1 Miyaka mili hailutile, Farao kalota ndoto kema mmbalimbali mwa ghumto Naili. 2 Kawona ng'ombe saba iwanenehe na iwadeghete wolawa kune ghumto, wakuja mitsani. 3 Kuya ng'ombe wangi saba wehile na iwasokile ghendo walawa mna ghumto Naili, watsa na kwima habehi na ng'ombe wala iwanoghile iwemile mmbalimbali mwa ghumto. 4 Ng'ombe wala saba iwehile na iwasokile tsawawaja ng'ombe wala saba iwanoghile. Kuya Farao kalamka. 5 Hayawasile keli, kalota lwakeli. Kona mikungwi saba ya uhemba ikomale na inoghile tsaisanula mna beleghe limwe. 6 Kuya mikungwi ingi saba ya uhemba isokile na iinyalile kwa libeho lya kunyika tsaisanula. 7 Pfipfila mikungwi ila saba iisokile tsaihija ahila mikungwi saba inoghile. Kuya Farao kalamka, baho katanga yang'ali yolota. 8 Nemitondo, Farao tsakaghanzika ng'ani, tsakawakema wahawi wose iwali Misiri ne iwanu iwane ihekima. Farao kawalongela ndoto tsake, lekeni tsakuduhu imunu wa kumlongela ndoto tsake tsilongatse.

9 Kuya mghida dipfai kamlongela Farao, "Leloli nikumbuka nenda pfihile. 10 Tsakutwonela maya nene na mwambika pfighate mkulu, na tsakutwoha mchifungo mng'anda mwa mkulu wa iwabetetsi. 11 Chilo chimwe, chila yumwe kalota ndoto yake na chila ndoto ing'ali ilonga mbuli yake. 12 Ako mchifungo tsakung'ali na mbwanga Mhebulaniya, mtumighwa wa mkulu wa iwabetetsi. Tsatumpetela ndoto tsetu, naye tsakatulongela ndoto tsetu tsilongatse. 13 Ghose ghalawila ka pfayatulongele. Ghweghwe kumbuyitsa mna sang'ano yangu na mwambika pfighate mkulu kakondekighwa."

14 Apfo Farao kawatuma iwanu waghende kwa Yosefu, naye kalapfighwa himahima mchifungo. Hayaghetile mvili tsake na kupfala maghwanda ghangi, kaghalighwa hambele ya Farao. 15 Farao kamlongela Yosefu, "Tsanilota ndoto na kuduhu imunu iyodaha kunilongela ndoto atso tsilongatse. Nihulika ghweghwe kwodaha kunilongela ndoto tsangu tsilongatse."

16 Yosefu kamwidika, "Mbe nene sidaha baye, lekeni Imulungu kodaha kutulongela pfinoghile ndoto tsilongatse."

17 Kuya Farao kamlongela Yosefu, "Nilota ndoto nyima mmbalimbali mwa ghumto Naili. 18 Niwona ng'ombe saba iwanenehe na iwadeghete wolawa kumto wakuja imitsani. 19 Kuya watsa ng'ombe wangi saba iwehile na iwasokile. Kulawa nyelekighwe sina mbone baye ng'ombe iwasokile ka wano mna isi ya Misiri. 20 Kuya ng'ombe awo iwasokile tsawawaja ng'ombe wala iwanenehe. 21 Lekeni hata ka tsawawaja ng'ombe awala iwanenehe, kuduhu imunu iyodaha kulonga ka tsawatenda apfo, kwaapfila tsawoneka wasoka ka mwanduso. Kuya ndamka. 22 kuya nilota ndoto ingi, niyona mibeleghe saba ine uhemba ikomale, ikula mna beleghe limwe. 23 Kuya mikungwi ya uhemba iinyalile kwa libeho lya kunyika tsailawila. 24 Mikungwi ila saba iinyalile tsaiija ahila mikungwi saba inoghile. Niwalongela wahawi, kuduhu iyadahile kulonga ndoto tsilongatse."

25 Kuya Yosefu kamlongela Yosefu, "Ndoto tsako tsose tsina mana imwe. Imulungu kakughubulila Farao chayatsochitenda hambele. 26 Ng'ombe saba iwanenehe iyo miyaka saba, na mikungwi saba inoghile iyo miyaka saba. Ndoto tsino tsolonga chinu chimwe. 27 Ng'ombe wala iwasokile, awala iwalawile hambele ha awala iwanenehe, iyo miyaka saba, na ahila mikungwi saba ilihela chinu, ila ihinyalile kwa libeho lya kunyika, iyo miyaka saba ya nzala. 28 Ka pfanikulongele ghweghwe mfalume Farao, Imulungu kakughubulila achila chayatsochitenda hambele. 29 Miyaka saba iikutsa kutsakuwa na ichijo ketseketse. 30 Lekeni hambele itsowinza miyaka saba ya nzala, na miyaka yose saba ye ichijo mna isi ya Misiri mtsoisemwa, nzala itsoihinya isi. 31 Chijo acho chitsosemwighwa ghendo kwaapfila kutsolawila nzala ng'ali ng'ani. 32 Mndewa Farao tsakulota mala mbili, kwaapfila Imulungu kalamla imbuli ino, naye katsoitenda ilawile sambi baha.

