanaani tsipwililika, 19 ghumbaka ghwa Wakanaani ghwanzila Sidoni ughenda mbaka Gerasi na Gaza, kuya ughendelela Sodoma, Gomora, Adima, Seboimu na Lasha. 20 Hawano iwo iwana wa Hamu, chila yumwe tsakakala mna isi yake, na chila yumwe tsakana likabila lyake na yang'ali yolonga ilugha yake.

21 Shemu, ndughu mkulu wa Yafeti, tsakamweleka Waeburaniya wose. 22 Pfipfila tsakamweleka Elamu, Ashuru, Aripakisadi, Ludi na Aramu. 23 Aramu tsakamweleka Usi, Huli Getari na Mashi. 24 Aripakisadi kamweleka Sela, Sela kamweleka Eberi. 25 Eberi tsakana iwana weli, imwanaghe chaudele tsakamkema Pelegi kwaapfila ghamatsuwa agho muisi iwanu tsaweghola, na imwana wa kabili tsakamkema Yokitani. 26 Yokitani tsakamweleka Alimodadi Shelefu, Hasarimaweti na Yera, 27 Hadoramu, Usali na Dikila, 28 Obali, Abimaeli na Sheba, 29 Ofiri, Hawila na Yobabu. Awano wose tsawakala iwana wa Yokitani. 30 Isi yawakalile tsayandusila Mesha mbaka Sefari, ubali wa kwalilawila litsua mna isi ya pfidunda. 31 Hawano iwana wa Shemu, chila yumwe tsakakala na lugha yawo na isi yawo.

32 Aluno lukolo lwa iwana wa Nuhu, kwa pfeleko pfawo mna isi tsawo. Kulawila mna isi tsino, iwanu tsawenela muisi mwose gharika halimalile.