1 Yakobu hayahulike kuna pfijo ako Misiri, kawaghutsa iwanaghe, "Pfii mbona mwelolesa?" 2 Kaghendelela kulonga, "Nihulika kuna pfijo ako Misiri. Muhulumke mkatughulile chijo tuleke kufa." 3 Kuya ndughu tsake Yosefu kumi wahulumka, waghenda Misiri kughula chijo. 4 Lekeni Yakobu ng'amlekile Benjamini, ndughu yake Yosefu, aghende na ndughu tsake, tsakapfuka chinu chihile chileke kumlawila.

5 Apfo wana wa Isiraeli pfipfila tsawammo mna iwanu iwaghendile kughula chijo, kwaapfila mna isi ya Kanaani nako tsakulawila nzala. 6 Yosefu tsamkulu wa isi ya Misiri, yang'ali yowahutsila chijo iwanu kulawa isi yose. Apfo ndughu tsake Yakobu nawo tsawapfika, wamwinamilla mbaka pfihanga pfao pfidonza hasi. 7 Yosefu hawonile ndughu tsake, kawatambula, lekeni tsakatenda ka ng'awamanyile baye na kawaghutsa kwa ukali, "Mlawile kwani?"

Wamwidika, "Twolawa isi ya Kanaani, tutsa kughula chijo."

8 Hata ka Yosefu tsakawatambula ndughu tsake, lekeni wawo ng'awamtambule baye. 9 Kuya Yosefu tsakakumbuka ndoto tsayawalotele ndughu tsake, kawalongela, "Mwemwe mwa wapelembi. Mtsa kuipelemba isi yetu mmanye pfaili."

10 Wamwidika, "Bae mkulu. Twetwe twa watumwa wako tutsa kughula chijo. 11 Twetwe twandughu, wose aba wetu yumwe. Twetwe twa wanu wanoghile wala si wapelembi baye."

12 Yosefu kakomangitsa, kawalongela, "Mbe. Mtsa kwiyona isi yetu pfaili."

13 Lekeni wamlongela, "Twetwe watumwa wako twa kumi na weli, wose hano aba wetu yumwe, yeye kokala mna isi ya Kanaani. Mtsuwanda wetu kaukaye na aba wetu, na mdodo wetu yungi kafa."

14 Yosefu kawalongela, "Ka pfaniwalongele. Mwemwe mwa wapelembi. 15 Apfi pfipfo pfamtsoghetsighwa, nelaha kwa taghwa lya Farao, ng'amtsakuka mbaka mtsuwanda wenu hayatsakutsa hano. 16 Mlaghitseni yumwe wenu yaghende yakamsole mtsuwanda wenu, wamwenga mtsokala mchifungo mbaka haitsomanyika ka chayamlongile cholongesa. Ka si pfipfo baye, nelaha kwa taghwa lya Faraho mwemwe mwa wapelembi!" 17 Kuya tsakaweka wose mchifungo kwa ghamatsuwa madatu.

18 Mna litsuwa lya kadatu Yosefu kawalongela, "Nene na imunu yanimpfuka Imulungu, mtende chaniwalongela na mtsokala waghima. 19 Ka mwolongesa, mlekeni yumwe wenu akale mchifungo, na wamwenga wawaghalile chijo ndughu tsenu iwane nzala. 20 Kuya mngalile mtsuwanda wenu. Mng'atenda apfo nene nomanya mwemwe mwolongesa, namwe ng'amtsokomighwa baye." Kuya tsawatoghola kutenda apfo.

21 Welongela, "Lelo twetwe wose twoghaya kwa achila chatumtendele ndughu yetu, tsatumwona hayang'ali koghanzika, naye hayatulombile tumwapfile, twetwe ng'atumtegheletse baye. Apfo sambi twoghanzika."

22 Rubeni kamwidika, "Apfi siwalongele tuleke kumlagha msongolo? Lekeni mwemwe ng'amnitegheletse baye! Sambi twoghanzika kwa achila chatumtendele." 23 Wawo ng'awamanyile baye ka Yosefu yang'ali yowahulika, kwaapfila Yosefu yang'ali yolonga kubitila imunu yungi. 24 Yosefu kahunduka mmbalimbali kalila. Kuya kawoyila na kalonga nawo keli. Kamghogha Simeoni, kamwoha hambele yawo.

25 Yosefu tsakalaghitsa maghunila ghawo ghameme ipfijo, na chila imunu sendi yake ikighwe mna ghunila lyake, na weng'ighwe maho yokuja mnzila. Tsawatendelighwa pfipfo. 26 Kuya ndughu awo wawabapitsa mitsigho pfihongwe wawo, woka. 27 Hanu hala hawemile wawase, yumwe wawo kadohola ghunila lyake yasole ichijo yamwing'e chihongwe wake, kakangawala kuyona sendi yake yohighwa mchang'a mwa ghunila. 28 Kawalongela ndughu tsake, "Sendi yangu wambuyitsila, mlole yamna ghunila lyangu!"

Hawahulike apfi, mimoyo yawo itenyuka, wehundukila aku wodedema, weghutsa, "Angu achi choni Imulungu chayatutendele?" 29 Hawapfikile kwa aba wawo, mna isi ya Kanaani, wamlongela ghose ighawalawile. Walonga, 30 "Imunu iyali mkulu wa isi ya Misiri tsakatulonga kwa ukali na katona twetwe twa wapelembi muisi mwake. 31 Lekeni tumwidika, ‘Twetwe twa wanu wanoghile, wala si wapelembi baye. 32 Twetwe twa ndughu, wose hano aba wetu yumwe. Mdodo wetu yumwe kafa, na mtsuwanda wetu kaukaye na aba wetu mna isi ya Kanaani.’ 33 Imkulu wa isi ila katulongela, ‘Apfi pfipfo pfanitsomanya ka mwolongesa. Mlekeni ndughu yenu yumwe akale na nene, wamwenga wenu muwaghalile pfijo ndughu tsenu iwane nzala. 34 Lekeni ngalileni mdodo wenu, apfo nitsomanya mwemwe si wapelembi ila mwa wanu iwanoghile. Kuya nitsomwing'ani ndughu yenu, na mwodaha kuchuhutsa mna isi ino.’ "

35 Hawang'ali womwagha maghunila ghawo, chila yumwe kona mkoba ghwake ghwa sendi mna ghunila lyake. Hawonile apfo, wawo na aba wawo tsawapfuka. 36 Yakobu aba wawo kawalongela, "Mwobama nyaghitse wanangu wose! Yosefu ng'alibaha, Simeoni naye ng'alibaha baye, lelo mwobama mumsole Benjamini. Agho ghose ghandawila nene!"

37 Kuya Rubeni kamlongela aba wake, "Ning'aleka kumuyitsa Benjamini, wakome wanangu weli. Ndekelele Benjamini mbuke naye nani nitsomlolesa na nitsomuyitsa kuna ghweghwe."

38 Lekeni Yakobu kalonga, "Mbe, ng'amdaha baye kuhulumka na mwanangu, mkulu wake kafa naye kaheka. Ang'atingwa mnzila, usungu wodaha kung'oma na unzehe wangu na mvili tsangu nzelu."