33 "Lelo mfalume umsaghule imunu yane tsimbutsi na ihekima, umwike yailolese isi ya Misiri. 34 Farao uwasaghule wakulu wangi muisi mno, wasole lifungu lya tano lye ipfijo pfawopfuna iwanu mna isi ya Misiri mna chipindi cha miyaka saba ya ipfijo pfingi. 35 Walongele wakunge pfijo pfose mna miyaka ino saba inoghile. Pfijo apfo wapfike hane hatsina yako, iwe akiba kwa imiji yose ya Misiri, nawo wapfilolese. 36 Chijo achi ichikighwe chitsakujighwa mna miyaka saba ya nzala iikutsa mna isi ya Misiri. Apfo iwanu ng'awatsakufa nzala baye."

37 Imbuli yalongile Yosefu yoneka imnoghelesa Farao ne iwakulu wayaghe wose. 38 Farao kawaghutsa iwakulu wayaghe, "Apfi tutsompata kwani imunu ka yuno, yane muhe wa Imulungu?" 39 Kuya Farao kamlongela Yosefu, "Kwaapfila Imulungu kakughubulila agha ghose, kuduhu imunu iyane tsimbutsi na ihekima kubita ghweghwe. 40 Nitsokwika uilolese isi yangu, na iwanu wangu wose watsokutegheletsa. Nene niliheka namkulu kubita ghweghwe kwaapfila nene na mfalume." 41 Kuya Farao kamlongela Yosefu, "Kulawa sambi nokwika uwe mkulu we isi yose ya Misiri." 42 Kuya Farao katsula pete yake ine ichitango mna chidole chake, kampfatsa Yosefu. Kampfatsa Yosefu maghwanda ighanoghile na mkufu ghwa nzahabu msingo. 43 Kamdinitsa Yosefu mna mtuka ghwake wa kabili wa falasi. Iwanu wamdeng'elela, wakemelela, "Seghelani mnzila, seghelani mnzila!" Apfo Yosefu tsakasaghulighwa yawe mkulu wa isi yose ya Misiri. 44 Kuya mfalume kamlongela Yosefu, "Nene iyo mfalume! Nolonga, imunu wowose mna isi yose ya Misiri aleke kwinula ghumoko au mghulu wake bila ya ghweghwe kumlongela." 45 Farao tsakamwing'a taghwa Yosefu Safenatipanea. Kuya Farao kamkwelela Yosefu ipinga, Asenati neghe Potifera, mlapfa nambiko wa ghumji ghwa Oni.

46 Yosefu tsakana miyaka selasini hayandusile kumsang'anila Farao imfalume wa Misiri. Yosefu tsakalawa mna ing'anda ya Farao, kayangila isi yose ya Misiri. 47 Mne miyaka ila saba ya pfijo, imighunda ya Misiri tsayeleka mapfuno mengi. 48 Mne miyaka ila saba Yosefu tsakakunga pfijo pfose ipfili mna isi ya Misiri. Mna chila ghumji tsakeka ipfijo ipfilawile mna imighunda ya habehi. 49 Yosefu tsakakunga pfijo ketseketse ka msanga ighuli kumwani mbaka ng'adaile baye kupeta.

50 Ng'ana miyaka ya nzala itse, Asenati neghe Potifera, mlapfa nambiko wa Oni, tsakamwelekela Yosefu iwana weli. 51 Yosefu tsakamkema imwanaghe chaudele Manase na kalonga, "Imulungu kanenda nisemwe maghayo ghangu ghose na chawanitendele ndughu tsangu." 52 Imwanaghe wa keli tsakamkema Efremu kalonga, "Imulungu kangaya iwana mna isi yanighanzika."

53 Miyaka ila saba ya pfijo tsapfimala mna isi ya Misiri, 54 na miyaka saba ya nzala tsayanza ka Yosefu pfayalongile. Tsakulawila nzala mna isi tsose, lekeni isi ya Misiri tsaina chijo. 55 Wamisiri hawawonile nzala, iwanu wamlilila Farao yaweng'e chijo. Farao kawalongela Wamisiri wote, "Mghende kwa Yosefu na mtende chochose chayawalongelani." 56 Nzala yongetseka muisi, yenela mna isi yose ya Misiri, Apfo Yosefu tsakapfughula tsing'anda tsawekile ichijo, kawahutsila pfijo Wamisiri, kwaapfila nzala tsang'ali ng'ani. 57 Iwanu kulawa chila hanu tsawaghenda Misiri kwa Yosefu kughula pfijo, kwaapfila nzala tsang'ali ng'ani chila hanu.